សង្គមស៊ីវិល៖ ការផ្អាកធ្វើប័ណ្ណបើកបរ អាចប៉ះពាល់ដល់ការអនុវត្តច្បាប់ចរាចរណ៍ផ្លូវគោក
កាលពីថ្ងៃម្សិលមិញ លោកនាយករដ្ឋមន្ត្រីហ៊ុន សែន បានបញ្ជាអោយផ្អាកការធ្វើប័ណ្ណបើកបរ ជាបណ្តោះអាសន្នសិន ដើម្បីទុកពេលអោយរដ្ឋាភិបាលធ្វើការសិក្សាឡើងវិញនូវនីតិវិធី និងកម្រៃនៃការបង់សេវាសាធារណៈ។ ការផ្អាកនេះ អាចនឹងប៉ះពាល់ដល់ការអនុវត្តច្បាប់ចរាចរណ៍ផ្លូវគោក ដែលនឹងត្រូវដាក់អោយអនុវត្តនៅដើមឆ្នាំ២០១៦។ នេះបើតាមអង្គការសង្គមស៊ីវិលមួយចំនួន ដែលធ្វើការពាក់ព័ន្ធនឹងសុវត្ថិភាពចរាចរណ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
លោកអ៊ា ចរិយា នាយកវិទ្យាស្ថានសុវត្ថិភាពចរាចរណ៍ និយាយថា ការផ្អាកធ្វើប័ណ្ណបើកបរជាបណ្តោះអាសន្ន អាចនឹងប៉ះពាល់ដល់មាត្រា៧៥ នៃច្បាប់ចរាចរណ៍ផ្លូវគោកថ្មី ដែលនិយាយអំពីការផ្ទន្ទាទោសអ្នកបើកបរយានយន្តដែលគ្មានប័ណ្ណបើកបរ។
លោក ចរិយា បន្តថា បើតាមបញ្ជារបស់លោក ហ៊ុន សែន ក្រសួងមហាផ្ទៃ និងក្រសួងសាធារណការនិងដឹកជញ្ជូន ព្រមទាំងស្ថាប័នពាក់ព័ន្ធ អាចនឹងពន្យារការអនុវត្តមាត្រានេះ រហូតដល់មានការជូនដំណឹងជាថ្មី។ ទោះយ៉ាងណា លោកថា រដ្ឋាភិបាលអាចអនុវត្តមាត្រាផ្សេងៗទៀតរបស់ច្បាប់ចរាចរណ៍ ដែលមិនទាក់ទងនឹងការបញ្ជារបស់លោកនាយករដ្ឋមន្ត្រី។
ចំណែកលោក គុំ អ៊ុយនិច មន្ត្រីកម្មវិធី នៃវិទ្យាស្ថានតស៊ូមតិ និងគោលនយោបាយ ដែលធ្វើការទាក់ទងនឹងសុវត្ថិភាពចរាចរណ៍នេះដែរ និយាយថា បើទោះជាច្បាប់មានវិសាលភាពធំជាង បញ្ជានាយករដ្ឋមន្ត្រីក៏ដោយ ក៏លោកជឿថា មន្ត្រីថ្នាក់ក្រោមនឹងមិនទាន់អនុវត្តមាត្រា៧៥ នេះនោះទេ។
ទាក់ទងនឹងរឿងនេះ លោក ឧត្តមសេនីយ៍ឯក រុន រ័ត្នវាសនា ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ និយាយថា ការអនុវត្តច្បាប់ចរាចរណ៍ផ្លូវគោក នឹងត្រូវអនុវត្តគ្រប់មាត្រាទាំងអស់ នៅឆ្នាំ២០១៦នេះ លើកលែងតែមានសេចក្តីណែនាំថ្មី។ លោកថា នៅថ្ងៃស្អែក មន្ត្រីរបស់ក្រសួង និងស្ថាប័នពាក់ព័ន្ធ នឹងប្រជុំពិភាក្សា លើបទបញ្ជារបស់លោកនាយករដ្ឋមន្ត្រី។
សូមបញ្ជាក់ថា មាត្រា៧៥ នៃច្បាប់ចរាចរណ៍ផ្លូវគោកថ្មីបានចែងអំពី ការផ្តន្ទាទោសដាក់ពន្ធនាគារ និងពិន័យជាប្រាក់ ចំពោះជនណាដែលបើកបរយានយន្តដោយគ្មានប័ណ្ណបើកបរ ឬក្នុងរយៈពេលដែលប័ណ្ណបើកបរត្រូវបានដកហូត ព្យួរទុក ឬទុកជាមោឃៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ