លោក សម រង្ស៊ី ថា សារបែកធ្លាយជាសារពិត ខណៈតុលាការបង្គាប់ឲ្យសងជំងឺចិត្ត១លានដុល្លារ
អតីតប្រធានគណបក្សប្រឆាំង លោក សម រង្ស៊ី បានចេញមុខលាតត្រដាងសារបែកធ្លាយដែលលោកអះអាងថាជាការសន្ទនារវាងលោក ហ៊ុន សែន និងនាង ធី សុវណ្ណថា កាលពីដើមឆ្នាំនេះថាជាសារពិតប្រាកដ។ការបន្តលាតត្រដាងជាថ្មីទៀតនេះគឺជាការឆ្លើយតបរបស់លោក សម រង្ស៊ី ចំពោះការកាត់ទោសរូបលោកឲ្យចាញ់ក្តីលោកនាយករដ្ឋមន្រ្តី ដោយតុលាការបង្គាប់ឲ្យលោកសងជំងឺចិត្តទៅលោក ហ៊ុន សែន រហូតដល់៤ពាន់លានរៀលឬស្មើនឹង១លានដុល្លារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០០
ដោយ អ៊ឹង ប៊ុនថន
នៅលើទំព័រហ្វេសប៊ុក លោក សម រង្ស៊ី ថ្ងៃទី២៩ធ្នូ លោកបានសរសេរថា សារចំនួនជាង ៤០០ រវាងលោក ហ៊ុន សែន និងនាង ធី សុវណ្ណថា គឺសុទ្ធតែជាសារពិតប្រាកដទាំងអស់។លោកថានេះជាការបញ្ជាក់របស់អ្នកជំនាញផ្នែកបណ្តាញសង្គម មានបច្ចេកទេសគ្រប់គ្រាន់។ បើតាម លោក សម រង្ស៊ី “បើនរណាម្នាក់ចង់ប្រឌិតអ្វីមួយ ដើម្បីបង្ខូចឈ្មោះជនពាក់ព័ន្ធទាំងពីរនាក់នោះ គេមិនចាំបាច់ប្រឌិតសារ ដ៏ច្រើនបែបនេះទេ”។ លើសពីនេះទៅទៀត ក្រៅពីជនពាក់ព័ន្ធទាំងពីរនាក់នោះ គ្មាននរណាមានព័ត៌មានលម្អិត ដូចពួកគាត់បានបញ្ចេញដោយខ្លួនឯង ស្តីពីទំនាក់ទំនងរវាងពួកគាត់ទាំងពីរនាក់។ ព័ត៌មានលម្អិតទាំងនោះ គឺជាព័ត៌មានជាក់ស្តែង ជាពិសេសទាក់ទងទៅនឹងកម្មវិធី និងសកម្មភាពលម្អិត របស់លោកនាយករដ្ឋមន្ត្រី ហ៊ុន សែន ដែលមានតែគាត់ម្នាក់ទេ អាចដឹងពីកម្មវិធី និងសកម្មភាពលម្អិតរបស់គាត់បែបនេះ។ទាំងនេះជាការលើកឡើងរបស់លោក សម រង្ស៊ី។
អតីតប្រមុខបក្សប្រឆាំងដែលភៀសខ្លួនទៅក្រៅប្រទេសដោយសារតែមានបណ្តឹងពីរដ្ឋាភិបាលកម្ពុជានោះ នៅបានអះអាងទៀតថា “ជិត ១ ឆ្នាំកន្លងផុតទៅហើយ ដែលលោក ហ៊ុន សែន មិនបានបដិសេធយ៉ាងម៉ឺងម៉ាត់ សារទាំង ៤០០ នោះ ដែលបានបែកធ្លាយជាសាធារណៈ។ ដូច្នេះ សាធារណមតិ នៅតែជឿជាក់ថា សារទាំងនោះ ជាសារពិតប្រាកដទាំងអស់”។
សូមបញ្ជាក់ថា កាលពីថ្ងៃទី២៩ធ្នូតុលាការក្រុងភ្នំពេញ បានកាត់ទោសលោក សម រង្ស៊ី អតីតប្រធានគណបក្សសង្រ្គោះជាតិ ឲ្យចាញ់ក្តីលោកនាយករដ្ឋមន្រ្តី ហ៊ុន សែន ជាថ្មីម្តងទៀត នៅក្នុងសំណុំរឿងបរិហាកេរ្តិ៍ កាលពីមួយឆ្នាំមុន។ គឺជាបណ្តឹងបរិហាកេរ្តិ៍ ដែលបានកើតឡើងតាំងពី ខែមករា ដើមឆ្នាំ២០១៧ ដែលកាលណោះ លោក គី តិច មេធាវីតំណាងដោយអាណត្តិរបស់លោកនាយករដ្ឋមន្រ្តី ហ៊ុន សែន បានដាក់ពាក្យប្តឹង លោក សម រង្ស៊ី អតីតប្រធានគណបក្សសង្គ្រោះជាតិ ពីបទបរិហារកេរ្តិ៍លោក ហ៊ុន សែន។ ពាក្យបណ្តឹងទាមទារសំណង១លានដុល្លារអាមេរិកនោះ បានកើតឡើង ក្រោយពីលោក សម រង្ស៊ី បានថ្លែងតាមបណ្តាញសង្គមហ្វេសបុក ដោយចោទប្រកាន់លោកនាយករដ្ឋមន្រ្តី ហ៊ុន សែន ថា បានសូកប៉ាន់កញ្ញា ធី សុវណ្ណថា ១លានដុល្លារអាមេរិក ដើម្បីឲ្យអតីតអ្នកគាំទ្រគណបក្សប្រឆាំងដ៏សកម្មរូបនេះ វាយប្រហារទៅលើអតីតគណបក្សសង្រ្គោះជាតិ ដែលខ្លួនធ្លាប់គាំទ្រវិញ។
គួរជំរាបជូនថា លោក សម រង្ស៊ី ដែលកំពុងនិរទេសខ្លួន គឺបានរងពាក្យបណ្តឹងយ៉ាងតិចចំនួន០៩ឯណោះ ដែលកំពុងចាក់ស្រេះលើខ្លួនប្រាណរបស់អតីតប្រធានគណបក្សសង្រ្គោះជាតិរូបនេះ ក្នុងនោះ ៥បណ្តឹងត្រូវបានតុលាការកាត់ក្តីរួចរាល់ ចំណែកឯ៤បណ្តឹងទៀត កំពុងស្ថិតនៅក្នុងដៃរបស់តុលាការនៅឡើយ។ ពាក្យបណ្តឹងភាគច្រើន គឺប្តឹងដោយមន្រ្តីជាន់ខ្ពស់រដ្ឋាភិបាល និងមេដឹកនាំគណបក្សប្រជាជនកម្ពុជា។ ហើយចុងក្រោយនេះ លោក សម រង្ស៊ី កំពុងរងពាក្យបណ្តឹងថ្មីមួយទៀត មកពីក្រុមមេដឹកនាំយោធាកម្ពុជា ពីបទញុះញង់កុំឲ្យកងទ័ពស្តាប់បញ្ជាមេដឹកនាំ និងធ្វើឲ្យខូចទឹកចិត្តកងទ័ព។ ពាក្យបណ្តឹងដែលបានទៅដល់ដៃតុលាការក្រុងភ្នំពេញ កាលពីដើម ខែធ្នូ ឆ្នាំ ២០១៧នេះ។
យ៉ាងណាក៏ដោយ លោក សម រង្ស៊ី អតីតប្រធានគណបក្សសង្រ្គោះជាតិ ធ្លាប់បានអះអាងថា លោកមិនខ្វល់ខ្វាយពីពាក្យបណ្តឹងទាំងនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ