ថ្នាក់ដឹកនាំបក្សប្រឆាំង ផ្សព្វផ្សាយពីវប្បធម៌សន្ទនាដល់សកម្មជនរបស់ខ្លួន
លោក សម រង្ស៊ី និងលោក កឹម សុខា ប្រធាននិងអនុប្រធានគណបក្សសង្គ្រោះជាតិ បានចាប់ផ្ដើមផ្សព្វផ្សាយពីវប្បធម៌សន្ទនាទៅកាន់សកម្មជននៅតាមមូលដ្ឋានរបស់ខ្លួន។ សារនយោបាយដើម្បីផ្សព្វផ្សាយពីវប្បធម៌សន្ទនានេះ មិនត្រឹមតែធ្វើឡើងតែនៅក្នុងប្រទេសទេ ក៏មានផងដែរនៅក្រៅប្រទេស។ នេះបើយោងតាមវីដេអូចុះផ្សាយនៅក្នុងបណ្ដាញសង្គមផ្លូវការរបស់មេដឹកនាំបក្សប្រឆាំងទាំងពីរ។
ចុះផ្សាយនៅថ្ងៃ៖
ស្តាប់ - ០២:២៦
ក្នុងដំណើរទស្សនកិច្ចនៅប្រទេសកាណាដា កាលពីថ្ងៃទី១០ខែឧសភាកន្លងទៅ លោក សម រង្ស៊ី ប្រធានគណបក្សសង្គ្រោះជាតិ បានឆ្លៀតឱកាសផ្សព្វផ្សាយដល់អ្នកគាំទ្ររបស់ខ្លួន អំពីវប្បធម៌សន្ទនា។ នៅក្នុងខ្សែវីដេអូថតនៅថ្ងៃទី១០ឧសភា ដែលទើបតែត្រូវបានផ្សព្វផ្សាយជាផ្លូវការនៅថ្ងៃទី១៧ឧសភានេះ លោក សម រង្ស៊ី បានប្រាប់អ្នកគាំទ្ររបស់ខ្លួនថា វប្បធម៌សន្ទនាគឺជាវប្បធម៌សន្តិភាព ជាវប្បធម៌ប្រជាធិបតេយ្យ ដែលនឹងចូលមកជំនួសវប្បធម៌សង្គ្រាម វប្បធម៌ហិង្សា និងវប្បធម៌សម្លាប់ខ្មែរគ្នាឯង។ សម្រាប់លោក សម រង្ស៊ី ការបន្តវប្បធម៌សង្គ្រាម វប្បធម៌ហិង្សា និងវប្បធម៌សម្លាប់ខ្មែរគ្នាឯង នោះនឹងធ្វើឲ្យជាតិខ្មែររលាយ។ ផ្ទុយមកវិញ ដើម្បីឲ្យជាតិខ្មែររុងរឿងថ្កុំថ្កើង នោះត្រូវប្រកាន់យកវប្បធម៌សន្ទនា។ នេះបើតាមលោក សម រង្ស៊ី។
នៅកម្ពុជាឯណេះវិញ លោក កឹម សុខា ដែលបានទៅជួបជាមួយសកម្មជនរបស់ខ្លួន នៅស្រុកពញាឮខេត្តកណ្ដាលកាលពីថ្ងៃសៅរ៍ទី១៦ឧសភា ក៏បានអំពាវនាវឲ្យមេដឹកនាំគណបក្សទាំងពីរសន្ទនាគ្នាដោយផ្ដល់អាទិភាពទៅលើការកែទម្រង់ប្រព័ន្ធតុលាការ។ បើតាមលោក កឹម សុខា ប្រព័ន្ធតុលាការដែលត្រូវគេរិះគន់ជាទម្លាប់ថាមានអំពើពុករលួយនិងអយុត្តិធម៌ ទាមទារឲ្យមានការកែទម្រង់ ដើម្បីយុត្ដិធម៌ទាំងអស់គ្នា។ប្រធានស្ដីទីគណបក្សសង្គ្រោះជាតិរូបនេះបានបង្ហាញការយល់ឃើញទៀតថាបើសង្គមគ្មានយុត្ដិធម៌ទេគឺមិនអាចមានសន្ដិភាពទាំងផ្លូវកាយទាំងផ្លូវចិត្ត ជូនប្រជាពលរដ្ឋបានឡើយ។
គួរជម្រាបជូនថា ការលើកឡើងរបស់លោកសម រង្សី និងលោក កឹម សុខ អំពីវប្បធម៌សន្ទនានេះ បានធ្វើឡើងជាបន្តបន្ទាប់ក្រោយពីគណបក្សប្រជាជនកម្ពុជា និងគណបក្សសង្រ្គោះជាតិ បានចេញសេចក្តីថ្លែងការរួមដើម្បីគោរពគោលជំហរចំនួន៧ចំណុច ក្នុងគោលដៅរក្សាវប្បធម៌សន្ទនា និងពង្រឹងលទ្ធិប្រជាធិបតេយ្យក្នុងប្រទេសកម្ពុជា។
ដោយឡែក ក្រៅពីរំលឹកអំពីវប្បធម៌សន្ទនា លោក កឹម សុខា ក៏បានប្រាប់ឲ្យសកម្មជននិងថ្នាក់ដឹកនាំគណបក្សសង្គ្រោះជាតិគ្រប់ជាន់ថ្នាក់ ជឿលើរូបលោក និងលោក សម រង្ស៊ី។ ជឿថា លោកទាំងពីរមិនបែកបាក់គ្នានោះឡើយ។ បើតាមលោក កឹម សុខា ជំនឿរបស់ប្រជាពលរដ្ឋមកលើគណបក្សសង្គ្រោះជាតិ ចាំបាច់ណាស់ដើម្បី ទទួលបានជ័យជំនះក្នុងការបោះឆ្នោតខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ