សង្គ្រោះជាតិ កំពុងព្យាយាមគាល់ព្រះមហាក្សត្រ ដើម្បីសុំព្រះរាជអន្តរាគមន៍
ថ្លែងក្នុងសន្និសីទកាសែត នៅស្នាក់ការកណ្តាលបក្ស នាព្រឹកថ្ងៃទី ១៥មិថុនានេះ លោកយ៉ែម បុញ្ញរិទ្ធិ មន្ត្រីជាន់ខ្ពស់គណបក្សសង្គ្រោះជាតិ បានបញ្ជាក់ថា គណបក្សបានធ្វើលិខិតមួយថ្វាយព្រះមហាក្សត្រ កាលពីម្សិលមិញ ដើម្បីសុំចូលគាល់ ក្នុងបំណងពិភាក្សា និងទូលថ្វាយពីបច្ចុប្បន្នភាពនៃកម្តៅនយោបាយក្នុងប្រទេសកម្ពុជា និងស្វែងរកព្រះរាជអន្តរាគមន៍ពីព្រះអង្គ។ ក្រៅពីនោះ គណបក្សប្រឆាំង ក៏បានបញ្ជាក់ថា ក្នុងរយៈពេល ១០ថ្ងៃនេះ គេទទួលបានស្នាមមេដៃប្រមាណជាង ២៦ម៉ឺនទៀត ពីពលរដ្ឋ ដើម្បីរៀបចំធ្វើញ្ញត្តិទី២ ហែថ្វាយព្រះមហាក្សត្រ នាពេលខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:០០
បន្ទាប់ពីមិនទាន់ទទួលបានព្រះរាជអន្តរាគមន៍ណាមួយនៅឡើយ ពីព្រះមហាក្សត្រ ក្រោយពីបានថ្វាយញ្ញត្តិលើកទី១ មានស្នាមមេដៃពលរដ្ឋប្រមាណ ១៧ម៉ឺនស្នាមមេដៃ - គណបក្សសង្គ្រោះជាតិ តាមរយៈមន្ត្រីជាន់ខ្ពស់របស់ខ្លួន បានបញ្ជាក់ថា នៅថ្ងៃទី ១៤មិថុនា បក្ស បានធ្វើលិខិតមួយ ថ្វាយព្រះមហាក្សត្រ ដើម្បីស្នើសុំចូលគាល់ព្រះអង្គ ក្នុងគោលដៅពិភាក្សា ពិគ្រោះ និងរាយការណ៍ពីស្ថានភាពនយោបាយក្នុងសង្គមនាពេលបច្ចុប្បន្ន។
លើសពីនេះ គណបក្សសង្គ្រោះជាតិ ដែលកំពុងព្យាយាមសង្គ្រោះមេដឹកនាំខ្លួនជាមុននោះ បានបញ្ជាក់ថា ចាប់ពីថ្ងៃទី ៥ ដល់ថ្ងៃទី ១៥ មិថុនានេះ គេប្រមូលបានស្នាមមេដៃពីពលរដ្ឋប្រមាណ ២៦ម៉ឺនស្នាមមេដៃបន្ថែមទៀត ដើម្បីធ្វើញ្ញត្តិលើកទី២ ថ្វាយព្រះមហាក្សត្រ។ ប៉ុន្តែមន្ត្រីជាន់ខ្ពស់ និងជាអ្នកនាំពាក្យរបស់បក្សប្រឆាំង បន្ថែមថា គេនៅមិនទាន់កំណត់ថ្ងៃ ដើម្បីធ្វើពិធីហែញ្ញត្តិនោះនៅឡើយទេ។
ជុំវិញសំណួររបស់អ្នកសារព័ត៌មាន ពីភាពមិនប្រក្រតី នៃការធ្វើកោសល្យវិច្ច័យស្នាមមេដៃរបស់ក្រសួងមហាផ្ទៃ លោកយ៉ែម បុញ្ញរិទ្ធ បានឆ្លើយថា គណបក្សមិនបានដឹងទេ ព្រោះថា ការធ្វើកោសល្យវិច្ច័យនេះ មិនមានការចូលរួមពិនិត្យជាមួយគ្នានោះឡើយ។
ក្រៅពីស្វែងរកព្រះរាជអន្តរាគមន៍ពីព្រះមហាក្សត្រ គណបក្សសង្គ្រោះជាតិ បានអះអាងថា គេទទួលបានការយកចិត្តទុកដាក់បន្ថែមពីមិត្តបរទេស។ ហើយចាប់ពីម៉ោង ១១ថ្ងៃត្រង់ ថ្ងៃទី ១៥មិថុនា លោកយ៉ែម បុញ្ញារិទ្ធិ បញ្ជាក់ថាមានស្ថាប័នបរទេសមួយចំនួន បានមកជួបពិភាក្សាផ្ទាល់ជាមួយលោកកឹម សុខា នៅទីស្នាក់ការកណ្តាលបក្ស ក្នុងរាជធានីភ្នំពេញ។
ជាការកត់សម្គាល់ តាំងពីថ្ងៃទី ២៦ឧសភាមក គណបក្សសង្គ្រោះជាតិ តែងមានសកម្មភាពជួបជុំជាមួយសកម្មជនរបស់ខ្លួន និងក៏មានផងដែរ នូវការរៀបចំពិធីសាសនាផ្សេងៗ។ ហើយនៅថ្ងៃទី ១៩មិថុនាខាងមុខ បក្សប្រឆាំង ប្រកាសថានឹងមានការរៀបចំពិធីសាសនាដ៏ធំ ក្នុងខេត្តសៀមរាប ជាបន្តទៀត។ ប៉ុន្តែពិធីនោះ ប្រហែលជាមិនមានវត្តមានរបស់ប្រធានស្តីទីគណបក្សលោកកឹម សុខានោះទេ។ លោកយ៉ែម បុញ្ញរិទ្ធិ អះអាងថា ប្រសិនបើគ្រាន់តែអភ័យឯកសិទ្ធិសភា ក៏គ្មានអ្នកគោរព ដូច្នេះតើឲ្យលោកកឹម សុខា នឹងអាចដើរហើរយ៉ាងម៉េចកើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ