អ្នកនយោបាយ និងសកម្មជនសង្គមនាំគ្នាកាន់ទុក្ខ ខណៈច្បាប់ព្រំដែនត្រូវបានឡាយព្រះហត្ដលេខា
អ្នកនយោបាយនៃគណបក្សប្រឆាំងនិងក្រុមសកម្មជនសង្គមបាននាំគ្នាប្តូរProfile ហ្វេសប៊ុករបស់ខ្លួនជាបន្តបន្ទាប់កាលពីម្សិលមិញដោយដាក់តាំងរូបកាន់មរណៈទុក្ខ។ រូបភាពទាំងនេះ បានកើតឡើងបន្ទាប់ពីច្បាប់ស្តីពីការអនុម័តយល់ព្រមលើសន្ធិសញ្ញាបំពេញបន្ថែមលើសន្ធិសញ្ញាកំណត់ព្រំដែនឆ្នាំ១៩៨៥ និងសន្ធិសញ្ញាបំពេញបន្ថែមឆ្នាំ២០០៥ រវាងកម្ពុជា និងវៀតណាម ត្រូវបានព្រះមហាក្សត្រឡាយព្រះហស្តលេខាប្រកាសជាការប្រញាប់កាលពីថ្ងៃទី៥ខែធ្នូឆ្នាំ២០១៩នេះ។
ចុះផ្សាយនៅថ្ងៃ៖ កែប្រែថ្ងៃទី៖
ការចូលរួមកាន់ទុក្ខទុក្ខរបស់អ្នកនយោបាយនៅក្រៅរដ្ឋាភិបាល និងសកម្មជនសង្គមទាំងនេះគឺខ្លះបាននិយាយចំៗថាចូលរួមសោកស្តាយចំពោះច្បាប់ស្តីពីសន្ធិសញ្ញាបំពេញបន្ថែមដែលត្រូវបានអង្គការសហប្រជាតិចាត់ទុកថាខុសច្បាប់នោះ ត្រូវបានធ្វើឲ្យរស់ឡើងវិញ។ ប៉ុន្តែអ្នកខ្លះទៀត គ្រាន់តែប្តូរProfile និងសរសេរសារចូលរួមកាន់ទុក្ខយ៉ាងខ្លីប៉ុណ្ណោះ។
លោកបណ្ឌិត មាស នី អ្នកវិភាគបញ្ហាសង្គមបានសរសេរថា« សូមចូលរួមកាន់ទុក្ខនិងសោកស្តាយជាមួយពលរដ្ឋខ្មែរទាំងអស់សម្រាប់ការបាត់បង់ដ៏ធំធេងនៅថ្ងៃនេះ»។ នៅគ្រាដែល លោក ព្រាប កុល បានសរសេរយ៉ាងខ្លីដែរថា «ថ្ងៃកាន់ទុក្ខ ជាប្រវត្តិសាស្ត្រ...។ សូមកុំសួរខ្ញុំថានរណាស្លាប់»។
រីឯ លោក វន់ ពៅ ប្រធានសមាគមសេដ្ឋកិច្ចក្រៅប្រព័ន្ធ ក្រៅពីតែពាក្យចូលរួមកាន់ទុក្ខ លោកបង្ហាញការ«ឈឺចាប់ឥតឧប្បាមា! ឈឺស្ទើរ់មរណាសឹងតែក្អួតឈាម ចំពោះរឿងនេះ» ខណៈ????ព្រះអង្គម្ចាស់ ស៊ីសុវត្ថិ ចក្រី លើកឡើងថា«ទុក្ខខ្ញុំជាប្រវត្តិសាស្ត្រ ប្រវត្តិសាស្ត្រជាទុក្ខខ្ញុំ»។
សម្រាប់លោក ហូ វ៉ាន់ និង លោក អ៊ុំ សំអាន តំណាងរាស្ត្រអតីតគណបក្សសង្រ្គោះជាតិដែលកំពុងនៅក្រៅប្រទេស បានហៅ«ច្បាប់បំពេញបន្ថែម២០០៥ និង២០១៩ គឺជាច្បាប់ ខុសបំពានលើរដ្ឋធម្មនុញ្ញនិងផ្ទុយពីឆន្ទៈរាស្រ្តខ្មែរ តែបំពេញឆន្ទៈយួន បំពេញមហិច្ឆិតាយួន»។
ដោយឡែក ព្រះតេជគុណ ប៊ុត ប៊ុនតេញ បានអះអាងថា «អ្វីគ្រប់យ៉ាងនឹងហួសពេល បើជនរួមជាតិយើងនៅតែបណ្ដោយឱ្យរបបក្រុងភ្នំពេញធ្វើតាមអំពើចិត្ត» ខណៈព្រះតេជគុណ ចាន់ លី អះអាងថា ព្រះអង្គសឹងមិនលក់ ព្រោះនឹកឃើញមាតុប្រទេសកម្ពុជា ទទួលរងមនោគវិជ្ជារបស់មនុស្សម្នាក់ដែលបានស្លាប់ទៅយូរហើយនោះ។
បើទោះជាយ៉ាងណា លោក គឹម សុខ ដែលកំពុងរស់នៅប្រទេស Norway « បើយើងជាខ្មែរចេះត្រឹមតែនាំគ្នាកាន់ទុក្ខ ហើយមិនព្រមរួបរួមកម្លាំងគ្នា ទាំងនៅតែប្រកាន់អស្មិមានះបុគ្គល/ពួកក្រុម និងចូលចិត្តប្រឌិតរឿងលាបពណ៌វាយប្រហារកម្ចាត់គ្នាឯងនោះ សូមខ្មែរគ្រប់គ្នាទប់អារម្មណ៍ ត្រៀមចិត្ត ដើម្បីកាន់ទុក្ខនៃការបាត់បង់កម្ពុជាកណ្ដាលនៅអនាគតផងពុំមែនត្រឹមតែបាត់កោះត្រល់និងទឺកដីខ្មែរតាមបណ្តោយព្រំដែន ទៅនៅក្រោមការគ្រប់គ្រងរបស់បរទេសជិតខាង ដូចយើងឃើញបច្ចុប្បន្ននេះប៉ុនហ្នឹងទេ»។
សម្រាប់អង្គការឃ្លាំមើលការបោះឆ្នោតខុមហ្វ្រែល ការអនុម័តរបស់សភាជាន់ទាបនិងសភាជាន់ខ្ពស់ទៅលើច្បាប់ស្តីពី សន្ធិសញ្ញាបំពេញបន្ថែមលើសន្ធិសញ្ញាកំណត់ព្រំដែនរវាងកម្ពុជា និងវៀតណាមនេះ ធ្វើឡើងដោយ«មិនតម្លាភាពនិង គ្មានការពិភាក្សាបែបពហុបក្ស» តែលោក ហ៊ុន សែន តែងតែអះអាងថា ក្រោមការដឹកនាំរបស់លោកមិនធ្វើឲ្យបាត់បង់ទឹកដី«សូម្បីមួយមីលីម៉ែត្រ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ