រដ្ឋាភិបាលប្រកាសឲ្យអ្នកកាន់អាជ្ញាប័ណ្ណ ធ្វើសេវាកម្មអគ្គិសនីនៅទូទាំងប្រទេសគិតគូចុះថ្លៃ
រដ្ឋាភិបាល តាមរយៈអាជ្ញាធរអគ្គិសនីកម្ពុជា បានប្រកាសឲ្យអ្នកកាន់អាជ្ញាប័ណ្ណ ធ្វើសេវាកម្មអគ្គិសនី ក្នុងប្រទេសកម្ពុជា នៅតំបន់ផ្សេងៗ ក្រៅពីតំបន់របស់អគ្គិសនីកម្ពុជា ត្រូវមានកាតព្វកិច្ចផ្គត់ផ្គង់អគ្គិសនីផ្ទាល់ជូនបន្ទប់ជួលឲ្យកម្មករ កម្មការនី ព្រមទាំងប្រជាពលរដ្ឋក្រីក្រ ដែលប្រើអគ្គិសនីតិច ដើម្បីឲ្យគេអាចទទួលបានអត្រាថ្លៃអគ្គិសនី ដែលកំណត់ដោយអាជ្ញាធរអគ្គិសនីកម្ពុជា តាមតំបន់នីមួយៗ។ អាជ្ញាធរអគ្គិសនីកម្ពុជា ក៏បានប្រកាសថា នៅឆ្នាំ២០១៦ នៅតំបន់ផ្គត់ផ្គង់របស់សេវាករឯកជនទាំងអស់ ដែលភ្ជាប់ពីប្រភពបណ្តាញជាតិរួច នឹងត្រូវបញ្ចុះថ្លៃលក់អគ្គិសនី មកត្រឹម ៨០០ រៀល ក្នុង ១ គីឡូវ៉ាត់ម៉ោង ហើយបន្ទប់ជួលឲ្យកម្មករ-កម្មការនី ព្រមទាំងប្រជាពលរដ្ឋក្រីក្រ ដែលប្រើប្រាស់អគ្គិសនី មិនលើសពី ១០ គីឡូវ៉ាត់ម៉ោង ក្នុង ១ ខែ នឹងត្រូវបង់ថ្លៃតែ ៤៨០ រៀល ក្នុងមួយគីឡូវ៉ាត់ម៉ោង។
ចុះផ្សាយនៅថ្ងៃ៖
ស្តាប់ - ០៣:១២
ជានយោបាយថ្មីមួយទៀត របស់រដ្ឋាភិបាល ក្នុងការជួយដល់ប្រជាពលរដ្ឋក្រីក្រ តាមរយៈការបញ្ចុះតម្លៃអគ្គិសនី នៅទូទាំងប្រទេស។ នោះគឺរដ្ឋាភិបាល បានជូនដំណឹងទៅ អ្នកកាន់អាជ្ញាប័ណ្ណ ធ្វើសេវាកម្មអគ្គិសនី នៅទូទាំងប្រទេស ឲ្យគិតគូ បញ្ចុះតម្លៃអគ្គិសនី ដល់បន្ទប់ជួល ពិសេសកម្មករកម្មការនី ព្រមទាំងប្រជាពលរដ្ឋក្រីក្រ ដែលប្រើអគ្គិសនីតិច។
ក្នុងលិខិតចុះថ្ងៃទី៤កុម្ភៈ ចុះហត្ថលេខាដោយលោក ទី នរិន្ទ ប្រធានអាជ្ញាធរអគ្គិសនីកម្ពុជា បង្ហាញថា បច្ចុប្បន្ន អគ្គិសនីកម្ពុជា បានចាប់ផ្តើមអនុវត្តយ៉ាងសស្រាក់សស្រាំ ក្នុងការបន្តចរន្តផ្ទាល់ ដើម្បីផ្គត់ផ្គង់អគ្គិសនីជូនលំនៅដ្ឋានប្រជាពលរដ្ឋក្រីក្រ ផ្ទះជួល និងបន្ទប់ជួល ជាពិសេសបន្ទប់ជួលឲ្យកម្មករកម្មការនី ដែលកំពុងបម្រើការងារនៅតាមរោងចក្រនានា។ ដូចគ្នានេះដែរ អ្នកកាន់អាជ្ញាប័ណ្ណទាំងអស់ ដែលកំពុងធ្វើសេវាកម្មផ្គត់ផ្គង់អគ្គិសនីនៅតំបន់ផ្សេងៗក្រៅពីតំបន់របស់អគ្គិសនីកម្ពុជា មានកាតព្វកិច្ចផ្គត់ផ្គង់អគ្គិសនីផ្ទាល់ ជូនបន្ទប់ជួលឲ្យកម្មករកម្មការនី ព្រមទាំងប្រជាពលរដ្ឋក្រីក្រ ដែលប្រើអគ្គិសនីតិច ដើម្បីឲ្យគេអាចទទួលបានអត្រាថ្លៃអគ្គិសនី ដែលកំណត់ដោយអាជ្ញាធរអគ្គិសនីកម្ពុជា តាមតំបន់នីមួយៗ។
ក្នុងលិខិតដដែល អាជ្ញាធរអគ្គិសនីកម្ពុជា បានបញ្ជាក់ថា នៅឆ្នាំ២០១៦ នៅតំបន់ផ្គត់ផ្គង់របស់សេវាករឯកជនទាំងអស់ ដែលភ្ជាប់ពីប្រភពបណ្តាញជាតិរួច នឹងត្រូវបញ្ចុះថ្លៃលក់អគ្គិសនី មកត្រឹម ៨០០ រៀល ក្នុង ១ គីឡូវ៉ាត់ម៉ោង ហើយបន្ទប់ជួលឲ្យកម្មករ-កម្មការនី ព្រមទាំងប្រជាពលរដ្ឋក្រីក្រ ដែលប្រើប្រាស់អគ្គិសនី មិនលើសពី ១០ គីឡូវ៉ាត់ម៉ោង ក្នុង ១ ខែ នឹងត្រូវបង់ថ្លៃតែ ៤៨០ រៀល ក្នុងមួយគីឡូវ៉ាត់ម៉ោង។
អាជ្ញាធរអគ្គិសនីកម្ពុជា ក៏បានប្រកាសថា នឹងធ្វើការត្រួតពិនិត្យបន្ថែម និងទទួលនូវការតវ៉ានានា ដែលអ្នកប្រើប្រាស់ជួបប្រទះនូវភាពមិនប្រក្រតីក្នុងបញ្ហាថ្លៃលក់ ថ្លៃភ្ជាប់ចរន្ត និងប្រាក់កក់។ ការខកខាន ឬការបណ្តាលឲ្យមានករណីមិនប្រក្រតីនៅក្នុងតំបន់ផ្គត់ផ្គង់អគ្គិសនីរបស់សេវាករឯកជនណាមួយ ត្រូវចាត់ទុកថា បានរំលោភលើលក្ខខណ្ឌអាជ្ញាប័ណ្ណ ដែលត្រូវដាក់ពិន័យតាមការកំណត់របស់ច្បាប់ស្តីពីអគ្គិសនីនៃព្រះរាជាណាចក្រកម្ពុជា។
លិខិតរបស់អាជ្ញាធរអគ្គិសនីកម្ពុជា ស្តីពីករណីការផ្គត់ផ្គង់អគ្គិសនី ជូនលំនៅដ្ឋានប្រជាពលរដ្ឋក្រីក្រ ផ្ទះជួល និងបន្ទប់ជួល នៅតំបន់ផ្សេងៗក្រៅពីតំបន់របស់អគ្គិសនីកម្ពុជា ត្រូវបានធ្វើឡើងបន្ទាប់ពីអគ្គិសនីកម្ពុជា EDC បានអនុវត្តតាមអនុសាសន៍ណែនាំរបស់លោកនាយករដ្ឋមន្ត្រី ហ៊ុនសែន លើការបញ្ចុះតម្លៃភ្លើងអគ្គិសនី នៅបន្ទប់ជួល នៅភ្នំពេញ តម្លៃត្រឹមតែ ៦១០ រៀល ក្នុងមួយគីឡូវ៉ាត់ម៉ោង សម្រាប់អ្នកប្រើប្រាស់ក្រោម ៥០ គីឡូវ៉ាត់ ក្នុងមួយខែ។ ចាប់ពីថ្ងៃទី២៩មករា អគ្គិសនីកម្ពុជាបានអនុវត្តជំហានទី១ ក្នុងការតភ្ជាប់ចរន្ដជូនកម្មករ-កម្មការនី ដែលជួលផ្ទះជួលបន្ទប់ ក្នុងខណ្ឌអាទិភាព៣ គឺខណ្ឌឬស្សីកែវ ខណ្ឌដង្កោ និងខណ្ឌមានជ័យ។ ជាលទ្ធផល គិតចាប់ពីថ្ងៃទី២៩ ខែមករា មកដល់ល្ងាចថ្ងៃទី៤ ខែកុម្ភៈ ឆ្នាំ២០១៥ អគ្គិសនីកម្ពុជា បានតភ្ជាប់បណ្ដាញចរន្ដជូនបន្ទប់ជួលបានប្រមាណជាង ៤ ពាន់បន្ទប់។ អាជ្ញាធរ ប្រកាសថា ការងារតបណ្ដាញទឹក ក៏នឹងត្រូវចាប់ផ្តើម នាពេលឆាប់ៗខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ