ទូតកម្ពុជាប្រចាំនៅសិង្ហបុរី ប្រតិកម្មចំពោះការផ្សាយអវិជ្ជមានរបស់ CNA ស្តីពី ការវិនិយោគរបស់ចិននៅកម្ពុជា
ឯកអគ្គរាជទូតកម្ពុជាប្រចាំនៅសិង្ហបុរី បានប្រតិកម្មចំពោះទូរទស្សន៍ Channel News Asia (CNA)ដែលបានចុះផ្សាយពីអវិជ្ជមាន ជុំវិញការវិនិយោគរបស់ចិននៅក្នុងប្រទេសកម្ពុជា ជាពិសេសនៅក្នុងខេត្តព្រះសីហនុ។ តាមរយៈលិខិតកម្រាស់៣ទំព័រផ្ញើទៅកាន់ប្រធានប្រតិបត្តិនៃទូរទស្សន៍ដ៏មានប្រជាប្រិយភាពរបស់ប្រទេសសិង្ហបុរី កាលពីថ្ងៃទី ១២ មិថុនា ឯកអគ្គរាជទូតកម្ពុជាប្រចាំនៅសិង្ហបុរី បានចាត់ទុកការផ្សាយរបស់ទូរទស្សន៍សិង្ហបុរីថា គឺជាព័ត៌មានមិនពិត និងធ្វើឲ្យប៉ះពាល់ដល់កិត្តិយសរបស់កម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៧
ឯកអគ្គរាជទូតកម្ពុជាប្រចាំនៅសិង្ហបុរី លោក ងួន សុខវេង បានលើកឡើងថា លោកពិតជាមិនពេញចិត្តទាល់តែសោះចំពោះអត្ថបទដែលចុះផ្សាយដោយទូរទស្សន៍ Channel News Asia កាលពីថ្ងៃទី ០១ ខែកុម្ភៈ ដែលមានចំណងជើងថា «ការទូតមូលប្បទានប័ត្ររបស់ចិន»។ តាមរយៈលិខិតចុះថ្ងៃទី ១២ មិថុនា ផ្ញើទៅកាន់លោកស្រី ថាំ ឡុកខេង ប្រធានប្រតិបត្តិសាជីវកម្មផ្សព្វផ្សាយនៃទូរទស្សន៍ព័ត៌មានដ៏មានប្រជាប្រិយភាពរបស់ប្រទេសសិង្ហបុរីនេះ ថាជាអត្ថបទដែលមិនបានឆ្លុះបញ្ចាំងការពិតពីប្រទេសកម្ពុជាឡើយ។ ជាអត្ថបទដែលបានចុះផ្សាយដោយឈរលើព័ត៌មានតែមួយផ្នែក ហើយការវិភាគក៏មិនបានស៊ីជម្រៅ ជាពិសេសពាក់ព័ន្ធនឹងការអភិវឌ្ឍទីក្រុងព្រះសីហនុ និងបញ្ហាជម្លោះដីធ្លី ដែលនាំឲ្យប៉ះពាល់ដល់មុខមាត់ និងកិត្តិនាមរបស់ប្រទេសកម្ពុជា។
នៅក្នុងប្រតិកម្មតាមរយៈលិខិតដែលមានកម្រាស់៣ទំព័រនេះ ឯកអគ្គរាជទូតកម្ពុជាប្រចាំនៅសិង្ហបុរី ក៏បានបដិសេធចំពោះការចុះផ្សាយរបស់ទូរទស្សន៍នេះដែរថា កម្ពុជាកំពុងស្ថិតក្នុងគ្រោះថ្នាក់បាត់បង់ភាពបត់បែន ក្នុងការកំណត់ក្របខ័ណ្ឌនយោបាយការបរទេសឯករាជ្យរបស់ខ្លួន បន្ទាប់ពីបានធ្លាក់ជ្រៅទៅក្នុងរង្វង់ឥទ្ធិពលរបស់ចិន ដោយលើកជាឧទាហរណ៍ថា នៅឆ្នាំ ២០១៦ កម្ពុជាគឺជាអ្នកដែលបានរាំងស្ទះ ការចេញសេចក្តីថ្លែងការណ៍របស់អាស៊ាន ស្តីពីបញ្ហាសមុទ្រចិនខាងត្បូង ជាដើម។ ប៉ុន្តែនៅលើបញ្ហាសមុទ្រចិនខាងត្បូងនេះ កម្ពុជាដែលបានប្រកាន់ជំហរដោយឥតប្រែប្រួល ដោយកម្ពុជាក្នុងនាមជាប្រទេសដែលមិនពាក់ព័ន្ធនឹងការទាមទារអធិបតេយ្យភាពនៅក្នុងតំបន់នេះ មិនប្រកាន់ជំហរលំអៀងទៅភាគីណាមួយឡើយ។ ដោយឡែក ជុំវិញការចុះផ្សាយថា កម្ពុជាបាននិងកំពុងតែត្រូវបានស្រូបចូលទៅក្នុងអន្ទាក់បំណុលដកខ្លួនមិនរួច តាមរយៈការទទួលបានឥណទានដ៏ច្រើនមហិមា ការវិនិយោគ និងជំនួយហិរញ្ញវត្ថុពីប្រទេសចិនវិញ លោកឯកអគ្គរាជទូតកម្ពុជាបានពន្យល់ថា អ្វីដែលជាការពិតគឺ កម្ពុជានៅមានសមត្ថភាពអាចគ្រប់គ្រងគោលនយោបាយ សេដ្ឋកិច្ច និងហិរញ្ញវត្ថុរបស់ខ្លួនបាន។ យ៉ាងណាក៏ដោយ ឯកអគ្គរាជទូតកម្ពុជាប្រចាំនៅសិង្ហបុរី មិនបានប្តឹងទូរទស្សន៍របស់សិង្ហបុរីនេះទៅកាន់តុលាការឡើយ ដោយគ្រាន់តែទាមទារឲ្យទូរទស្សន៍ដ៏មានប្រជាប្រិយភាពរបស់សិង្ហបុរីនេះ ចុះផ្សាយប្រតិកម្មរបស់លោកទាំងស្រុងនៅក្នុងគេហទំព័របស់ Channel News Asia និងបានរំពឹងទុកថា នឹងមិនមានអត្ថបទដែលវាយប្រហារពីប្រទេសកម្ពុជា នៅថ្ងៃអនាគតទៀតឡើយ ខណៈលោកសម្គាល់ឃើញថា Channel News Asia នៅមានសេចក្តីរាយការណ៍ព័ត៌មានផ្សេងៗទៀត ដែលរំលេចទិដ្ឋភាពអវិជ្ជមាន ស្តីពី កម្ពុជា។
គួរជំរាបជូនថា ប្រតិកម្មរបស់ឯកអគ្គរាជទូតកម្ពុជាទៅនឹងទូរទស្សន៍សិង្ហបុរីនេះ ក៏បានធ្វើឡើងបន្ទាប់ពីមានការប៉ះពាក្យសម្តីគ្នាកាលពីសប្តាហ៍កន្លងទៅ រវាងនាយករដ្ឋមន្ត្រីសិង្ហបុរី លោក លី សៀនឡុង និងកម្ពុជា រួមទាំងវៀតណាមផងដែរ ជុំវិញការលើកឡើងថា «កងទ័ពវៀតណាមបានចូលឈា្លនពានប្រទេសកម្ពុជា»។ ក៏ប៉ុន្តែបញ្ហានេះ ក៏ត្រូវបានសម្របសម្រួលឲ្យស្ងប់ស្ងាត់ទៅវិញ បន្ទាប់ពីប្រមុខការទូតប្រទេសទាំង៣ បាននិយាយគ្នាតាមទូរស័ព្ទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ