CNRP បន្តពង្រឹងវប្បធម៌សន្ទនា តែទាមទារដោះលែងលោក អ៊ុំ សំអាន និងសមាជិករបស់ខ្លួន១៥នាក់ទៀត
លោក សុន ឆៃ ប្រធានក្រុមតំណាងរាស្រ្តគណបក្សសង្រ្គោះជាតិនៅថ្ងៃនេះ បានទាមទារឲ្យមានការដោះលែងសមាជិកសភាគណបក្សប្រឆាំងលោក អ៊ុំ សំអាន និងសមាជិករបស់ខ្លួនចំនួន១៥នាក់ផ្សេងទៀត។ ការអំពាវនាវបានធ្វើឡើងនៅក្នុងសន្និសីទកាសែតមួយ ដែលធ្វើឡើង នៅទីស្នាក់ការគណបក្សសង្រ្គោះជាតិនៅថ្ងៃនេះ។ គណបក្សសង្រ្គោះជាតិក៏បានប្រកាសជំហរថា នឹងធ្វើពហិការមិនចូលរួមប្រជុំសភានៅថ្ងៃនេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៧
ខណៈដែលគណៈកម្មាធិការអចិន្រ្តៃយ៍រដ្ឋសភា ដែលមកតែពីខាងគណបក្សប្រជាជនកម្ពុជា កំពុងបើកកិច្ចប្រជុំដើម្បីលើករបៀបវារៈស្តីពីអភ័យឯកសិទ្ធិសភារបស់លោក អ៊ុំ សំអាន នោះ ក្រុមអ្នកតំណាងរាស្រ្តគណបក្សសង្រ្គោះជាតិ ដែលដឹកនាំដោយលោក សុន ឆៃ ឯណោះវិញ ក៏បានធ្វើសន្និសីទកាសែតមួយ ដើម្បីប្រកាសពីជំហររបស់គណបក្សប្រឆាំង។
ជំហររបស់គណបក្សប្រឆាំង គឺនឹងមិនចូលរួមនៅក្នុងកិច្ចប្រជុំគណៈកម្មាធិការអចិន្រ្តៃយ៍សភា ដែលបានធ្វើឡើងកាលពីវេលាម៉ោង១០ព្រឹក និងការមិនចូលរួមនៅក្នុងកិច្ចប្រជុំសភាពេញអង្គ ដែលគ្រោងធ្វើឡើងនៅវេលាម៉ោង៤រសៀលថ្ងៃទី១២មេសានេះទេ។ ជាកិច្ចប្រជុំដែលក្រុមអ្នកតំណាងរាស្រ្តគណបក្សសង្រ្គោះជាតិជឿថា គឺដើម្បីដកអភ័យឯកសិទ្ធិសភារបស់លោក អ៊ុំ សំអាន ដើម្បីបើកផ្លូវឲ្យតុលាការក្រុងភ្នំពេញ បន្តនីតិវិធីទៅលើលោក អ៊ុំ សំអាន។ ប៉ុន្តែនៅក្នុងសន្និសីទកាសែតនៅឯទីស្នាក់ការគណបក្សនៅថ្ងៃនេះ លោក សុន ឆៃ ប្រធានក្រុមអ្នកតំណាងរាស្រ្តគណបក្សសង្រ្គោះជាតិបានលើកឡើងថា រដ្ឋសភានឹងមិនអាចប្រជុំដកអភ័យឯកសិទ្ធិរបស់លោក អ៊ុំ សំអាន បានទេ បើគ្មានការចូលរួមពីសមាជិកសភាគណបក្សសង្រ្គោះជាតិ។ បើតាមការពន្យល់របស់លោក សុន ឆៃ ដោយយោងទៅតាមមាត្រា៨០នៃរដ្ឋធម្មនុញ្ញ រដ្ឋសភាកម្ពុជាត្រូវការសម្លេងយ៉ាងហោចណាស់ ២/៣ ឬសមាជិកសភា៨៣រូបឡើងទៅ ដើម្បីប្រជុំដកអភ័យឯកសិទ្ធិសមាជិកសភាណាម្នាក់ និងសម្លេង៣/៤ ឬចំនួនសមាជិកសភា៩២រូបឡើងទៅ ដើម្បីប្រជុំបញ្ឈប់ការបន្តនីតិវិធីរបស់តុលាការក្នុងការឃាត់ខ្លួន ឬឃុំខ្លួនសមាជិកសភាណាម្នាក់។
ដូច្នេះ បើផ្អែកទៅលើសមាជិកសភារបស់គណបក្សប្រជាជនកម្ពុជាដែលបច្ចុប្បន្នមានតែ៦៨រូបនោះ នឹងមិនអាចប្រជុំដកអភ័យឯកសិទ្ធិសភាពីលោក អ៊ុំ សំអាន នៅថ្ងៃនេះបានទេ។
គួរជម្រាបជូនថា លោក អ៊ុំ សំអាន សមាជិកសភាគណបក្សសង្រ្គោះជាតិមណ្ឌលសៀមរាប ត្រូវបានអាជ្ញាធរកម្ពុជាចាប់ខ្លួនកាលពីយប់ថ្ងៃទី១០ខែមេសា នៅពេលលោកបានវិលត្រឡប់មកពីសហរដ្ឋអាមេរិកវិញ។ នៅមុននេះបន្តិច លោក អ៊ុំ សំអាន ត្រូវបានតុលាការក្រុងភ្នំពេញសម្រេចបញ្ជូនខ្លួនទៅឃុំឃាំងជាបណ្តោះអាសន្ននៅពន្ធនាគារព្រៃសរ ក្រោមបទចោទចំនួន២គឺបទញុះញង់ឲ្យប្រព្រឹត្តបទឧក្រិដ្ឋជាអាទិ៍ និង បទញុះញង់ឲ្យមានការរើសអើង តាមមាត្រា៤៩៥និង៤៩៦ នៃក្រមព្រហ្មទណ្ឌ។
នៅក្នុងសន្និសីទកាសែតកាលពីព្រឹកមិញ លោក សុន ឆៃ ប្រធានក្រុមតំណាងរាស្រ្តគណបក្សសង្រ្គោះជាតិ ដែលអង្គុយអមសងខាងដោយលោក អេង ឆៃអ៊ាង និងលោក ហូ វ៉ាន់ ថា គណបក្សសង្រ្គោះជាតិ នៅតែបន្តអនុវត្តនូវវប្បធម៌សន្ទនាជាមួយនឹងគណបក្សកាន់អំណាច តែបានទាមទារឲ្យមានការដោះលែង លោក អ៊ុំ សំអាន ជាបន្ទាន់ រួមទាំងសមាជិករបស់គណបក្សចំនួន១៥នាក់ផ្សេងទៀត ដែលកំពុងជាប់ឃុំឃាំងនៅក្នុងពន្ធនាគារព្រៃសរ។ លោក សុន ឆៃ បានហៅករណីរបស់លោក អ៊ុំ សំអានថា គឺជារឿងនយោបាយ ដូច្នេះ ត្រូវបញ្ចប់ដោយការចរចានយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ