លោក សម រង្ស៊ី បញ្ចេញឯកសារបន្ថែមបង្ហាញថារូបលោកជាប់ពាក់ព័ន្ធរឿងក្បត់ជាតិជាមួយលោក កឹម សុខា
ប្រធានស្តីទីអតីតគណបក្សសង្រ្គោះជាតិ លោកសម រង្ស៊ី នៅយប់ថ្ងៃអាទិត្យ ទី២៦ ខែមករា បានបង្ហោះនូវឯកសារបន្ថែមទៀតដែលចង់បញ្ជាក់ថារូបលោកក៏ជាប់ពាក់ព័ន្ធក្នុងសំណុំរឿងក្បត់ជាតិជាមួយលោកកឹម សុខាដែរ។ ការបង្ហាញបន្ថែមនេះ គឺបន្ទាប់ពីរូបលោកបានបង្ហោះនូវឯកសារបែបជាច្រើនរួចមកហើយ។ មេធាវីរដ្ឋាភិបាលកម្ពុជាថា ឯកសារលោកសម រង្ស៊ី អាចយកធ្វើជាភស្តុតាងដាក់បន្ទុកបន្ថែមលើលោកកឹម សុខា។ ប៉ុន្តែមេធាវីលោកកឹម សុខាវិញ លើកឡើងថា វាគ្មានតម្លៃជាភស្តុតាងនោះឡើយ។
ចុះផ្សាយនៅថ្ងៃ៖
ស្តាប់ - ០២:០២
រូបភាព៣សន្លឹកបន្ថែមទៀតត្រូវបានលោកសម រង្ស៊ី បង្ហោះនៅលើទំព័រហ្វេសប៊ុករបស់លោកនៅថ្ងៃទី២៦ ខែមករាជាមួយសារឌឺដងផងទៅកាន់លោកនាយករដ្ឋមន្រ្តីហ៊ុន សែន និង តុលាការកម្ពុជា។ រូបភាពទាំងនេះ គឺជាជំនួបរវាងលោកសម រង្ស៊ីនិងលោកកឹម សុខា ជាមួយមន្ត្រីជាន់ខ្ពស់នៃក្រសួងការបរទេសជប៉ុនកាលពីឆ្នាំ ២០១៦ ជំនួបជាមួយប្រធានសហភាពអន្តរសភា(IPU)កាលពីឆ្នាំ២០១៨ និង ជំនួបរវាងលោកសម រង្ស៊ីជាមួយរដ្ឋមន្ត្រីក្រសួងការបរទេសប្រទេសវៀតណាមនៅទីក្រុងហាណូយ កាលពីឆ្នាំ ២០០១។
ជាមួយនឹងរូបភាពទាំងនេះ លោកសម រង្ស៊ី ក៏បានអះអាងថា កាលលោកនៅធ្វើជាប្រធានគណបក្សជាតិខ្មែរ ប្រធានគណបក្សសម រង្ស៊ី និងជាប្រធានគណបក្សសង្គ្រោះជាតិក្នុងឆ្នាំ២០១២-២០១៧ គឺលោកបានធ្វើសកម្មភាពជាមួយបរទេសច្រើនជាង ញឹកញាប់ជាង និងស៊ីជម្រៅជាងលោក កឹម សុខា ឆ្ងាយណាស់ក្នុងរយៈពេល២៥ ឆ្នាំកន្លងទៅនេះ។ ដូច្នេះហើយ លោកថា លោកនាយករដ្ឋមន្រ្តីហ៊ុន សែន និង តុលាការកម្ពុជាត្រូវយករូបលោកទៅកាត់ទោសជំនួសលោកកឹម សុខា។
សូមបញ្ជាក់ថា នេះមិនមែនជាលើកទី១ និងជាឯកសារទី១ទេដែលលោកសម រង្ស៊ី បានបង្ហោះដើម្បីជំរុញឱ្យតុលាការកម្ពុជាកាត់ទោសលើរូបលោកជាមួយលោកកឹម សុខា។ កាលពីសប្តាហ៍មុន ពោល គឺនៅមុនសវនាការលោកកឹម សុខា លោកសម រង្ស៊ី ក៏បានបង្ហាញរូបភាព និងឯកសារជាច្រើនបែបនេះផងដែរ។ មេធាវីតំណាងឱ្យរដ្ឋាភិបាលកម្ពុជា លោកគី តិច បានអះអាងថា ឯកសារ និងការលើកឡើងរបស់លោកសម រង្ស៊ី ទាំងនេះនឹងក្លាយជាភស្តុតាងបន្ថែមនៅក្នុងសំណុំរឿងក្បត់ជាតិរបស់លោកកឹម សុខា។ ចំណែក លោកសម រង្ស៊ី ខ្លួនឯងក៏នឹងមិនរួចខ្លួននោះដែរ។
ក៏ប៉ុន្តែមេធាវីការពារក្តីលោកកឹម សុខា គឺលោកផែង ហេង វិញ ធ្លាប់បានអះអាងប្រាប់វិទ្យុបារាំងអន្តរជាតិថា ការលើកឡើងរបស់លោកសម រង្ស៊ីទាំងនេះ មិនអាចយកមកធ្វើភស្តុតាងបាននោះទេ ព្រោះជាសម្តីបែបឌឺដងដាក់លោកនាយករដ្ឋមន្រ្តីហ៊ុន សែន និង តុលាការកម្ពុជាតែប៉ុណ្ណោះ។ លោកគូសបញ្ជាក់ទៀតថា ការលើកឡើងទាំងនេះមិនទាន់អាចចាត់ទុកបានថា ជាបទល្មើសបាននៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ