វៀតណាមបង្ហាញពីភាពជិតស្និទជាមួយកម្ពុជាបើទោះបីធ្លាប់អន់ចិត្ត
ប្រធានាធិបតីវៀតណាមថ្មី លោក ត្រាន់ ដាយខ្វាង បានបើកជំនួបកំពូលជាផ្លូវការមួយសេរីជាមួយមេដឹកនាំកម្ពុជា ដែលរួមទាំងបង្គំគាល់ព្រះមហាក្សត្រកម្ពុជាផងដែរ។ ប្រធានាធិបតីវៀតណាម បានអះអាងថាកម្ពុជានិងវៀតណាម គឺនៅតែជាបងប្អូន។ ប៉ុន្តែអ្នកវិភាគកិច្ចការបរទេសបានព្រួយបារម្ភពីឥទ្ធិពលរបស់វៀតណាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
កម្ពុជានិងវៀតណាម គឺនៅតែជាបងប្អូន ហើយប្រទេសទាំងពីរនៅតែមានចំណងមិត្តភាព និងកិច្ចសហប្រតិបត្តិការយូរអង្វែង។ នេះគឺជាពាក្យពេចន៍ ដែលប្រធានាធិបតីវៀតណាម បាននិយាយទៅកាន់លោក ហេង សំរិន ប្រធានរដ្ឋសភា ក្នុងជំនួបនៅរសៀលថ្ងៃទី ១៥ ខែមិថុនានេះតាមរយៈអ្នកនាំពាក្យកិច្ចប្រជុំ។ ការលើកឡើងពីទំនាក់ទំនងល្អនេះ បើទោះបីជាប្រទេសទាំងពីរធ្លាប់អន់ចិត្តក្នុងបញ្ហាមួយចំនួននាពេលថ្មីៗនេះក៏ដោយ។ លោកត្រាន់ ដាយខ្វាងបានកំពុងបំពេញទស្សនៈ ៣ ថ្ងៃនៅកម្ពុជាពីថ្ងៃទី ១៤ដល់ថ្ងៃទី ១៦មិថុនានេះ។ ក្នុងជំនួបនៅកម្ពុជា លោកប្រធានាធិបតីថ្មីបានចូលបង្គំគាល់ព្រះមហាក្សត្រកម្ពុជាលោក សាយ ឈុំប្រធានព្រឹទ្ធសភា លោកហេង សំរិន ប្រធានរដ្ឋសភា និងលោកនាយករដ្ឋមន្ត្រីហ៊ុន សែន។ ក្រៅពីនោះ ប្រធានាធិបតីថ្មី នឹងជំនួបជាមួយសម្តេចសង្ឃកម្ពុជាទាំងពីរគណៈផងដែរ។
អ្នកវិភាគលោក បណ្ឌិត ចាន់ វិបុល បានព្រួយបារម្ភពីឥទ្ធិពលវៀតណាមនៅកម្ពុជា ព្រោះថាវៀតណាមធ្លាប់មានឥទ្ធិពលមកលើកម្ពុជាខ្លាំង ជាពិសេសក្រោយឆ្នាំ ១៩៧៩ដែលវៀតណាមជាគាំទ្រផ្តួលរំលំរបបប៉ុលពត។ ប៉ុន្តែរដ្ឋាភិបាលកម្ពុជា បានបដិសេធពីឥទ្ធិពលរបស់វៀតណាមតាមរយៈដំណើរទស្សនៈកិច្ចរបស់ប្រធានាធិបតីវៀតណាមនេះ។ លោកផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានលើកឡើងថា ដំណើរទស្សនៈកិច្ចនេះ គឺជាកិច្ចការអន្តរជាតិ ដែលប្រទេសនីមួយៗត្រូវតែធ្វើក្នុងពេល ដែលទើបឡើងកាន់អំណាច សូម្បីតែកម្ពុជាក៏ត្រូវបង្ហាញខ្លួនទៅកាន់អន្តរជាតិផងដែរប្រសិនបើកម្ពុជាមាននាយករដ្ឋមន្ត្រីថ្មី ឬព្រះមហាក្សត្រថ្មី។
យ៉ាងណាក៏ដោយកម្ពុជា និងវៀតណាមធ្លាប់អន់ចិត្តនឹងគ្នានារយៈពេលចុងក្រោយនេះ ជាពិសេសអំឡុងឆ្នាំ២០១២ ដែលកម្ពុជាជាប្រធានអាស៊ាន ហើយមិនព្រមដាក់របៀបវារៈស្តីពីសមុទ្រចិនខាងត្បូងចូលក្នុងកិច្ចប្រជុំកំពូល។ ក្រៅពីនេះ កម្ពុជាបានបដិសេធធ្វើតាមសំណើរបស់រដ្ឋាភិបាលក្រុងហាណូយ ទាមទារចាត់វិធានការផ្លូវច្បាប់ប្រឆាំងនឹងព្រះសង្ឃ ដែលបានដុតទង់ជាតិវៀតណាមអំឡុងពេលបាតុកម្មនៅទីក្រុងភ្នំពេញ។ កម្ពុជាជាមិត្តយុទ្ធសាស្ត្រគ្រប់ជ្រុងជ្រោយជាមួយមហាយក្សចិន បន្ថែមពីលើនេះកម្ពុជាកំពុងពង្រឹងទំនាក់ទំនងបន្ថែមទៀតជាមួយរុស្ស៊ី ខណៈដែលទំនាក់ទំនងកម្ពុជានឹងអាមេរិកកាំងនៅតែបន្ត។
រដ្ឋាភិបាលកម្ពុជាបានអះអាងថាខ្លួនកំពុងពង្រឹងអព្យាក្រឹត្យភាពរបស់ខ្លួន និងប្រើប្រាស់នយោបាយការទូតបែបចម្រុះពណ៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ