តុលាការក្រុងភ្នំពេញសម្រេចឃុំខ្លួនលោក ហុង សុខហួរ នៅព្រៃសរ ក្រោមបទចោទប្រកាន់ចំនួនបី
ក្រោយ ពីការសាកសួរអស់រយៈពេលពីរថ្ងៃមកនេះ តុលាការក្រុងភ្នំពេញ នៅព្រឹកថ្ងៃអាទិត្យនេះ បានសម្រេចឃុំខ្លួន លោក ហុង សុខហួរ សមាជិកព្រឹទ្ធសភាគណបក្សសមរង្ស៊ី ជាបណ្តោះអាសន្ននៅពន្ធនាគាព្រៃសរ ដើម្បីរងចាំសវនាការកាត់ទោសនៅពេលខាងមុខ។ លោក ហុង សុខហួរ ត្រូវបានចោទប្រកាន់ចំនួន៣ចំណុច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៨
លោក ហុង សុខហួរ សមាជិកព្រឹទ្ធសភាគណបក្សសមរង្ស៊ី ត្រូវបានបញ្ជូនទៅឃុំខ្លួនជាបណ្តោះអាសន្ននៅពន្ធនាគាព្រៃសរហើយ កាលពីវេលាម៉ោង១១ព្រឹកថ្ងៃអាទិត្យទី១៦សីហា។ លោក ហុង សុខហួរ ស្ថិតក្នុងសំលៀកបំពាក់ អាវធំ ក្រវ៉ាត់ករផង ត្រូវបានដឹកចេញពីតុលាការក្រុងភ្នំពេញ តាមរថយន្តឃ្លុបមួយគ្រឿង ក្រោមការការពារយ៉ាងតឹងរឹងបំផុតពីសមត្ថកិច្ចកម្ពុជា បន្ទាប់ពីការសាកសួររបស់លោកចៅក្រមស៊ើបសួរ លោក កោ វណ្ឌី ដែលបានបញ្ចប់ទៅ នៅម៉ោង១១ព្រឹកថ្ងៃអាទិត្យនេះ។
បើតាមលោក ជូង ជូងី មេធាវីការពារក្តីឲ្យលោក ហុង សុខហួរ បានបញ្ជាក់ថា កូនក្តីរបស់លោក ត្រូវបានចោទប្រកាន់ចំនួនបីករណី ទី១.បទក្លែងឯកសាធារណៈ ទី២.ប្រើបាស់ឯកសារសាធារណៈក្លែងក្លាយ និងទី៣ពីបទញុះញង់អោយមានបទល្មើសមជ្ឈឹម ឬឧក្រិដ្ឋមិនសម្រេច។ បើតាមលោក ជូង ជូងី ដដែល ក្នុងចំណោមបទល្មើសទាំងបីនេះ មានន័យថា កូនក្តីរបស់លោកមិនស្ថិតនៅក្នុងបទល្មើសក្បត់ជាតិនោះទេ ហើយលោកនឹងត្រៀមដាក់ពាក្យធានាសុំឲ្យកូនក្តីរបស់លោកបាននៅក្រៅឃុំជាបណ្តោះអាសន្ន។
កាលពីថ្ងៃសៅរិ៍ម្សិលម៉ិញ លោក ហុង សុខហួរ បានថ្លែងអំណរគុណចំពោះអ្នកគាំទ្ររបស់លោក ដែលបានទាមទារឲ្យដោះលែងរូបលោក មុនពេលគេចាប់បញ្ចូលទៅក្នុងរថយន្ត ក្រោយការសាកសួរអស់រយៈពេល៤ម៉ោង ពីលោកព្រះរាជអាជ្ញារង មាស ច័ន្ទពិសិដ្ឋ កាលពីថ្ងៃសៅរិ៍។
លោក ហុង សុខហួរ សមាជិកព្រឹទ្ធសភាគណបក្សសមរង្ស៊ី ដែលមានសញ្ជាតិបារាំងផងនោះ ត្រូវបានសមត្ថកិច្ចនៃស្នងការដ្ឋាននគរបាលរាជធានីភ្នំពេញ ឃាត់ខ្លួនកាលពីព្រឹកថ្ងៃសៅរិ៍ទី១៥សីហា ពីភូមិគ្រឹះមួយកន្លែងស្ថិតនៅក្នុងសង្កាត់ភ្នំពេញថ្មី ក្រោយពីមានការចោទប្រកាន់ថា លោកបានក្លែងបន្លំឯកសារនៃសន្ធិសញ្ញាព្រំដែន កម្ពុជា-វៀតណាម ឆ្នាំ១៩៧៩។
អ្វីជាការកត់សម្គាល់ នៅជុំវិញតុលាការក្រុងភ្នំពេញនៅថ្ងៃនេះ កងកម្លាំងប្រដាប់អាវុធរាប់រយនាក់ ត្រូវបានដាក់ពង្រាយទាំងនៅបរិវេណតុលាការ និងនៅក្នុងពហុកីឡដ្ឋានជាតិអូឡាំពិក ខណៈដែលអ្នកសារព័ត៌មាន អ្នកឃ្លាំមើលសិទ្ធិមនុស្ស និងក្រុមអ្នកគាំទ្រលោក ហុង សុខហួរ ត្រូវបានរារាំងមិនឲ្យចូលក្បែរបរិវេណតុលាការឡើយ។
យ៉ាងណាក៏ដោយ ការចាប់ឃុំខ្លួនលោក ហុង សុខហួរ ដោយមិនទាន់មានការដកអភ័យឯកសិទ្ធិនៅឡើយនេះ នៅតែជាចម្ងល់របស់សាធារណៈជននៅឡើយ។ គិតត្រឹមថ្ងៃអាទិត្យទី១៦សីហានេះ ព្រឹទ្ធសភាក៏នៅតែមិនទាន់កោះប្រជុំលើកអភ័យឯកសិទ្ធិរបស់លោក ហុង សុខហួរ នៅឡើយដែរ បើទោះបីជាមានរបាយការណ៍ពីលោក នេត សាវឿន អគ្គស្នងការនគរបាលជាតិ ដែលបានផ្ញើទៅកាន់លោក នៃ ប៉េណា ប្រធានស្តីទីព្រឹទ្ធសភា ជុំវិញការឃាត់ខ្លួនលោក ហុង សុខហួរ កាលពីវេលាម៉ោង៦ព្រឹកថ្ងៃទី១៥ខែសីហា។ ការសម្រេចឃុំខ្លួនលោក ហុង សុខហួរ ជាបណ្តោះអាសន្ន នៅព្រៃសរនាព្រឹកថ្ងៃអាទិត្យនេះ បានធ្វើឡើង នៅមុនពេលតែប្រមាណជា១ម៉ោងកន្លះប៉ុណ្ណោះ នៃការមកដល់របស់លោក សម រង្ស៊ី ប្រធានគណបក្សសង្រ្គោះជាតិ នៅឯអាកាសយានដ្ឋានអន្តរជាតិភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ