វេទិកាស្តី្រ ជជែកដេញដោល ពីភាពជាអ្នកដឹកនាំធ្វើឡើងនៅថ្ងៃស្អែកនេះ
អ្នកដឹកនាំស្រ្តីកម្ពុជា ១៦រូប នឹងចូលរួមប្រកួតជជែកដេញដោលគំនិត ដើម្បីពង្រីកភាពជាអ្នកដឹកនាំ នៅក្នុងវេទិកាស្ត្រីជជែកដេញដោល ពីភាពជាអ្នកដឹកនាំ ឬThe Women Debate on Leadership នៅរសៀលថ្ងៃពុធ ទី១១ វិច្ឆិកា ស្អែកនេះ ចាប់ពីម៉ោង ១រសៀល ដល់ម៉ោង៨យប់ នៅឯមណ្ឌលសហប្រតិបត្តិការកម្ពុជាជប៉ុន CJCC។
ចុះផ្សាយនៅថ្ងៃ៖
ស្តាប់ - ០១:២៨
លោកហោ ចាន់រដ្ឋា អ្នកស្រាវជ្រាវភាពជាអ្នកដឹកនាំនៅមជ្ឈមណ្ឌលរដ្ឋាលីដឌីង បានបញ្ជាក់ប្រាប់វិទ្យុបារាំងថា កម្មវិធីនេះត្រូវបានធ្វើឡើង ដើម្បីសមត្ថភាពនិងចំណេះដឹងរបស់អ្នកដឹកនាំ ដែលមានតួនាទីជាអ្នកដឹកនាំ ឲ្យបន្តធ្វើការអភិវឌ្ឍស្មារតីនិងភាពជាអ្នកដឹកនាំរបស់ខ្លួនឲ្យបានល្អប្រសើរឡើង។
អ្នកដឹកនាំស្រ្តីទាំង១៦រូប ដែលត្រូវចូលរួមក្នុងការប្រកួតជជែកដេញដោលនេះ នឹងត្រូវឆ្លងកាត់ការប្រកួតជម្រុះ៤វគ្គ ហើយក្នុងមួយវគ្គៗ គឺមានប្រធានបទផ្សេងគ្នាៗ ដែលលើកឡើងពីការដឹកនាំ។ ប្រធានបទទាំងនោះមានដូចជា ជីវិតគឺជាការជ្រើសរើស ភាពជាអ្នកដឹកនាំ ឬភាពជាអ្នករងគ្រោះ, កូនក្មេងដែលមិនអាចក្លាយជាអ្នកដឹកនាំ គឺជាកំហុសរបស់ឪពុកម្តាយ, អ្នករៀនបានតិច គឺមិនអាចក្លាយជាអ្នកដឹកនាំល្អទេ, ស្ត្រីខ្មែរ គឺមានការលំបាកណាស់ក្នុងការក្លាយជាអ្នកដឹកនាំស្ថាប័ន, បញ្ហាយុវជន មានស្នេហាទាំងនៅវ័យក្មេង, បញ្ហាស្ត្រីខ្មែរ រៀបការទៅបរទេស និងបញ្ហាបុគ្គលិកធ្វើការមិនឡើងឋានៈជាដើម។
អ្នករៀបចំកម្មវិធីនេះ រំពឹងថានឹងមានអ្នកចូលរួមប្រមាណជា៤០០នាក់ ដែលក្នុងនោះមានសិស្សនិស្សិត បុគ្គលិក សាស្រ្តាចារ្យ ម្ចាស់អាជីវកម្ម និងអ្នកដឹកនាំស្ថាប័នផ្សេងៗនៅកម្ពុជា។
សូមបញ្ជាក់ថា កម្មវិធីនេះត្រូវបានរៀបចំសហការដោយក្រសួងកិច្ចការនារី សមាគមសហគ្រិនស្ត្រីកម្ពុជា មជ្ឈមណ្ឌលសហប្រតិបត្តិការកម្ពុជាជប៉ុន និងមជ្ឈមណ្ឌលសិក្សាស្រាវជ្រាវ និងបង្កើតភាពជាអ្នកដឹកនាំរដ្ឋាលីដឌីង។ ខ្លឹមសារនៃកម្មវិធី ក៏នឹងត្រូវចងក្រងទៅក្នុងគេហទំព័រ សៀវភៅ និងទស្សនាវដ្តីស្រាវជ្រាវភាពជាអ្នកដឹកនាំ ហើយនឹងធ្វើការផ្សព្វផ្សាយជាសាធារណៈផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ