លោក សម រង្ស៊ី ចេញគោលដៅ៥ យកអ្វីគ្រប់យ៉ាងឲ្យរាស្រ្តខ្មែរវិញ ក្រោយចោទប្រកាន់រដ្ឋអំណាចលួចប្លន់
នៅយប់មិញនេះ លោក សម រង្ស៊ី ប្រធានគណបក្សសង្រ្គោះជាតិតាមរយៈទំព័រហ្វេសប៊ុករបស់លោកពីក្រៅប្រទេស បានបង្ហាញនូវគោលដៅចំនួន៥ ចំណុចរបស់គណបក្សក្នុងការប្រគល់សងអ្វីគ្រប់យ៉ាងមកឲ្យប្រជារាស្រ្តខ្មែរវិញ។ ការចេញគោលដៅទាំង៥ចំណុចនេះ គឺដោយសារលោកសម រង្ស៊ី ចោទប្រកាន់រដ្ឋអំណាចខ្មែរសព្វថ្ងៃ ថាមានបរទេសនៅពីក្រោយខ្នងហើយបានលួចប្លន់អ្វីៗទាំងអស់ពីប្រជារាស្ត្រខ្មែរ។
ចុះផ្សាយនៅថ្ងៃ៖
ស្តាប់ - ០២:១៨
គោលដៅទាំង៥ចំណុចរបស់លោកសម រង្ស៊ី នេះ រួមមានដូចជាការប្រគល់សងប្រទេសកម្ពុជា ជូនមកប្រជារាស្ត្រខ្មែរវិញ ដែលជាម្ចាស់ទឹក ម្ចាស់ដី តែមួយគត់។ ប្រគល់សងទ្រព្យសម្បត្តិជាតិ ជូនមកប្រទេសជាតិវិញ ដូចជាព្រៃឈើ រ៉ែ ភ្នំ បឹងបួរ ស្ទឹង ទន្លេ រហូតដល់ឆ្នេរសមុទ្រ និងកោះកណ្តាលសមុទ្រ ដើម្បីទុកគ្រប់គ្រងឲ្យបម្រើផលប្រយោជន៍ជាសាធារណៈ និងលើកស្ទួយជីវភាពរស់នៅរបស់ប្រជារាស្ត្រ។ ប្រគល់សងទ្រព្យសម្បត្តិរបស់ប្រជារាស្ត្រ ជូនមកប្រជារាស្ត្រវិញ ដែលជាម្ចាស់ដើម និងម្ចាស់ពិត លើផ្ទះសម្បែង ដីធ្លី ស្រែ ចំការ។ មួយទៀត គឺប្រគល់សងវាសនាប្រទេសកម្ពុជា ជូនមកប្រជារាស្ត្រខ្មែរវិញ ដែលជាអ្នកសម្រេចក្នុងឯករាជ្យភាពដ៏ពេញលេញ និងគោលដៅចុងក្រោយ គឺបញ្ឈប់ការអភិវឌ្ឍន៍ក្លែងក្លាយដូចសព្វថ្ងៃ ដែលបម្រើតែផលប្រយោជន៍ក្រុមគ្រួសារមេដឹកនាំពុករលួយ និងបក្សពួកមួយក្តាប់តូច ហើយរៀបចំឲ្យមានការអភិវឌ្ឍន៍ពិតប្រាកដ ដែលបម្រើផលប្រយោជន៍ប្រជារាស្ត្រខ្មែរទាំងមូល។
គោលដៅទាំង៥ចំណុចរបស់គណបក្សសង្រ្គោះជាតិ ដែលដាក់ចេញដោយលោកសម រង្ស៊ី នៅពេលនេះ គឺដោយសារលោកប្រមុខគណបក្សប្រឆាំង ដែលស្ថិតនៅក្រៅប្រទេសរូបនេះ បានលើកឡើងថា រដ្ឋអំណាចខ្មែរសព្វថ្ងៃមានបរទេសនៅពីក្រោយខ្នង ហើយបានលួចប្លន់អ្វីៗ ទាំងអស់ពីប្រជារាស្ត្រខ្មែរ។ លោក សម រង្ស៊ី ក៏បានស្នើឲ្យប្រជាពលរដ្ឋខ្មែរអ្នកស្រលាញ់ជាតិ និងស្រលាញ់យុត្តិធម៌គ្រប់រូប គាំទ្រ និងចូលរួមសកម្មភាពជាមួយគណបក្សសង្គ្រោះជាតិ ដើម្បីឲ្យប្រជារាស្ត្រខ្មែរបានសម្រេចគោលដៅទាំង ៥ ចំណុចនេះផងដែរ។
លោកផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តីកម្ពុជា បានប្រតិកម្មថា គោលដៅទាំង៥ចំណុចរបស់លោក សម រង្ស៊ី នេះ គឺគ្រាន់តែចង់ទាមទារការចាប់អារម្មណ៍ពីសំណាក់សាធារណជនតែប៉ុណ្ណោះ។ ជាមួយគ្នានេះ លោកក៏បានចាត់ទុកការលើកឡើងរបស់លោកសម រង្ស៊ី ថាជាភាសាបោកប្រាស់ចិត្តគំនិតរបស់ប្រជាពលរដ្ឋខ្មែរ។ បើទោះបីប្រធានបក្សប្រឆាំងចោទរដ្ឋាភិបាលថាមានបរទេសនៅពីក្រោយខ្នងក៏ដោយ ក៏លោកផៃ ស៊ីផាន អះអាងថា រដ្ឋាភិបាលមិនមានវិធានការណាមួយចំពោះលោកសម រង្ស៊ី នោះទេ។
សូមបញ្ជាក់ថា នៅពេលបច្ចុប្បន្ននេះ លោកសម រង្ស៊ី កំពុងស្នាក់នៅក្នុងប្រទេសបារាំង បន្ទាប់ពីតុលាការខ្មែរបានចេញដីកោះហៅលោកជាច្រើនដងលើសំណុំរឿងផ្សេងៗគ្នាស្ទើររាប់មិនអស់។ ហើយថ្មីៗនេះទៀតសោត លោកសម រង្ស៊ី ក៏កំពុងប្រឈមមុខនឹងតុលាការជាមួយលោកនាយករដ្ឋមន្រ្តី ហ៊ុន សែន ផងដែរ ជុំវិញការអត្ថាធិប្បាយរបស់លោកតាមរយៈបណ្តាញសង្គមហ្វេសប៊ុក ដែលបានចោទរដ្ឋអំណាចរបស់លោកហ៊ុន សែន ថាជាអ្នករៀបចំអំពើភេរវកម្មបាញ់សម្លាប់លោក បណ្ឌិត កែម ឡី។ ចំពោះសំណុំរឿងនេះ លោកសម រង្ស៊ី ត្រូវបានតុលាការក្រុងភ្នំពេញបានចេញដីកាកោះហៅឱ្យចូលខ្លួនឆ្លើយបំភ្លឺនៅថ្ងៃទី ១៩ សីហា ក្នុងសប្តាហ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ