ACU ហៅលោករៀល ខេមរិន្រ្ទ មកបំភ្លឺជាថ្មីពាក់ព័ន្ធរឿងកិបកេងលុយចុះទៅព្រំដែន
អង្គភាពប្រឆាំងអំពើពុករលួយ(ACU) បានទាមទារឲ្យលោក រៀល ខេមរិន្ទ្រ តំណាងរាស្រ្តគណបក្សសង្រ្គោះជាតិ បំភ្លឺឲ្យបានច្បាស់លាស់ទាក់ទងនឹងរបាយការណ៍ចាយវាយថវិកាក្នុងការចុះទៅពិនិត្យមើលព្រំដែន។ តាមលិខិតចុះថ្ងៃទី០៨ កញ្ញា លោក ឱម យ៉ិនទៀងប្រធានអង្គភាពប្រឆាំងអំពើពុករលួយ ហៅការបំភ្លឺរបស់តំណាងរាស្រ្តបក្សប្រឆាំង ថា ជាការបំភ្លឺដោយលំៗ មិនមានឯកសារបញ្ជាក់ឲ្យបានច្បាស់។ ប៉ុន្តែលោករៀល ខេមរិន្រ្ទ បានបញ្ជាក់ប្រាប់វិទ្យុបារាំងអន្តរជាតិពីសហរដ្ឋអាមេរិកថា លោកនឹងមិនបំភ្លឺជាថ្មីតាមការចង់បានរបស់អង្គភាពប្រឆាំងអំពើពុករលួយនោះទេ។
ចុះផ្សាយនៅថ្ងៃ៖
ស្តាប់ - ០២:០៥
លិខិតរបស់អង្គភាពប្រឆាំងអំពើពុករលួយ កាលពីថ្ងៃទី ៨ កញ្ញា បានដកស្រង់សម្តីរបស់ លោក ឱម យ៉ិនទៀង ថាការបំភ្លឺពាក់ព័ន្ធករណីអំពើពុករលួយក្នុងការចុះមើលព្រំដែនរបស់តំណាងរាស្រ្តគណបក្សសង្គ្រោះជាតិមណ្ឌលស្វាយរៀង «ជាការបំភ្លឺដោយលំៗ មិនមានឯកសារបញ្ជាក់ឲ្យបានច្បាស់»។ «ការបំភ្លឺដោយលំៗ និងមានឯកសារច្បាស់លាស់សម្រាប់បញ្ជាក់មកជាមួយទេ នេះគឺជាការលំបាកធ្វើឲ្យជឿជាក់លើភាពស្មោះត្រង់របស់លោក រៀល ខេមរិន្រ្ទ។
ជាមួយគ្នានេះដែរ លោក ឱម យ៉ិនទៀង បានស្នើឲ្យលោក រៀល ខេមរិន្ទ្រ បំភ្លឺជាថ្មីដោយភ្ជាប់មកជាមួយបញ្ជីឈ្មោះ និងទឹកប្រាក់ដែលម្នាក់ៗបានចូលវិភាគទាន បញ្ជីចំណាយទាំងអស់និង ឯកសារទទួល ការគ្រប់គ្រង និងការចាត់ចែងថវិកាផងដែរ។
ឆ្លើយតបនឹងបញ្ហានេះ តំណាងរាស្រ្តគណបក្សសង្រ្គោះជាតិលោក រៀល ខេមរិន្ទ្រ បានប្រាប់វិទ្យុបារាំងអន្តរជាតិថា លោកនឹងមិនធ្វើលិខិតបំភ្លឺអ្វីទៀតទេ ឆ្លើយតបនឹងលិខិតរបស់អង្គភាពប្រឆាំងអំពើពុករលួយនោះ។
បើតាម លោក រៀល ខេមរិន្ទ្រ ការលើកឡើងដូច្នេះ វាជាអំពើអយុត្តធម៌ និងបង្ខូចកិត្តិយសរបស់លោក ក្នុងនាមជាអ្នកតំណាងរាស្រ្តមួយរូប។
លោកថា លោក មិនយល់ ហេតុអ្វីបានជាអង្គភាពប្រឆាំងអំពើពុករលួយលើកពីបញ្ហានេះទេ ព្រោះអ្នកដែលប្តឹងលោក មិនមានឯកសារជាមូលដ្ឋានគ្រប់គ្រាន់ ហើយថែមទាំងមិនមានភស្តុតាងផងនោះ។ ជាងនេះទៅទៀត បើអង្គភាពប្រឆាំងអំពើពុករលួយពិតជាចង់ស្វែងរកយុត្តិធម៌មែននោះ អង្គភាពមិនគួរឲ្យលោកបំភ្លឺតែមួយចំហៀងដូច្នេះទេ គួរតែហៅភាគីម្ខាងទៀតឲ្យចូលបំភ្លឺផងដែរ។ លោក បន្ថែមថា អង្គភាពប្រឆាំងអំពើពុករលួយ គួរតែទៅធ្វើការងារទាក់ទងនឹងបញ្ហាអំពើពុករលួយ ជាពិសេស មន្រ្តីនៅក្នុងជួររដ្ឋាភិបាលមួយចំនួន វាជាការប្រសើរជាង។
ជាថ្មីទៀត លោក រៀល ខេមរិន្ទ បានបញ្ជាក់ថា លោកនឹងពិចារណា និងពិភាក្សាជាមួយមេធាវីរបស់លោក បើអង្គភាពប្រឆាំងអំពើពុករលួយ មិនព្រមបញ្ចេញអត្តសញ្ញាណនៃអ្នកដែលប្តឹងលោកនោះទេ លោកនឹងប្តឹងតបវិញ ចំពោះអ្នកដែលបង្កាច់បង្ខូចកិត្តយសរបស់លោក។
សូមបញ្ជាក់ថា កាលពីចុងខែកក្កដានេះ អង្គភាពប្រឆាំងអំពើពុករលួយ បញ្ជាក់ថាខ្លួនបានទទួលប្តឹងចំនួន៣ ដែលចោទប្រកាន់ថា លោក រៀល ខេមរិន្ទ្រ កេងប្រវ័ញ្ចថវិកា ៥៥០០០ដុល្លារសម្រាប់ការចុះទៅពិនិត្យមើលព្រំដែននៅខេត្តស្វាយរៀង៕
អត្តបទដោយ៖ សរ ពិសី
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ