លោក សម រង្ស៊ី បង្ហាញនយោបាយបង្កើតការងារតាមបណ្ដាញសង្គម
លោក សម រង្ស៊ី ប្រធានគណបក្សសង្គ្រោះជាតិ ដែលកំពុងតែមានវត្តមាននៅក្រៅប្រទេស បានបង្ហាញនយោបាយបង្កើតការងារតាមបណ្ដាញសង្គម។ បើតាមលោក សម រង្ស៊ី ដើម្បីបង្កើតការងារឲ្យពលរដ្ឋ មានកត្តា២ជាគន្លឹះ។ ទី១ គឺផលិតភាព និងទី២ គឺតម្លៃបន្ថែម។ នៅថ្ងៃអង្គារម្សិលមិញនេះ លោក សម រង្ស៊ី សរសេរភាគអំពីការបង្កើនផលិតភាព។ តើនយោបាយរបស់ប្រមុខបក្សប្រឆាំងមានអ្វីខ្លះ ដើម្បីបង្កើនផលិតភាពនៃពលកម្មនៅកម្ពុជា?
ចុះផ្សាយនៅថ្ងៃ៖
ស្តាប់ - ០២:១១
តាំងពីខែកញ្ញាមក លោក សម រង្ស៊ី ប្រធានគណបក្សសង្គ្រោះជាតិ បានសរសេរនៅលើបណ្ដាញសង្គមអំពីនយោបាយបង្កើតការងារ។ ដោយសរសេរម្ដងមួយភាគៗ ប្រមុខបក្សជំទាស់ បានពន្យល់លម្អិតអំពីស្ថានភាពគ្មានការងារធ្វើនៅកម្ពុជា ក៏ដូចជាគន្លឹះសំខាន់ៗចំនួនពីរ ដើម្បីបង្កើតការងារឲ្យពលរដ្ឋ។ បើតាមលោក សម រង្ស៊ី គន្លឹះសំខាន់ទាំងពីរនោះ គឺ ផលិតភាព និងតម្លៃបន្ថែម។
ដំបូងនិយាយពីផលិតភាព។ ប្រមុខបក្សប្រឆាំងរូបនេះ លើកឡើងថា ផលិតភាព ជាកត្តាកំណត់ជោគជ័យសេដ្ឋកិច្ចសម្រាប់សហគ្រាសនីមួយៗ ក៏ដូចជាសម្រាប់ប្រទេសនីមួយៗដែរ។ ការកើនឡើងនៃផលិតភាព នាំមកនូវការកើនឡើងនៃប្រាក់ចំណូលនិងប្រាក់ចំណេញ ក៏ដូចជាការកើនឡើងនៃជីវភាពរស់នៅរបស់ប្រជាពលរដ្ឋ។ នេះបើតាមលោក សម រង្ស៊ី។
ចុងក្រោយនេះ គឺនៅថ្ងៃអង្គារទី២៩ធ្នូ លោក សម រង្ស៊ី បានសរសេរពន្យល់បន្តអំពីផលិតភាពនៃពលកម្មកម្ពុជា ដោយផ្តោតសំខាន់លើការបង្កើនផលិតភាព។ ប្រមុខដឹកនាំបក្សជំទាស់អះអាងថា ដើម្បីបង្កើនផលិតភាពនៃពលកម្មនៅប្រទេសកម្ពុជា គេត្រូវបណ្ដុះបណ្ដាលធនធានមនុស្ស ឲ្យមានជំនាញបច្ចេកទេស ស្របតាមសេចក្ដីត្រូវការរបស់ទីផ្សារអន្ដរជាតិ, រៀបចំប្រព័ន្ធស្រាវជ្រាវបច្ចេកវិទ្យាថ្មីមកប្រើប្រាស់ និងជំរុញឲ្យបង្កើនទុនវិនិយោគលើឧបករណ៍ សម្ភារៈ និងបច្ចេកទេសទំនើបបំផុតក្នុងផលិតកម្មកែច្នៃជាដើម។
ក្នុងវិស័យដែលបានលើកឡើងនេះ លោក សម រង្ស៊ី អះអាងថា រដ្ឋាភិបាលកម្ពុជាមិនអាចធ្វើបានត្រឹមត្រូវទេ ដោយសារខ្វះចក្ខុវិស័យ ខ្វះឆន្ទៈនយោបាយ ខ្វះសមត្ថភាព និងខ្វះភាពសុចរិត។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ដ្រី មិនឆ្លើយតបនឹងការចោទប្រកាន់របស់ប្រមុខបក្សប្រឆាំងទេ ដោយអះអាងថា ដូច្នេះថាវាមិនមានសារៈប្រយោជន៍។ សម្រាប់អ្នកនាំពាក្យរូបនេះ អ្វីដែលលោក សម រង្ស៊ី លើកឡើង គឺជាការងារដែលរដ្ឋាភិបាលកម្ពុជា បានធ្វើរួចជាស្រេចទៅហើយ។ កម្ពុជា ផលិតកម្មករដែលមានវិជ្ជាជីវៈ ដើម្បីពួកគេអាចដើរចេញទៅប្រកបការងារនៅបរទេស ឬបើពុំដូច្នោះ ពួកគេអាចចាំទទួលការវិនិយោគ ដើម្បីធ្វើការនៅក្នុងប្រទេសតែម្ដងក៏បាន។ នេះបើតាមលោក ផៃ ស៊ីផាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ