លោកសមរង្ស៊ី៖ យុទ្ធនាការឃោសនាបោះឆ្នោត ត្រឹម ២១ថ្ងៃ និងហែក្បួនតែ ៤ ដង គ្រប់គ្រាន់ហើយ
ចំពោះមុខអ្នកគាំទ្រនៅប្រទេសបារាំង កាលពីល្ងាចថ្ងៃទី២១មីនា លោកសមរង្ស៊ី ប្រធានគណបក្សសង្គ្រោះជាតិ បានប្រកាសថា ការកំណត់ក្នុងច្បាប់បោះឆ្នោតតំណាងរាស្ត្រ ដែលរដ្ឋសភា បានអនុម័តកាលពីថ្ងៃទី១៩មីនាថា យុទ្ធនាការឃោសនាបោះឆ្នោត មានរយៈពេលត្រឹមតែ ២១ ថ្ងៃ រីការដើរហែក្បួនតាមផ្លូវពេលឃោសនាបោះឆ្នោត ត្រឹមតែ ៤ ដង គឺគ្រប់គ្រាន់ហើយ។ ទន្ទឹមនឹងនោះ លោកសមរង្ស៊ី ក៏បានបញ្ជាក់ជាថ្មីនូវគោលដៅរបស់គណបក្សសង្គ្រោះជាតិ គឺការផ្លាស់ប្តូរ តាមរយៈការបោះឆ្នោត។
ចុះផ្សាយនៅថ្ងៃ៖
ស្តាប់ - ០២:២២
ក្នុងកិច្ចប្រជុំជូនព័ត៌មាន ស្តីពី ព្រឹត្តិការណ៍នយោបាយចុងក្រោយនៅកម្ពុជា កាលពីថ្ងៃទី២១មីនា នៅប្រទេសបារាំង លោកសមរង្ស៊ី ប្រធានគណបក្សសង្គ្រោះជាតិ បានសម្តែងការពេញចិត្ត លើការកំណត់ក្នុងច្បាប់បោះឆ្នោតតំណាងរាស្ត្រ ដែលរដ្ឋសភាទើបអនុម័តកាលពីថ្ងៃទី១៩មីនា ជាមួយច្បាប់គជប។ នោះគឺការកំណត់ពីយុទ្ធនាការឃោសនាបោះឆ្នោត រយៈពេល ២១ ថ្ងៃ ហើយហែក្បួន ត្រឹមតែ ៤ ដងប៉ុណ្ណោះ។
តាមលោកសមរង្ស៊ី ឃោសនា ២១ ថ្ងៃ រីឯការហែក្បួន ៤ ថ្ងៃ គឺគ្រប់គ្រាន់ហើយ ព្រោះនៅប្រទេសបារាំង ក៏មិនឃោសនា ដល់មួយខែដែរ។
លោកសមរង្ស៊ី បញ្ជាក់ថា គណបក្សសង្គ្រោះជាតិ ព្រមតាមគណបក្សប្រជាជនកម្ពុជា លើការកាត់បន្ថយថ្ងៃឃោសនាបោះឆ្នោត ពី ៣០ ថ្ងៃ ក្នុងច្បាប់ចាស់ មកត្រឹម ២១ ថ្ងៃនោះ ដើម្បីរក្សាអ្វីដែលគណបក្សសង្គ្រោះជាតិចង់បាន គឺការផ្លាស់ប្តូរគជប ជាស្ថាប័នឯករាជ្យ មានកំណត់ក្នុងរដ្ឋធម្មនុញ្ញ។
ចំពោះការកំណត់ក្នុងច្បាប់បោះឆ្នោត លើសិទ្ធិសេរីភាព ដែលមានការកំណត់ផ្តន្ទាទោសលើសង្គមស៊ីវិល ដែលបានជេរប្រមាថបេក្ខជន ឬគណបក្សនយោបាយ ក្នុងពេលឃោសនាបោះឆ្នោត ត្រូវបានលោកសមរង្ស៊ី លើកឡើងថា អាស្រ័យលើការបកស្រាយរបស់គជប។ ក្នុងនោះ គណបក្សសង្គ្រោះជាតិ ក៏បានកំនត់ថា ឲ្យរក្សានូវសិទ្ធសេរីភាពនៃការបញ្ចេញមតិ។
សរុបមក តាមលោកសមរង្ស៊ី ច្បាប់បោះឆ្នោត និងច្បាប់គជប អាចទទួលយកបាន ទោះជាមិនល្អ ១០០% ក៏ដោយ តែក៏មិនអាក្រក់ដែរ។
លោកសមរង្ស៊ី ក៏បានបញ្ជាក់ជាថ្មីពីគោលដៅរបស់គណបក្សសង្គ្រោះជាតិ គឺការផ្លាស់ប្តូរ។ ជាការផ្លាស់ប្តូរ តាមការបោះឆ្នោត ហើយគណបក្សសង្គ្រោះជាតិ បដិសេធដាច់ខាតនូវការផ្លាស់ប្តូរ ដោយប្រើកម្លាំង មានអំពើហិង្សា បង្ហូរឈាម និងបដិវត្តខុសច្បាប់។
ចំពោះមុខអ្នកគាំទ្រនៅបារាំង លោកសមរង្ស៊ី ក៏បានលើកឡើងថា សមាសភាពគជបថ្មី មានតុល្យភាព ៤+៤+១ គឺ៤រូប មកពីគណបក្សប្រជាជនកម្ពុជា ៤រូបមកពីគណបក្សសង្គ្រោះជាតិ និង១រូប ជាឥស្សរជនកណ្តាលមិនលម្អៀង ដែលទទួលស្គាល់ដោយគណបក្សទាំងពីរ។ គជបថ្មី ក៏បានចែងក្នុងរដ្ឋធម្មនុញ្ញ។
នៅថ្ងៃទី២៧មេសា គណៈកម្មាធិការអចិន្ត្រៃយ៍រដ្ឋសភា ចាប់ផ្តើមដំណើរការជ្រើសរើសបេក្ខជនគជប មុននឹងដាក់ជូនរដ្ឋសភា ប្រជុំអនុម័ត និងប្រកាសសមាសភាពទាំង ៩ រូបរបស់គជបថ្មី នៅថ្ងៃទី១៣មេសា គឺមុនបុណ្យចូលឆ្នាំ ប្រពៃណីជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ