លោក រ៉ុង ឈុន ប្តឹងរដ្ឋមន្ត្រីក្រសួងអប់រំ ទៅតុលាការដើម្បីសុំសិទ្ធិស្របច្បាប់មកវិញ
លោក រ៉ុង ឈុន ដែលជាសមាជិកម្នាក់ ក្នុងចំណោមសមាជិកនៃសមាគមគ្រូបង្រៀនកម្ពុជាឯករាជ្យ១០នាក់ផ្សេងទៀត បានសម្រេច ដាក់ពាក្យបណ្ដឹងរួមគ្នាទៅតុលាការក្រុងភ្នំពេញនៅថ្ងៃពុធនេះ ក្នុងសំណុំរឿងបញ្ឈប់ពួកគេពីក្របខណ្ឌអប់រំកាលពីមួយឆ្នាំមុន។ ដោយឡែក អ្នកនាំពាក្យក្រសួងអប់រំបានឆ្លើយតបថា ក្រសួងបញ្ឈប់គ្រូៗទាំងនោះ គឺស្របទៅតាមច្បាប់អប់រំ។
ចុះផ្សាយនៅថ្ងៃ៖
ស្តាប់ - ០១:៣៧
កម្មវត្ថុពីរចំណុច ដែលក្រុមគ្រូបង្រៀនស្នើសុំទៅតុលាការក្រុងភ្នំពេញ តាមរយៈការដាក់ពាក្យនៅថ្ងៃពុធនេះ គឺសុំឲ្យផ្ដល់ក្របខណ្ឌក្រសួងអប់រំឡើងវិញ និងបដិសេធចោលនូវប្រកាសស្ដីពីការលុបឈ្មោះបុគ្គលិកអប់រំ ចុះថ្ងៃទី៣០មករាឆ្នាំ២០១៨។ ប្រកាសពេលនោះ រដ្ឋមន្ត្រីក្រសួងអប់រំលោក ហង់ ជួនណារ៉ុន បានគូសបញ្ជាក់ថា ដោយសារសាមីជនអវត្តមានគ្មានច្បាប់អនុញ្ញាត។
ចំណែក លោក រ៉ុង ឈុន អតីតប្រធានសមាគមគ្រូបង្រៀនឯករាជ្យកម្ពុជា ត្រូវបានរដ្ឋមន្ត្រីក្រសួងអប់រំ លោក ហង់ ជួនណារ៉ុន លុបឈ្មោះចេញពីនាយកដ្ឋានស្រាវជ្រាវវិទ្យាសាស្ត្រ នៃក្រសួងអប់រំ ចាប់ពីថ្ងៃទី១ ខែកុម្ភៈ ឆ្នាំ២០១៨។
លោក រ៉ុង ឈុន លើកឡើងថា មុនដាក់ពាក្យបណ្ដឹងនៅថ្ងៃនេះ លោកបានដាក់ពាក្យសុំបម្រើការងារវិញ នៅថ្ងៃទី៣ មករាឆ្នាំ២០១៨ ហើយសុំចាប់ផ្ដើមបំពេញកាតព្វកិច្ច នៅដើមខែកុម្ភៈឆ្នាំដដែលនោះ ។ ប៉ុន្តែក្រសួងបែរជាសម្រេចលុបឈ្មោះលោក រ៉ុង ឈុន ចេញពីក្របខណ្ឌទៅវិញ។
រូបភាពនេះលោកចាត់ទុកថា ជារឿងអយុត្តិធម៌តាមរយៈការមិនអើពើក្នុងការដោះស្រាយ និងការលុបឈ្មោះគ្រូបង្រៀនជាង១០នាក់ចេញពីក្របខណ្ឌក្រសួងកាលពីដើមឆ្នាំ២០១៨ដោយហេតុផលបោះបង់ការងារ និងអវត្តមានគ្មានច្បាប់អនុញ្ញាត។ លោក រ៉ុង ឈុន ថ្លែងថា លោកបានមើលឃើញពីភាពស៊ីសង្វាក់គ្នា នៃការបញ្ឈប់ក្រុមគ្រូបង្រៀន ទៅនឹងការរំលាយគណបក្សសង្គ្រោះជាតិ ដែលជាលេសនយោបាយ ច្រើនប្រព្រឹត្តខុសវិន័យនៅក្នុងវិស័យអប់រំ។
ជាមួយគ្នានេះ លោក រស់ សុវាចា អ្នកនាំពាក្យក្រសួងអប់រំបានអះអាងថា រាល់សេចក្ដីសម្រេចរបស់ក្រសួងអប់រំ គឺពុំមានជាប់ទាក់ទងទៅនឹងនយោបាយឡើយ តែជាការអនុវត្តច្បាប់អប់រំមានលក្ខណៈដាច់ដោយឡែកតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ