តុលាការកំពូលបន្តឃុំខ្លួនលោក កឹម សុខា
លោក កឹម សុខា មិនត្រូវបានអនុញ្ញាតឲ្យនៅក្រៅឃុំឡើយ ក្រោយតុលាការកំពូលបញ្ចប់ការសួរដេញដោលជុំទី២ ពេញមួយព្រឹកថ្ងៃទី២២សីហានេះ។ សេចក្ដីសម្រេចនេះមិនបានធ្វើឲ្យអ្នកគាំទ្រ និងអតីតសហការី លោក កឹម សុខា ដែលជួបជុំនៅក្រៅរបងតុលាការអស់សង្ឃឹមឡើយ ព្រោះពួកគេជឿជាក់ថា លោក កឹម សុខា នឹងត្រូវដោះលែងក្នុងពេលឆាប់ៗនេះ។
ចុះផ្សាយនៅថ្ងៃ៖
ស្តាប់ - ០២:១០
ការសួរដេញដោលលើសំណុំរឿងលោក កឹម សុខា នៅក្នុងជុំទី២នេះ បានបិទបញ្ចប់នៅម៉ោង១២ថ្ងៃត្រង់នេះ ដោយតុលាការកំពូលប្រកាសតម្កល់សេចក្ដីសម្រេចរបស់តុលាការឧទ្ធរណ៍ទុកជាបានការដដែល។ ពោល គឺលោក កឹម សុខា នឹងត្រូវបន្តឃុំខ្លួនតទៅទៀត។
ថ្លែងបន្ទាប់ពីចេញពីតុលាការកំពូល លោក ផែង ហេង តំណាងក្រុមមេធាវីការពារក្ដីឲ្យលោក កឹម សុខា បានគូសបញ្ជាក់ថា ជារឿងដ៏គួរឲ្យសោកស្ដាយដែលតុលាការកំពូលបន្តឃុំខ្លួន លោក កឹម សុខា ទាំងដែលមេធាវីព្យាយាមបង្ហាញភស្តុតាងជាច្រើនដើម្បីជាការដោះបន្ទុកទៅហើយនោះ។ ឆ្លើយទៅនឹងសំណួរថា តើមេធាវីធ្វើអ្វីបន្តទៀតដើម្បីឲ្យលោក កឹម សុខា បាននៅក្រៅឃុំ ? លោក ផែង ហេង នឹងជជែកបន្ថែមជាមួយកូនក្ដីលោក កឹម សុខា ។
សូមបញ្ជាក់ផងដែរថា នៅក្នុងសវនាការសួរដេញដោលនៅពេញមួយព្រឹកមិញនេះ លោក កឹម សុខា ដែលបច្ចុប្បន្នជាប់ពន្ធនាគារត្រពាំងថ្លុង ខេត្តត្បូងឃ្មុំ ជិត១ឆ្នាំ ហើយនោះ ពុំត្រូវបានបញ្ជូនមកចូលរួមសវនាការ ឡើយ។
អ្វីជាការកត់សម្គាល់មុនសេចក្ដីសម្រេចរបស់តុលាការកំពូលដែលបន្តឃុំខ្លួនលោក កឹម សុខា ដដែល អតីតសហការីធ្លាប់រួមការងារជាមួយលោក កឹម សុខា មិនភ្ញាក់ផ្អើលនឹងសេចក្ដីសម្រេចរបស់តុលាការ ឡើយព្រោះដឹងថា លោក កឹម សុខា នឹងមិនត្រូវបានដោះលែងនៅថ្ងៃពុធនេះឡើយ។ ប៉ុន្តែ លោក កឹម សុខា អាចនឹងដោះលែងនៅក្នុងពេលឆាប់ៗនេះវិញ។
លោក អ៊ូ ច័ន្ទរ័ត្ន អតីតអ្នកតំណាងរាស្ត្រនៃអតីតគណបក្សសង្គ្រោះជាតិដែលចូលរួមអង្កេតដំណើរការសវនាការថ្លែងថា ករណីលោក កឹម សុខា ខុសគ្នាពីករណីសកម្មជនដី អ្នកស្រី ទេព វន្នី និងលោក គឹម សុខ និងអតីតអ្នកកាសែតវិទ្យុអាស៊ីសេរី ។ ដូច្នេះតុលាការមិនអាចធ្វើការដោះលែងលោក កឹម សុខា ភ្លាមៗបានទេ ដោយត្រូវរង់ចាំសភាពការណ៍ពីសហគមន៍អន្តរជាតិ ជាអ្វីដែលលោក អ៊ូ ចន្ទរ័ត្ន យល់ថាជាសម្ពាធឲ្យមានការដោះលែងលោក កឹម សុខា ។
គួរបញ្ជាក់ថា លោក កឹម សុខា ត្រូវបានចោទប្រកាន់ពីបទសន្ទិដ្ឋិភាពជាមួយបរទេស តាមមាត្រា ៤៤៣ នៃក្រមព្រហ្មទណ្ឌ។ បទសន្ទិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឲ្យមានអំពើប្រទូស្តរ៉ាយ ឬឲ្យមានអំពើឈ្លានពានប្រឆាំងនឹងកម្ពុជា។ បទល្មើសនេះ ត្រូវជាប់ពន្ធនាគារពី ១៥ ដល់ ៣០ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ