សម័យបច្ចេកវិទ្យាសតវត្សទី២១ គ្រូបង្រៀនខ្មែរខ្លះមិនទាន់ចេះប្រើកុំព្យូទ័រ!
ចុះផ្សាយនៅថ្ងៃ៖
ស្តាប់ - ០៤:៥៩
ពីម្សិលមិញ ក្នុងពិធីបើកកិច្ចប្រជុំប្រចាំឆ្នាំក្រុមការងារគ្រូបង្រៀនអន្តរជាតិ នៅខេត្តសៀមរាប, លោករដ្ឋមន្ត្រីអប់រំ បានទទួលស្គាល់ថា គុណភាពគ្រូបង្រៀនសព្វថ្ងៃ គឺនៅមានបញ្ហា។ បញ្ហាត្រង់ថា មានគ្រូបង្រៀនខ្លះ នៅមិនទាន់មានសមត្ថភាពនិងចំណេះដឹងច្រើននៅឡើយ ពីប្រព័ន្ធបច្ចេកវិទ្យា។ ការមិនសូវយល់ដឹងពីប្រព័ន្ធបច្ចេកវិទ្យានេះ គឺអាចធ្វើឲ្យគ្រូបង្រៀនមួយចំនួន ដើរមិនទាន់កូនសិស្សសម័យទំនើប។
នៅក្នុងសម័យកាលកំណែទម្រង់អប់រំនេះ ក្រសួង បាននិងកំពុងយកចិត្តទុកដាក់ទៅលើការអភិវឌ្ឍការអប់រំជាពិសេស ចំពោះវិស័យអប់រំវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា ដើម្បីបំពេញតម្រូវការទីផ្សារ។ បើនិយាយផ្តោតតែទៅលើវិស័យបច្ចេកវិទ្យា ពាក់ព័ន្ធកុំព្យូទ័រនិងអ៊ិនធឺណិតជាដើម ក្រសួងអប់រំបានចុះអនុស្សារណៈជាមួយក្រុមហ៊ុន Microsoft ហើយក្រុមហ៊ុនទូរសព្ទមួយនៅក្នុងស្រុក ក៏បានជួយផ្គត់ផ្គង់បំពាក់កុំព្យូទ័រ និងសេវាអ៊ិនធឺណិត ឲ្យដល់សាលារៀនមួយចំនួនផងដែរ។ ប៉ុន្តែវានៅមិនទាន់គ្រប់គ្រន់នៅឡើយបើប្រៀបនឹងចំនួនសាលារៀនរដ្ឋរាប់ម៉ឺនគ្រឹះស្ថាននោះ ដោយសារតែគម្រោងនេះ គឺវាមានតិចតួច និងមានតែនៅតាមតំបន់សាលាក្នុងទីប្រជុំជន និងទីក្រុងតែប៉ុណ្ណោះ។
បញ្ហាដែលគេមើលឃើញជាក់ស្តែងហើយថា មេរៀនស្តីពីកុំព្យូទ័រនិងអ៊ិនធឺណិត មិនទាន់ត្រូវបានដាក់បង្រៀនជាទូទៅនៅក្នុងសាលាសាធារណៈរបស់រដ្ឋ ឲ្យទូលំទូលាយនៅឡើយទេ បើជាបីជាសម័យសតវត្សទី២១ ដែលជាសម័យបច្ចេកវិទ្យាទៅហើយក្តី។ មានគ្រូបង្រៀនអាយុច្រើន និងសល់ពីសង្គមចាស់មួយចំនួន គឺមិនទាន់ចេះប្រើកុំព្យូទ័រ និងនិយាយដោយឡែក គឺមិនសូវមានមូលដ្ឋានចំណេះដឹងនៃការវិវត្តរបស់ប្រព័ន្ធបច្ចេកវិទ្យាតែម្តង។ ចំណែកកូនសិស្សភាគច្រើននៅតាមទីជនបទវិញ អ្នកខ្លះក៏ពុំមានលទ្ធភាពរៀនសូត្រពីវិស័យនេះ បានច្រើននៅឡើយ។ កូនសិស្សខ្លះ ក៏ស្ទើរតែមិនទាន់មានលទ្ធភាពទិញទូរសព្ទទំនើប Smart Phone ដែលអាចប្រើប្រាស់អ៊ិនធឺណិត បាននៅឡើយផង។
នៅក្នុងដំណាក់កាលដែលមិនទាន់ដំណើរការស្រួលបួល និងគ្មានគ្រឿងបរិក្ខាគ្រប់គ្រាន់នៅសាលារដ្ឋយ៉ាងដូច្នេះ! ជំហានដំបូង គ្រូបង្រៀនខ្លួនឯងផ្ទាល់ គួរតែគិតគូរចាប់ផ្តើមពីការពង្រឹងនិងពង្រីកសមត្ថភាព ចំណេះដឹងរបស់ខ្លួនជាមុនសិន នៅក្នុងវិស័យបច្ចេកវិទ្យាទំនើបនេះ។ ការដើរឲ្យទាន់បច្ចេកវិទ្យា គឺជួយសម្រួលដល់ការបង្រៀនរបស់គ្រូ កាន់តែមានប្រសិទ្ធភាព។ ហើយវានឹងជួយអភិវឌ្ឍចំណេះដឹងរបស់គ្រូ ទៅលើមុខវិជ្ជាដែលខ្លួនបង្រៀន និងបញ្ជ្រាបចំណេះដឹងសកលជាច្រើនទៀត តាមរយៈស្រាវជ្រាវបន្ថែម ក្នុងប្រព័ន្ធអ៊ិនធឺណិត។
ចំណែកឯការឈ្វេងយល់ពីកម្មវិធីមួយចំនួនជាមូលដ្ឋានរបស់កុំព្យូទ័រ និងការវិវត្តថ្មីៗរបស់បច្ចេកវិទ្យានោះទៀតសោត គឺធ្វើឲ្យលោកគ្រូអ្នកគ្រូ អាចយកទៅពន្យល់កូនសិស្សបានងាយឆាប់យល់ ហើយការបង្រៀនដើរទាន់បច្ចុប្បន្នភាព។ លើសពីនេះ នៅពេលដែលគ្រូបង្រៀន យល់ច្បាស់ពីប្រព័ន្ធបច្ចេកវិទ្យាអ៊ិនធឺណិត គឺអាចនឹងណែនាំឬចែករំលែកចំណុចណាដែលកូនសិស្សគួរជៀសវៀងនិងត្រូវប្រុងប្រយ័ត្នដើម្បីរក្សាសុវត្ថិភាព ក្នុងពេលប្រើប្រព័ន្ធអ៊ិនធឺណិត ឬក៏បណ្តាញសង្គមនានា ជាដើម។
ប្រការដែលគ្រូបង្រៀនដើរទាន់សម័យកាលទំនើបនេះ គឺនឹងទទួលការគោរពកោតសរសើរពីកូនសិស្ស និងធានាបាននូវការប្រសិទ្ធភាពនៃការអប់រំ។ បើពុំដូច្នោះទេ កូនសិស្សមួយចំនួនក្នុងសម័យទំនើបនេះ នឹងវ៉ាដាច់គ្រូបង្រៀន ក៏អាចថាបាន។
ក្រៅពីការខំប្រឹងប្រែងរបស់តាមលទ្ធភាពរបស់គ្រូដោយខ្លួនឯង ក្រសួងនិងស្ថាប័នមានសមត្ថកិច្ច ពិសេសក្រសួងអប់រំ និង ក្រសួងប្រៃសណីយ៍និងទូរគមនាគមន៍ តែម្តង ត្រូវតែបង្កើតវគ្គបណ្តុះបណ្តាល ដូចជាវគ្គបំបិនខ្លីៗ ជាដើមឲ្យបានច្រើន និងទៀតទាត់ ជូនដល់លោកគ្រូអ្នកគ្រូជាទូទៅ ឲ្យលោកយល់ពីការប្រើប្រាស់ប្រព័ន្ធបច្ចេកវិទ្យា និងការវិវត្តនៃវិស័យនេះ។
ដោយឡែក ចំពោះការបណ្តុះបណ្តាលគរុសិស្ស គឺត្រូវតែការបង្រៀនពីបច្ចេកវិទ្យាកុំព្យូទ័រស្រេចឲ្យហើយ ព្រោះថានៅពេលដែលគរុសិស្សទាំងនោះ រៀនចប់ និងចេញទៅបង្រៀន គឺពួកគេនឹងមានចំណេះដឹងមូលដ្ឋានបច្ចេកវិទ្យាស្រាប់ ដើម្បីយកទៅបង្រៀនសិស្សតែម្តង។
ជាមួយគ្នានេះ អាជ្ញាធរសាធារណៈ គប្បីតែមានគោលនយោបាយបំពាក់ប្រព័ន្ធអ៊ិនធឺណិតនិងកុំព្យូទ័រ យ៉ាងតិចក្នុងចំនួនណាមួយ សម្រាប់នៅសាលានីមួយៗទូទាំងប្រទេស។ លើសពីនេះ គេគួរត្រូវតែជំរុញការបង្កើនបញ្ចប់ថវិកា ចំពោះការអភិវឌ្ឍវិស័យអប់រំផ្នែកព័ត៌មាននិងទំនាក់ទំនងបច្ចេកវិទ្យាទំនើប (ICT)។ គម្រោងនេះ គឺទាល់តែមានការជួយទំនុកបម្រុងពីវិស័យឯកជន និងការជួយគាំទ្រពីរដ្ឋាភិបាល ទើបអាចទៅរួច។
ទោះជាយ៉ាងណាក្តី អ្នកតម្រង់ទិសសង្គមទាំងឡាយ ទំនងជាមិនចង់ឃើញថា ក្នុងសម័យអភិវឌ្ឍន៍សតវត្សទី២១ទៅហើយ គ្រូបង្រៀនខ្មែរមិនទាន់ចេះប្រើកុំព្យូទ័រ និងដើរតាមមិនទាន់បច្ចេកវិទ្យា ទៀតនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ