គ្រោះថ្នាក់ចរាចរណ៍ផ្តាច់ជីវិតមនុស្សអស់ ៤៩នាក់នៅក្នុងអំឡុងបុណ្យចូលឆ្នាំខ្មែរ
គ្រោះថ្នាក់ចរាចរណ៍បានផ្តាច់ជីវិតមនុស្សអស់៤៩នាក់ និងរបួសជាង៥០០ នៅក្នុងអំឡុងបុណ្យចូលឆ្នាំខ្មែរកន្លងមកនេះ។ ខេត្តបាត់ដំបង គឺជាខេត្តដែលមានគ្រោះថ្នាក់ចរាចរណ៍ច្រើនជាងគេ នៅឆ្នាំនេះ។
ចុះផ្សាយនៅថ្ងៃ៖
គ្រោះថ្នាក់ចរាចរណ៍បានសម្លាប់មនុស្ស៤៩នាក់ និងបង្កអោយរបួស ៥៣០នាក់ នៅក្នុងអំឡុងពេលបុណ្យចូលឆ្នាំខ្មែរ នាពេលកន្លងមកនេះ។ នេះបើយោងតាមរបាយការណ៍ដំបូងរបស់គណៈកម្មការជាតិសុវត្ថិភាពចរាចរណ៍ ដែលចេញផ្សាយ នៅថ្ងៃអាទិត្យ ទី១៨ខែមេសានេះ។
លោកអ៊ឹង ជុនហួរ អគ្គលេខាធិការនៃគណៈកម្មការជាតិសុវត្ថិភាពចរាចរណ៍បានថ្លែងប្រាប់ នៅថ្ងៃអាទិត្យនេះថា គ្រោះថ្នាក់ចរាចរណ៍ពេលបុណ្យចូលឆ្នាំខ្មែរក្នុងក្របខ័ណ្ឌថ្នាក់ជាតិ ត្រូវបានគេគិតគូរសម្រាប់រយៈពេល៥ថ្ងៃ ពោលគឺ គេរាប់បូកបញ្ចូល១ថ្ងៃមុនបុណ្យចូលឆ្នាំ និង១ថ្ងៃក្រោយបុណ្យចូលឆ្នាំបន្ថែមទៀត។ ក្នុងអំឡុងរយៈពេល៥ថ្ងៃនេះ គ្រោះថ្នាក់ចរាចរណ៍បានសម្លាប់មនុស្ស៤៩នាក់ និងបង្កអោយរបួសចំនួន ៥៣០នាក់ ក្នុងនោះមានអ្នករបួសធ្ងន់ចំនួនជិត៣០០នាក់។ បើប្រៀបធៀបទៅនឹងរយៈពេលដូចគ្នា កាលពីបុណ្យចូលឆ្នាំខ្មែរឆ្នាំមុន ចំនួនអ្នកស្លាប់ដោយសារគ្រោះថ្នាក់ចរាចរណ៍មានការថយចុះចំនួនបីនាក់ ប៉ុន្តែចំនួនអ្នករងរបួសមានការកើនឡើងច្រើនជាងឆ្នាំមុនប្រមាណជា៥០ នាក់។
បើផ្អែកលើតួលេខខាងលើនេះ គេសង្កេតឃើញថា ចំនួនគ្រោះថ្នាក់ចរាចរណ៍ នៅក្នុងប្រទេសកម្ពុជា នៅរដូវបុណ្យចូលឆ្នាំខ្មែរនៅមិនទាន់មានការថយចុះច្រើននៅឡើយទេ បើទោះបីជាមានកិច្ចខិតខំប្រឹងប្រែងរបស់អាជ្ញាធរយ៉ាងណាក៏ដោយ។
លោក អ៊ឹង ជុនហួរ អគ្គលេខាធិការនៃគណៈកម្មការជាតិសុវត្ថិភាពចរាចរណ៍បានបន្តបញ្ជាក់ទៀត ថា នៅក្នុងពេលបុណ្យចូលឆ្នាំខ្មែរ ឆ្នាំនេះ ខេត្តបាត់ដំបង គឺជាខេត្តដែលមានអ្នកស្លាប់ដោយសារគ្រោះថ្នាក់ចរាចរណ៍ច្រើនជាងគេ បើប្រៀបធៀបទៅនឹងខេត្តក្រុងដទៃៗទៀត។ លទ្ធផលដំបូងរបស់គណៈកម្មការជាតិសុវត្ថិភាពចរាចរណ៍បានអោយដឹងថា ខេត្តបាត់ដំបងមានគ្រោះថ្នាក់ចរាចរណ៍កើតឡើង៣០ករណីដែលបណ្តាលអោយ មនុស្សស្លាប់ចំនួន១០នាក់ក្នុងចំណោមមនុស្សស្លាប់៤៩នាក់ក្នុង ក្របខ័ណ្ឌទូទាំងប្រទេស។ រហូតមកដល់ពេលនេះ គេនៅមិនទាន់ដឹងទេថា តើខេត្តណាឬក្រុងណាមានមនុស្សស្លាប់ និងរងរបួសតិចជាងគេនោះ។
លោក អ៊ឹង ជុនហួរ អគ្គលេខាធិការនៃគណៈកម្មការជាតិសុវត្ថិភាពចរាចរណ៍បានបញ្ជាក់ទៀតថា គ្រោះថ្នាក់ចរាចរណ៍ភាគច្រើនដែលកើតឡើង នៅរដូវចូលឆ្នាំកន្លងមកនេះ គឺបណ្តាលមកពីមូលហេតុបីយ៉ាងធំៗ។ ទី១៖ គឺការបើកបរហួសល្បឿនកំណត់។ ទី២៖ គឺការមិនយល់ដឹងពីច្បាប់ចរាចរណ៍ និងទី៣៖ គឺការប្រើប្រាស់គ្រឿងស្រវឹង។
គ្រោះថ្នាក់ចរាចរណ៍នៅក្នុងប្រទេស កម្ពុជាបាន និងកំពុងផ្តាច់ជីវិតមនុស្ស និងធ្វើអោយសង្គមជាតិខាតបង់ប្រាក់កាសយ៉ាងច្រើនសន្ធឹកសន្ធាប់ពីមួយ ឆ្នាំទៅមួយឆ្នាំ។
កាលពីឆ្នាំ២០០៩កន្លងមក ប្រទេសកម្ពុជាបានបាត់បង់ថវិកាប្រមាណជា២៥០លានដុល្លារដោយសារ គ្រោះថ្នាក់ចរាចរណ៍ និងមានមនុស្សស្លាប់១៧០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ