អង្គការអន្តរជាតិ៖ ភ្នំពេញនឹងអស់លទ្ធភាពផ្ទុកសំរាម ក្នុងឆ្នាំ ២០២០
ទីក្រុងភ្នំពេញនឹងមានសំរាមកើនឡើងរហូតដល់ ៣ ពាន់តោន ក្នុងមួយថ្ងៃ នៅឆ្នាំ ២០៣០ ហើយ ថា ទីលានចាក់សំរាម នៅក្នុងខណ្ឌដង្កោនឹងអស់លទ្ធភាពនៅក្នុងការផ្ទុកសំរាម នៅក្នុងឆ្នាំ ២០២០។ នេះបើយោងតាមការស្រាវជ្រាវរបស់វិទ្យាស្ថានបច្ចេកវិទ្យានៃកម្ពុជា ដែលឧបត្ថម្ភដោយមូលនិធិអាស៊ី ដែលមានមូលដ្ឋាននៅសហរដ្ឋអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣២
ការសិក្សាស្រាវជ្រាវមួយរបស់វិទ្យាស្ថានបច្ចេកវិទ្យានៃកម្ពុជា ដែលឧបត្ថម្ភដោយមូលនិធិអាស៊ី នេះបានបង្ហាញថា សំរាមនៅក្នុងទីក្រុងភ្នំពេញនឹងកើនឡើងទ្វេរដង ពោលគឺ សំរាម ប្រមាណ ៣ ពាន់តោន នឹងត្រូវបានបង្កើត ក្នុងមួយថ្ងៃ ក្នុងឆ្នាំ ២០៣០។ ការស្រាវជ្រាវដដែលនេះ ក៏បានបញ្ជាក់ផងដែរថា ទីលានចាក់សំរាម នៅក្នុងខណ្ឌដង្កោនឹងអស់លទ្ធភាពនៅក្នុងការផ្ទុកសំរាម នៅក្នុងឆ្នាំ ២០២០។
ឆ្លើយតបនឹងការស្រាវជ្រាវនេះ លោក ឡុង ឌីម៉ង់ បានឲ្យដឹងថា ការកើនឡើងនៃបរិមាណសំរាមចំនួន ៣ ពាន់តោន ក្នុងមួយថ្ងៃ នៅក្នុងទីក្រុងភ្នំពេញនៅក្នុងឆ្នាំ ២០៣០ នេះ វាមិនមែនជាបញ្ហាធ្ងន់ធ្ងរនោះទេ ដោយសារតែ កំណើននៃប្រជាជន មានការកើនឡើង ហើយបច្ចុប្បន្ន សំរាមនៅក្នុងទីក្រុងភ្នំពេញ ក្នុងមួយថ្ងៃមានចំនួន ២ ពាន់ តោន រួចទៅហើយ។
ប៉ុន្តែ អ្នកនាំពាក្យ រូបនេះ បានបន្តទៀតថា ដើម្បីធ្វើការគ្រប់គ្រងសំរាម ឲ្យមានប្រសិទ្ធិភាព សព្វថ្ងៃនេះ សាលារាជធានី បានស្វាគមន៍ចំពោះ ក្រុមហ៊ុនឯកជនក្នុងការវិនិយោគ ក្នុងការកែច្នៃ ឬ ដុតសំរាមទាំងនោះ។ ដោយបច្ចុប្បន្ននេះ មានក្រុមហ៊ុន ប្រមាណជា ៦ ឬ ៧ បាននឹងកំពុងធ្វើការដេញថ្លៃ វិនិយោគសំរាមនៅរាជធានីភ្នំពេញ។
ដោយឡែក លោក សៅ សុភាព អ្នកនាំពាក្យក្រសួងបរិស្ថាន បានបញ្ជាក់ថា ក្រសួងបរិស្ថាន សាលារាជធានីភ្នំពេញ និង ស្ថាប័នពាក់ព័ន្ធ បាននឹងកំពុងសិក្សាពីលទ្ធភាព នៃការបង្កើត ទីលានចាក់សំរាមបន្ថែមទៀត ដើម្បីធ្វើឲ្យការទុកដាក់សំរាម ប្រកបដោយប្រសិទ្ធិភាព និងសណ្តាប់ធ្នាប់។
លោក សៅ សុភាព បន្ថែមថា ក្រសួងបរិស្ថាន ក៏បានស្នើសុំឲ្យមានកិច្ចសហប្រតិបត្តិការណ៍ ខាងផ្នែកបច្ចេកទេស ពី អង្គការ JICA ដើម្បីធ្វើការកែច្នៃសំរាមផងដែរ។
ទោះបីជាយ៉ាងណាក៏ដោយ លោក បានសង្កត់ធ្ងន់ថា បញ្ហាប្រឈមមួយ នាពេលបច្ចុប្បន្ន នេះគឺ សំរាមនៅរាជធានីភ្នំពេញ មិនបានធ្វើការគ្រប់គ្រងឲ្យបានត្រឹមត្រូវតាមបទដ្ឋានបច្ចេកទេស ទៅតាមប្រភេទសំរាមនៅឡើយនោះទេ។ ដួច្នេះហើយ វានឹងអាចមានការលំបាកខ្លះ ក្នុងការយកសំរាមទាំងនោះយកមកកែច្នៃ៕
អត្តបទដោយ សរ ពិសី
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ