ហេតុអ្វីបក្សកាន់អំណាចមិនចង់ឲ្យលោកសម រង្ស៊ី ទាក់ទងនឹងបក្សសង្គ្រោះជាតិ?
ចុះផ្សាយនៅថ្ងៃ៖
ស្តាប់ - ០៣:៤៧
កាលពីសប្ដាហ៍មុន ប្រមុខបក្សកាន់អំណាចបានជំរុញសមាជិកសភារបស់ខ្លួន ស្នើធ្វើវិសោធនកម្មច្បាប់ស្ដីពីគណបក្សនយោបាយម្ដងទៀត។ ប្រមុខបក្សកាន់អំណាចចង់ធ្វើវិសោធនកម្មច្បាប់នេះជាថ្មី ព្រោះលោកមិនចង់ឲ្យលោក សម រង្ស៊ី ទាក់ទងជាមួយគណបក្សសង្គ្រោះជាតិ។ តើនេះជាមូលហេតុតែមួយគត់ នៃបំណងចង់ធ្វើវិសោធនកម្មច្បាប់ស្ដីពីគណបក្សនយោបាយរបស់ប្រមុខបក្សកាន់អំណាចឬយ៉ាងណា?
ការលាលែងចេញពីតំណែង មិនអាចកាត់ផ្ដាច់ លោក សម រង្ស៊ី ចេញពីគណបក្សសង្គ្រោះជាតិឡើយ។ រហូតមកទល់ពេលនេះ គេកត់សម្គាល់ឃើញថា លោក សម រង្ស៊ី នៅតែបង្ហាញទំនាក់ទំនងជិតស្និទ្ធជាមួយបក្សប្រឆាំងដដែល។
តាមរយៈទំព័រហ្វេសប៊ុក លោក សម រង្ស៊ី បន្តបង្ហោះសារគាំទ្រគណបក្សសង្គ្រោះជាតិ និងព័ត៌មាននានាទាក់ទងនឹងគណបក្សនេះ។ នៅមុនពេលបោះឆ្នោតក្រុមប្រឹក្សាឃុំសង្កាត់ លោក សម រង្ស៊ី បានចេញមុខអំពាវនាវឲ្យប្រជាពលរដ្ឋបោះឆ្នោតគាំទ្រគណបក្សសង្គ្រោះជាតិ។ លោកថែមទាំងបានចំណាយពេលឆ្លើយតបទៅនឹងសាររបស់ពលរដ្ឋលើបណ្ដាញសង្គមម្ដងមួយៗ បញ្ជាក់ប្រាប់ថា គណបក្សសង្គ្រោះជាតិមិនមែនមានលេខរៀងទី៧ដូចការបោះឆ្នោតជាតិឆ្នាំ២០១៣ទៀតទេ គឺលេខរៀងផ្សេងគ្នាទៅតាមឃុំសង្កាត់នីមួយៗជាដើម។
មិនមែនមានតែលោក សម រង្ស៊ី តែឯងទេ ដែលបង្ហាញជំហរជិតស្និទ្ធនឹងគណបក្សសង្គ្រោះជាតិ។ គណបក្សសង្គ្រោះជាតិខ្លួនឯង ក៏នៅតែគោរពលើកតម្កើងលោក សម រង្ស៊ី ដដែល បើទោះបីជាពេលនេះ លោកលែងជាប្រមុខដឹកនាំគណបក្សប្រឆាំងនេះហើយក៏ដោយ។ កាលពីពេលឃោសនាបោះឆ្នោតកន្លងទៅនេះ គណបក្សសង្គ្រោះជាតិបានប្រើប្រាស់ឃ្លីបសំឡេងរបស់លោក សម រង្ស៊ី ក្នុងការឃោសនា។ មិនត្រឹមតែប៉ុណ្ណោះ រាល់ការជួបជុំផ្សេងៗរបស់គណបក្ស លោក សម រង្ស៊ី តែងតែមានវត្តមានជាប់ជានិច្ច តាមរយៈ Video Conference។
ទំនាក់ទំនងរវាងលោក សម រង្ស៊ី និងគណបក្សសង្គ្រោះជាតិដូច្នេះ បានធ្វើឲ្យលោក ហ៊ុន សែន ប្រមុខគណបក្សកាន់អំណាចមិនសូវសប្បាយចិត្តទេ។ ដូច្នេះហើយទើបបានជាលោក ជំរុញឲ្យសមាជិកសភារបស់ខ្លួន ស្នើធ្វើវិសោធនកម្មច្បាប់ស្ដីពីគណបក្សនយោបាយម្ដងទៀត ដើម្បីកាត់ផ្ដាច់ទំនាក់ទំនងរវាងលោក សម រង្ស៊ី និងគណបក្សប្រឆាំង។
យ៉ាងណាក៏ដោយ អ្នកវិភាគនយោបាយមើលឃើញថា នេះមិនមែនជាហេតុផលពិតប្រាកដនៃបំណងធ្វើវិសោធនកម្មច្បាប់ស្ដីពីគណបក្សនយោបាយជាថ្មីទៀតទេ។ បើតាមក្រុមអ្នកវិភាគ ប្រមុខបក្សកាន់អំណាចមិនចង់ឃើញលោក សម រង្ស៊ី ទាក់ទងជាមួយបក្សប្រឆាំងជារឿងមួយ។ ប៉ុន្តែសំខាន់ជាងនេះ គណបក្សប្រជាជនកម្ពុជា ទំនងជាបារម្ភថា ទំនាក់ទំនងនេះ អាចនឹងមានឥទ្ធិពលលើប្រជាប្រិយភាពរបស់គណបក្សសង្គ្រោះជាតិ នៅក្នុងការបោះឆ្នោតឆ្នាំ២០១៨ខាងមុខ។
គួរកត់សម្គាល់ថា ដើម្បីទាញលោក សម រង្ស៊ី ឲ្យឃ្លាតឆ្ងាញពីគណបក្សសង្គ្រោះជាតិ សមាជិកសភានៃគណបក្សប្រជាជន ធ្លាប់បានស្នើសុំធ្វើវិសោធនកម្មច្បាប់ស្ដីពីគណបក្សនយោបាយម្ដងរួចហើយ កាលពីខែកុម្ភៈកន្លងទៅ។ ការធ្វើវិសោធនកម្មលើកនោះ បានបង្ខំឲ្យលោក សម រង្ស៊ី លាលែងពីតំណែងប្រធានបក្ស។ ប៉ុន្តែទោះគ្មានតំណែងនៅក្នុងគណបក្សក៏ដោយ ក៏លោក សម រង្ស៊ី នៅតែពាក់ព័ន្ធជាមួយគណបក្សសង្គ្រោះជាតិដដែល ប្រៀបបានដូចជាស្រមោលអន្ទោលតាមប្រាណដូច្នោះដែរ។
សម្រាប់អ្នកវិភាគ ការព្រួយបារម្ភរបស់គណបក្សកាន់អំណាចគឺជារឿងត្រឹមត្រូវ។ ប៉ុន្តែក្នុងបរិបទឥឡូវនេះ អ្នកវិភាគមើលឃើញថា អ្នកគាំទ្របក្សប្រឆាំងផ្ដោតសំខាន់លើការផ្លាស់ប្ដូរ ជាជាងទៅលើបុគ្គល ឬក្បាលម៉ាស៊ីនដឹកនាំ។ មានន័យថា ទោះបីគណបក្សប្រឆាំងដឹកនាំដោយនរណា ក៏អ្នកគាំទ្រនៅតែបោះឆ្នោតឲ្យដដែល ព្រោះពួកគេស្រេកឃ្លានការផ្លាស់ប្ដូរ។ លទ្ធផលនៃការបោះឆ្នោតក្រុមប្រឹក្សាឃុំសង្កាត់ដែលទើបតែកន្លងផុតទៅ គឺជាភស្តុតាងស្រាប់។ នេះបើតាមការយល់ឃើញរបស់ក្រុមអ្នកវិភាគ។
រវាងការយល់ឃើញរបស់ក្រុមអ្នកវិភាគ និងគណបក្សកាន់អំណាច តើមួយណាត្រឹមត្រូវជាងមួយណា? គេទំនងជាត្រូវរង់ចាំរហូតដល់ការបោះឆ្នោតឆ្នាំ២០១៨ ទើបអាចឆ្លើយនឹងសំណួរនេះបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ