មណ្ឌលសង្គមកិច្ច ដែលមិនបានបម្រើសង្គមគួរតែបិទ ជាជាងដំណើរការប្រកបដោយកេរ្តិ៍ឈ្មោះអាស្រូវ
ចុះផ្សាយនៅថ្ងៃ៖
ស្តាប់ - ០៤:២៤
នៅក្នុងពិធីរំលឹកខួបលើកទី៦៧ នៃទិវាកុមារអន្តរជាតិ១មិថុនាខួបលើកទី១៥ ទិវាពិភពលោកប្រឆាំង និងពលកម្មកុមារ១២ មិថុនានិងទិវាកុមារកម្ពុជា ឆ្នាំ២០១៦ ដែលបានធ្វើនៅសាលមហោស្រព កោះពេជ្រកាលពីព្រឹកថ្ងៃអង្គារម្សិលមិញ លោកនាយករដ្ឋមន្ត្រីហ៊ុន សែន បានធ្វើការរំលឹកដាស់តឿន ដល់ក្រសួងសង្គមកិច្ច និងសាលារាជធានីភ្នំពេញពីការ ដែលមិនបានធ្វើឲ្យមានការកែប្រែទាល់តែសោះនូវមណ្ឌលសង្គមកិច្ចព្រៃស្ពឺ។ កន្លងមកនៅពេលដែលមានការសួរដេញដោលពីរដ្ឋសភា រដ្ឋមន្ត្រីក្រសួងសង្គមកិច្ចបានសន្យាពីការកែលម្អ និងធ្វើឲ្យប្រសើរឡើងនូវមណ្ឌលសង្គមកិច្ចព្រៃស្ពឺ ដែលរងការរិះគន់មួយនេះ។
មណ្ឌលសង្គមកិច្ចព្រៃស្ពឺស្ថិតនៅឯជាយរាជធានីភ្នំពេញ បានរងការរិះគន់នៅមិនទាន់អស់ចំហាយនៅឡើយទេ ពីការដែលមិនមានការយកចិត្តទុកដាក់ និងផ្តល់សេវាគ្រប់គ្រាន់ដល់ជនអាណាថា អ្នកសុំទាន ស្ត្រីរកស៊ីផ្លូវភេទ និងអ្នកញៀនគ្រឿងញៀន ដែលអាជ្ញាធរប្រមូលយកទៅដាក់នៅទីនោះ។
ជាការកត់សម្គាល់ ការរិះគន់នានា បានធ្វើឡើងដោយអង្គការ Human Rights Watch អង្គការការពារសិទ្ធិមនុស្សលីកាដូ កាលពីឆ្នាំ២០១៥ ដែលថាក្នុងតែរយៈពេល១១ខែប៉ុណ្ណោះ បានបណ្តោយឲ្យមានមនុស្សស្លាប់រហូតដល់ទៅ៣នាក់ បន្ទាប់ពីជនទាំង៣នាក់នោះ ត្រូវបានចាប់ទៅដាក់ក្នុងមណ្ឌលសង្គមកិច្ចព្រៃស្ពឺ ជាកន្លែងដែលអង្គការសង្គមស៊ីវិលការពារសិទ្ធិមួយនេះបរិយាយថាហួសពីបម្រើតួនាទីជាមណ្ឌលអប់រំ និងផ្តល់ជំនាញវិជ្ជាជីវៈ ប្រៀបបានទៅនឹងមន្ទីរឃុំឃាំង ដែលពាក់ព័ន្ធទៅនឹងការសង្ស័យថាបានធ្វើទារុណកម្ម និងការរំលោភផ្លូវភេទ។
តាមរយៈសារចុងក្រោយកាលពីម្សិលមិញ លោកនាយករដ្ឋមន្ត្រីហ៊ុន សែន បានប្រាប់ដល់ចៅហ្វាយក្រុងភ្នំពេញ និងក្រសួងសង្គមកិច្ច ពីលទ្ធភាពក្នុងការបិទមណ្ឌលសង្គមកិច្ចដែលមានរឿងមិនល្អមួយនេះ ដោយលោកយល់ថាមិនចាំបាច់ទុកគ្រាន់ចិញ្ចឹមរឿងទេ។ ក៏ប៉ុន្តែប្រសិនបើចង់បន្តត្រូវតែធ្វើឲ្យស្អាត ដោយមានការអាក់អន់ចិត្តពីមណ្ឌលមួយនេះ ដែលបានធ្វើឲ្យមានភាពល្អក់កករ ផ្ទុយទៅនឹងការប្រឹងប្រែងផ្តល់សេវារបស់រដ្ឋាភិបាលទាក់ទងទៅនឹងសិទ្ធិមនុស្ស។
ការរំលឹកពីមណ្ឌលសង្គមកិច្ចព្រៃស្ពឺនេះ កាលពីចុងឆ្នាំ២០១៤ រដ្ឋមន្ត្រីក្រសួងសង្គមកិច្ច លោក វង សូត បានសន្យានៅចំពោះមុខរដ្ឋសភា ខណៈដែលគណៈកម្មការទី៨រដ្ឋសភាកោះហៅឲ្យទៅចូលឆ្លើយបំភ្លឺថា នឹងធ្វើការកែប្រែឲ្យមានលក្ខខណ្ឌល្អប្រសើរ រាប់តាំងពីការគ្រប់គ្រង និងថែទាំអ្នកជំងឺនៅក្នុងមណ្ឌល ដើម្បីគេចផុតពីការរិះគន់ពីអង្គការសិទ្ធិមនុស្សនានា។ ការកែប្រែនោះត្រូវបានកត់សម្គាល់ថាមានការតម្លើងរបបអាហារ ដែលមានការកែប្រែអនុក្រឹត្យកាលពីឆ្នាំ២០០៦ ដោយតម្លើងរបបអាហារដល់ជនអនាថាក្នុងមណ្ឌលព្រៃស្ពឺពីពី១៥០០រៀល ទៅដល់ ៤០០០រៀល ក្នុងមួយថ្ងៃនៅដើមឆ្នាំ២០១៥ ព្រមទាំងកែលម្អឲ្យមានការបើកទូលាយសម្រាប់អង្គការសង្គមស៊ីវិលនានា និងសប្បុរសជន អាចចូលជួយមណ្ឌលទាំងអស់ផងដែរ មិនគិតថាតែមណ្ឌលព្រៃស្ពឺមួយទេ។
ក៏ប៉ុន្តែតាមរយៈសារបច្ចុប្បន្នភាពរបស់ប្រមុខរដ្ឋាភិបាលចំៗនៅពេលនេះ បង្ហាញថាការតាំងចិត្ត កែប្រែឲ្យមានលក្ខខណ្ឌល្អប្រសើរ ដែលបានលើកឡើងកន្លងមករបស់លោករដ្ឋមន្ត្រី ឬក៏ទម្លាក់ទៅក្នុងការទទួលខុសត្រូវរបស់សាលារាជធានីភ្នំពេញយ៉ាងណានោះ មិនត្រូវបានគេអនុវត្តទេ។ ប្រសិនបើមណ្ឌលព្រៃស្ពឺនេះបានធ្វើការកែប្រែមែននោះ នោះប្រហែលជាមិនត្រូវមាត់របស់ប្រមុខរដ្ឋាភិបាលឡើយ។
ហេតុដូច្នេះ ដើម្បីឲ្យយន្តការសង្គមកិច្ចជាពិសេស ការគ្រប់គ្រងជនអនាថា កុមារកំព្រាតាមផ្លូវថ្នល់ អ្នកសុំទាន ឬស្ត្រីរកស៊ីផ្លូវភេទជាដើមនោះ មានដំណើរការល្អ និងចៀសផុតពីការរិះគន់ពីសំណាក់មជ្ឈដ្ឋាននានានោះ គប្បីបង្ហាញពីតម្លាភាពឡើងវិញ។ តម្លាភាពតាមរយៈនៃការគ្រប់គ្រងមួយ ដែលផ្តោតទៅលើការគោរពសិទ្ធិពលរដ្ឋ ដែលត្រូវបានប្រមូលផ្តុំនៅក្នុងមណ្ឌល។ ផ្តល់សេវាអប់រំ និងបណ្តុះបណ្តាលវិជ្ជាជីវៈ នោះទើបអ្នកដែលត្រូវប្រមូលផ្តុំក្នុងមណ្ឌល ចេញមកវិញមិនជ្រើសរើសទៅផ្លូវដើម ដែលធ្វើឲ្យប៉ះពាល់ដល់សោភ័ណ្ឌភាព និងសណ្តាប់ធ្នាប់របស់សង្គម។ បើពុំនោះទេស្ថានភាពជនអនាថា អ្នកសុំទាន ឬស្ត្រីរកស៊ីផ្លូវភេទជាដើមនោះ ពិតជាមិនអាចដោះស្រាយបានទេ ហើយសង្គមនៅតែត្រូវគេមើលឃើញនូវរូបភាពមិនយកចិត្តទុកដាក់ដល់សិទ្ធិអ្នកក្រីក្រ និងជនអនាថាទាំងនោះ។
មួយវិញទៀត ប្រសិនបើគ្មានការតាំងចិត្ត ក្នុងការកែប្រែធ្វើឲ្យប្រសើរឡើងទេ ដូចជាការកត់សម្គាល់របស់លោកនាយករដ្ឋមន្ត្រីនាពេលនេះ ការបិទមណ្ឌលព្រៃស្ពឺនេះចោល អាចជាការព្រមាណដល់មណ្ឌលសង្គមកិច្ចផ្សេងៗទៀត ដែលនេះក៏បានបង្ហាញពីបរាជ័យនៅក្នុងការងាររបស់វិស័យសង្គមកិច្ច ដែលចាំបាច់ទាមទារឲ្យមានការកែទម្រង់ស៊ីជម្រៅលើបញ្ហានេះ ស្របតាមការប្តេជ្ញាចិត្តរបស់រដ្ឋាភិបាលចាប់តាំងពីដើមអាណត្តិទី៥ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ