សមាគមធាងត្នោត៖ ការអភិវឌ្ឍនៅភ្នំពេញ ជា«សន្យាខ្យល់»
នៅថ្ងៃនេះ សមាគមធាងត្នោត បានចេញរបាយការណ៍ បង្ហាញថា ការអភិវឌ្ឍ គឺជាកត្តាដែលជំរុញឲ្យមានការបណ្ដេញចេញក្នុងក្រុងភ្នំពេញ។ ការស្រាវជ្រាវនេះ មានចំណងជើងថា «សន្យាខ្យល់» ដែលសិក្សាទៅលើការអភិវឌ្ឍ នៅត្រង់ទីតាំងបណ្តេញចេញ ទាំង៧៧កន្លែង នៅភ្នំពេញ។ តាមសមាគមធាងត្នោត, ការបណ្តេញចេញក្រោមលេសអភិវឌ្ឍ គឺគ្មានបានធ្វើឲ្យជីវភាពពលរដ្ឋប្រសើរឡើយ គឺមានតែធ្វើឲ្យប្រជាពលរដ្ឋហូរទឹកភ្នែក និងទទួលរកទុក្ខវេទនាជាច្រើន ដោយសារតែគ្មានសំណងត្រឹមត្រូវ ហើយកន្លែងរស់នៅថ្មី ក៏គ្មានសេវាសង្គមត្រឹមត្រូវ។
ចុះផ្សាយនៅថ្ងៃ៖
ស្តាប់ - ០២:៣០
របាយការណ៍«សន្យាខ្យល់» មានកម្រាស់ប្រមាណ ៦០ទំព័រជាភាសាខ្មែរ ហើយជាអង់គ្លេសប្រហែល៥០ទំព័រ បានបញ្ជាក់ថា នៅភ្នំពេញ ជាទូទៅ គេដឹងឮច្រើនតែពីការបណ្តេញចេញដោយបង្ខំ នៅសហគមន៍បឹងកក់ និងសហគមន៍បុរីកីឡា ក៏ប៉ុន្តែតាមពិតជាក់ស្តែង គឺមានសហគមន៍ជាច្រើនផ្សេងទៀត ដែលរងការបណ្តេញចេញដោយបង្ខំ និងដោយគ្មានសំណងសមរម្យ ដែលសរុប មានរហូតដល់ចំនួន៧៧កន្លែងឯណោះ។ នៅក្នុងរបាយការណ៍នេះ គឺមានបញ្ជាក់ឈ្មោះទីតាំងជាក់លាក់ ព្រមទាំងគូសផែនបង្ហាញទៀតផង។
តាមការសិក្សាដដែល ជាទូទៅ មូលហេតុនៃការបណ្ដេញចេញដោយបង្ខំ ទាំង៧៧កន្លែងនោះ គឺក្រោមហេតុផលអភិវឌ្ឍន៍ និងដើម្បីសោភ័ណភាពរាជធានីភ្នំពេញ។ ការសិក្សាស្រាវជ្រាវលើនេះ បានរកឃើញថា មានតែ៣៥% នៃទីតាំងទាំង៧៧នោះ មានការអភិវឌ្ឍពេញលេញ, ៤០% មានការអភិវឌ្ឍខ្លះៗ ចំណែក ២៥% មិនទាន់មានការអភិវឌ្ឍអ្វីសោះ។
ចំពោះផលប៉ះពាល់នៃការបណ្តេញចេញ ត្រូវបានឆ្លុះបង្ហាញក្នុងរបាយការណ៍នេះផងដែរថា ពលរដ្ឋដែលទៅរស់នៅកន្លែងថ្មី ឆ្ងាយពីកន្លែងរកស៊ី ឆ្ងាយផ្សារ ឆ្ងាយសាលា ខ្វះសេវាសង្គម គ្មានទឹកគ្មានភ្លើង គ្មានអនាម័យ។ មិនតែប៉ុណ្ណោះ អ្នកខ្លះបាត់បង់ការងារ ព្រមទាំងប៉ះពាល់ដល់សុខភាពទៀតផង។ ពួកគេខ្លះ មានវិបត្តិផ្លូវចិត្ត ព្រួយបារម្ភច្រើន ដេកមិនបាន អស់កម្លាំង ស្មារតីធ្លាក់ចុះ ធ្លាក់ទឹកចិត្ត ឥតក្តីសង្ឃឹម ហើយអ្នកខ្លះ រហូតដល់ឈានទៅមានគំនិតចង់ធ្វើអត្តឃាត។ ចំណែកអ្នកដែលងើបតវ៉ាវិញ ត្រូវអាជ្ញាធរវាយបង្ក្រាប ធ្វើឲ្យរបួស ស្ត្រីខ្លះរលូតកូន ហើយអ្នកខ្លះ កំពុងតែជាប់ក្នុងពន្ធនាគារនៅឡើយ។
ទោះយ៉ាងនេះក្តី វាគ្មិនដែលបកស្រាយនៅក្នុងពេលបង្ហាញរបាយការណ៍នេះ កត់សម្គាល់ថា នៅក្នុងអាណត្តិទី៤ គឺការបណ្តេញពលរដ្ឋឲ្យចេញពីភ្នំពេញ គឺមានចំនួនច្រើនយ៉ាងគំហុក និងយ៉ាងសាហាវឃោរឃៅ ក៏ប៉ុន្តែនៅក្នុងអាណត្តិទី៥នេះ មធ្យោបាយដែលអាជ្ញាធរបណ្តេញគឺមានភាពទន់ភ្លន់ជាងមុន ហើយក៏បានថយចំនួនជាងមុនខ្លះដែរ។
អ្នកជំនាញខាងសិទ្ធិដីធ្លីនិងពលរដ្ឋរងគ្រោះ ដែលចូលរួមពិធីបង្ហាញរបាយការណ៍«សន្យាខ្យល់» នេះ បញ្ជាក់ដែរថា គម្រោងអភិវឌ្ឍអគារប៊ូលឌីងស នៅពេលបច្ចុប្បន្ននេះ គឺឃើញថា មានការអនុញ្ញាតឲ្យមានការចូលរួមពីសំណាក់ពលរដ្ឋច្រើន តែមានពលរដ្ឋខ្លះ ក៏នៅតែព្រួយបារម្ភពីការសន្យារបស់អាជ្ញាធរដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ