លោក រៀល ខេមរិន្ទ្រ បដិសេធថាមិនបានកេងប្រវ័ញ្ចប្រាក់ និងស្នើ ACU ចាត់វិធានការលើអ្នកប្ដឹង
លោក រៀល ខេមរិន្ទ្រ តំណាងរាស្ត្រមណ្ឌលខេត្តស្វាយរៀង បានច្រានចោលការចោទប្រកាន់ដែលថា លោកបានកេងប្រវ័ញ្ចប្រាក់ចំនួន៥ម៉ឺន៥ពាន់ដុល្លារ ពីការរៀបចំដំណើរទៅមើលបង្គោលព្រំដែន កម្ពុជាវៀតណាម។ នៅក្នុងលិខិតផ្ញើជូនប្រធានអង្គភាពប្រឆាំងអំពើពុករលួយ លោក រៀល ខេមរិន្ទ្រ បានហៅការចោទប្រកាន់នេះថា គឺជាការប្រឌិត ក្នុងចេតនាទុច្ចរិតបង្ខូចកេរ្តិ៍ឈ្មោះនិងកិត្តិយសរបស់លោក។ តំណាងរាស្ត្រមណ្ឌលស្វាយរៀងរបស់បក្សប្រឆាំងរូបនេះ ក៏បានស្នើឲ្យអង្គភាពប្រឆាំងអំពើពុករលួយ ស្វែងរកអ្នកប្ដឹង ដើម្បីចាត់វិធានការតាមនីតិវិធីច្បាប់ផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
តំណាងរាស្ត្របក្សប្រឆាំង លោក រៀល ខេមរិន្ទ្រ បានគូសបញ្ជាក់ថា លោកមិនបានទទួលប្រាក់ ឬកេងប្រវ័ញ្ចប្រាក់ក្នុងចំនួនរាប់ម៉ឺនដុល្លារ ដូចការចោទប្រកាន់នោះទេ។ ការអះអាងរបស់លោក រៀល ខេមរិន្ទ្រ ដូច្នេះ ធ្វើឡើងបន្ទាប់ពីមានការចោទប្រកាន់ថា លោកបានកេងប្រវ័ញ្ចប្រាក់ចំនួន៥ម៉ឺន៥ពាន់ដុល្លារ ដើម្បីរៀបចំដំណើរទៅមើលបង្គោលព្រំដែនកម្ពុជាវៀតណាម។ នៅក្នុងលិខិតផ្ញើជូនប្រធានអង្គភាពប្រឆាំងអំពើពុករលួយ លោក រៀល ខេមរិន្ទ្រ បានហៅការចោទប្រកាន់នេះថា គឺជាការប្រឌិត ក្នុងចេតនាទុច្ចរិតបង្ខូចកេរ្តិ៍ឈ្មោះនិងកិត្តិយសរបស់លោក។
ទាក់ទងនឹងការរៀបចំដំណើរទៅពិនិត្យមើលបង្គោលព្រំដែនកម្ពុជាវៀតណាម តំណាងរាស្ត្របក្សប្រឆាំងរូបនេះពន្យល់ថា លោកបានទទួលប្រាក់ឧបត្ថម្ភពីសប្បុរសជន ទាំងក្នុងស្រុកនិងក្រៅស្រុក សរុបចំនួន២ម៉ឺន៧៥០ដុល្លារ។ បើតាមលោក រៀល ខេមរិន្ទ្រ ថវិកាទាំងអស់នេះ ត្រូវបានចំណាយលើការជួលរថយន្ត ការទិញទង់ជាតិ ទង់សាសនា សម្ភារៈផ្សេងៗ ម្ហូបអាហារ និងទឹកសុទ្ធ។ ហើយរាល់ការទទួល ការគ្រប់គ្រង និងការចាត់ចែងថវិកាទាំងអស់ គឺសុទ្ធតែមានក្រុមការងារតាមផែននីមួយៗ ជាអ្នកទទួលបន្ទុក និងទទួលខុសត្រូវប្រកបដោយតម្លាភាព។ នេះបើតាមលោក រៀល ខេមរិន្ទ្រ។
ក្រៅពីបដិសេធការចោទប្រកាន់ និងបំភ្លឺពីការប្រើប្រាស់ប្រាក់ តំណាងរាស្ត្រមណ្ឌលស្វាយរៀងរបស់បក្សប្រឆាំងរូបនេះ ក៏បានស្នើឲ្យអង្គភាពប្រឆាំងអំពើពុករលួយ ស្វែងរកអ្នកប្ដឹង ដែលមានចេតនាមួលបង្កាច់បង្ខូចកិត្តិយសរបស់លោក ដើម្បីចាត់វិធានការតាមនីតិវិធីច្បាប់ផងដែរ។
សូមរំលឹកថា អង្គភាពប្រឆាំងអំពើពុករលួយ បានផ្ញើលិខិតចំហមួយជូនលោក រៀល ខេមរិន្ទ្រ កាលពីចុងខែកក្កដា។ លិខិតចំហនេះ មានគោលដៅសុំការបំភ្លឺពីតំណាងរាស្ត្របក្សប្រឆាំង ចំពោះការចោទប្រកាន់ថាបានកេងប្រវ័ញ្ចប្រាក់ចំនួន៥ម៉ឺន៥ពាន់ដុល្លារ ពីការរៀបចំដំណើរទៅមើលបង្គោលព្រំដែន។ អង្គភាពប្រឆាំងអំពើពុករលួយស្នើឲ្យលោក រៀល ខេមរិន្ទ្រ ធ្វើការបំភ្លឺ ដោយភ្ជាប់មកជាមួយនូវឯកសារនានាសម្រាប់បញ្ជាក់ ដើម្បីឲ្យអង្គភាពប្រឆាំងអំពើពុករលួយវាយតម្លៃមុននឹងសម្រេចបន្តនីតិវិធីរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ