«បន្ទប់ស្ថានការណ៍ស្តីពីការបោះឆ្នោត» អាចនឹងបន្តមាន តែក្រោមរូបភាពផ្សេង?
ចុះផ្សាយនៅថ្ងៃ៖
ស្តាប់ - ០៤:៤៨
ថ្មីៗនេះ ក្រសួងមហាផ្ទៃ បានចេញលិខិតព្រមានចំនួន២ ចំពោះប្រធានអង្គការ២នាក់ ដែលជាសមាជិកជាន់ខ្ពស់របស់«បន្ទប់ស្ថានការណ៍ស្តីពីការបោះឆ្នោត»។ ការព្រមាននេះ គឺគ្រាន់តែបញ្ជាក់ថា កុំឲ្យពួកគេធ្វើសកម្មភាពបន្តទៀត។ ទោះយ៉ាងណាក្តី អ្នកវិភាគខ្លះ គិតថា«បន្ទប់ស្ថានការណ៍»នេះ អាចនឹងនៅតែបន្តមាននៅក្នុងការបោះឆ្នោតឆ្នាំក្រោយទៀត ប៉ុន្តែអាចស្ថិតក្រោមរូបភាពផ្សេង។
នៅទីបំផុត ក្រសួងមហាផ្ទៃ បានសម្រេចត្រឹមតែចេញលិខិតជូនដំណឹងថា សកម្មភាពកន្លងមករបស់«បន្ទប់ស្ថានការណ៍» គឺខុសច្បាប់ ហើយរបាយការណ៍ និងសេចក្តីថ្លែងការណ៍របស់ក្រុមនេះ គឺគ្មានតម្លៃគតិយុត្តទេ។ ការចេញលិខិតព្រមានរបស់រដ្ឋមន្ត្រីក្រសួងមហាផ្ទៃនេះ គឺធ្វើឡើង១សប្តាហ៍ក្រោយពីនាយករដ្ឋមន្ត្រី បានចេញបញ្ជាផ្ទាល់ឲ្យពិនិត្យភាពស្របច្បាប់ របស់«បន្ទប់ស្ថានការណ៍ស្តីពីការបោះឆ្នោត» ដែលជាបណ្តុះអង្គការសង្គមស៊ីវិល ប្រមាណ៤០អង្គការ។
ចំពោះអ្នកវិភាគស្ថានការណ៍នយោបាយកម្ពុជា ការចេញលិខិតព្រមានបែបនេះ គឺជារឿងល្អមួយ ដែលអាចបញ្ជ្រៀសការចាប់បញ្ចូនមន្ត្រីសង្គមស៊ីវិលទៅញាត់ដាក់ពន្ធនាគារ។ គឺវាផ្ទុយពីអ្វីដែលអ្នកខ្លះយល់ឃើញថា ការដោះលែងមន្ត្រីសង្គមស៊ីវិល ទាំង៤នាក់ រួមនិងមន្ត្រីគ.ជ.ប.ម្នាក់ សម្រាប់ដាក់សមាជិកខ្លះរបស់«បន្ទប់ស្ថានការណ៍» ទៅក្នុងគុកជំនួសវិញ។
ជាមួយគ្នានេះ ការត្រឹមតែព្រមានដូច្នេះ ក៏ស្តែងដែរថា ក្រសួងមហាផ្ទៃ មានការយោគយល់ ចំពោះអ្នកជំនាញរបស់«បន្ទប់ស្ថានការណ៍» ឬក៏និយាយដោយឡែក គឺក្រសួងមានអធ្យាស្រ័យច្រើនចំពោះមន្ត្រីសង្គមស៊ីវិលច្រើនជាងមុន។ ពោលគឺមិនប៉ះដៃយកដៃ ប៉ះជើងយកជើងនោះឡើយ។
ផ្ទុយទៅវិញ ចំពោះស្ថានភាពផ្លូវច្បាប់វិញ បើផ្អែកទៅលើស្មារតីច្បាប់ ស្តីពីការគ្រប់គ្រង សមាគម អង្គការមិនមែនរដ្ឋាភិបាល ត្រង់មាត្រា២១ បានគូសបង្ហាញក្នុងអត្ថន័យ ថា ប្រសិនបើអង្គការ សមាគម ដែលបានចុះបញ្ជីទទួលស្គាល់រួចហើយ មានសិទ្ធិចុះកិច្ចសន្យា និងធ្វើសកម្មភាពជាមួយអង្គការដៃគូផ្សេងទៀត តាមគម្រោងសកម្មភាពរបស់ខ្លួន ដែលសមស្របច្បាប់របស់ស្រុកខ្មែរ។
ដូច្នេះ ប្រសិនបើអង្គការទាំងប្រមាណ៤០ នៃ«បន្ទប់ស្ថានការណ៍»នោះ គឺសុទ្ធតែបានចុះបញ្ជីទទួលស្គាល់ត្រឹមត្រូវដោយក្រសួងមហាផ្ទៃ រួចហើយ គឺអាចធ្វើសកម្មភាពបាន។ ពោលគឺគ្រាន់តែឈ្មោះថា «បន្ទប់ស្ថានការណ៍»នេះ គ្មានការចុះបញ្ជីប៉ុណ្ណោះ តែវាគឺជាផែនការសកម្មភាពរយៈពេលខ្លីសម្រាប់តែពេលបោះឆ្នោត ធ្វើឡើងដោយអង្គការប្រមាណ៤០ ដែលបានចុះបញ្ជីរួចហើយ។
លើសពីនេះ បើផ្អែកតាមការអះអាងរបស់សមាជិកនៃ«បន្ទប់ស្ថានការណ៍» សេចក្តីថ្លែងការណ៍របស់ពួកគេ គឺស្ថិតក្នុងគោលបំណងចង់ឲ្យដំណើរការបោះឆ្នោត ប្រព្រឹត្តិទៅឲ្យកាន់តែប្រសើរតែប៉ុណ្ណោះ។ ចំពោះរបាយការណ៍របស់ក្រុមនេះទៀតសោត គឺភាគច្រើនចាប់ផ្តើមឡើងដោយវាយតម្លៃជាវិជ្ជមានចំពោះការខិតខំប្រឹងប្រែងរបស់គ.ជ.ប. មានតួយ៉ាង ការរៀបចំបញ្ជីឈ្មោះតាមប្រព័ន្ធទំនើប និងដំណើរការបោះឆ្នោត រួមទាំងភាពក្លាហានរបស់គ.ជ.ប. ក្នុងការដោះស្រាយវិវាទផ្សេងៗថែមទៀតផង។
ក៏ប៉ុន្តែ សម្រាប់សមាជិកនៃ«បន្ទប់ស្ថានការណ៍», ការដែលយល់ថា «បន្ទប់ស្ថានការណ៍»នេះ បានខោកក្បាលគ.ជ.ប. គឺជាការយល់ដោយភ័ន្តច្រឡំទៅវិញទេ។ ហើយបើពិនិត្យឲ្យស៊ីជម្រៅមែនទែនទៅ សេចក្តីថ្លែងការណ៍និងរបាយការណ៍នៃ«បន្ទប់ស្ថានការណ៍» គឺទំនងជាគ្មានចង់ដាក់បន្ទុកទៅលើគ.ជ.ប.ខ្លាំងពេកនោះទេ ប៉ុន្តែបែរជាចង់ជូនយោបល់ទៅរដ្ឋាភិបាល និងស្ថាប័នពាក់ព័ន្ធទៅវិញទេ ឲ្យពិនិត្យមើល ទិដ្ឋភាពបរិយាកាសមុនបោះឆ្នោត ដែលគេឃើញថា មានការធ្វើច្បាប់ខ្លះដើម្បីកម្ចាត់អ្នកនយោបាយមកពីបក្សផ្ទុយគ្នា និងនៅតែបន្តមានអ្នកទោសនយោបាយ កំពុងតែដេកគុកនៅឡើយ ដែលទាំងនេះ គឺធ្វើ«បន្ទប់ស្ថានការណ៍» យល់ថា វាអាចប៉ះពាល់ដល់បរិយាកាសបោះឆ្នោត ដែលមិនអាចឲ្យការបោះឆ្នោត ពោរពេញដោយសេរី និងយុត្តិធម៌ពេញលេញនោះ។
ទោះបីជាយ៉ាងណាក៏ដោយចុះ សម្រាប់ការបោះឆ្នោតជាតិឆ្នាំក្រោយ ឆ្នាំ២០១៨ ឈ្មោះពាក្យថា «បន្ទប់ស្ថានការណ៍» អាចនឹងគ្មានវត្តមានទៀតទេ។ ទំនងជាគ្មានតទៅទៀត ព្រោះថា ក្រសួងមហាផ្ទៃ បានហាមរួចស្រេចទៅហើយ ថាឲ្យត្រូវតែបញ្ឈប់សកម្មភាព ដ្បិតក្រសួងយល់ឃើញថាជាសកម្មភាពខុសច្បាប់។
ហើយធំដុំជាងនេះទៅទៀតនោះ គឺពាក្យថា«បន្ទប់ស្ថានការណ៍» នេះ វាបានបង្កភាពល្អកកកររួចហើយដែរចំពោះមុខរដ្ឋាភិបាល និងរហូតដល់លោកនាយករដ្ឋមន្ត្រី បញ្ជាឲ្យចាត់ការពិនិត្យពីភាពស្របច្បាប់នៃ«បន្ទប់ស្ថានការណ៍»នេះទៀត។
ក៏ប៉ុន្តែ បើតាមក្រុមអ្នកវិភាគមួយចំនួន ខ្លឹមសារស្នូលនៃអ្វីដែលគេហៅ«បន្ទប់ស្ថានការណ៍ស្តីពីការបោះឆ្នោត» អាចនឹងនៅតែបន្តមាន តែទំនងជាអាចស្ថិតក្រោមរូបភាពផ្សេងទៅវិញ។ មានសេណារីយ៉ូមួយ ដែលគេអាចងាយគិតឃើញ នោះគឺពួកគេអាចឈប់ប្រើឈ្មោះនេះ តែដោយនៅតែបន្តរក្សាកម្លាំង ធនធាន និងសមាជិកបច្ចេកទេសឲ្យនៅដដែល ហើយចូលរួបរួមគ្នា នៅក្នុងអង្គការតែពីរបានហើយ គឺ NICFEC ឬ/និង អង្គការ COMFREL ដែលជាអង្គការចុះបញ្ជីត្រឹមត្រូវ និងមានជំនាញសង្កេតការណ៍បោះឆ្នោតស្រាប់។ ធ្វើបែបនេះ ពួកគេ ក៏នៅតែអាចធ្វើសកម្មភាពសង្កេតការណ៍បោះឆ្នោត បានដដែល និងមានការទទួលស្គាល់តាមការជំរុញលើកចិត្តរបស់គ.ជ.ប. ឲ្យចូលរួមសង្កេតការណ៍សម្រាប់ការបោះឆ្នោតនោះឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ