ដឹកធ្ងន់ខូចស្ពានត្សឹបាសា តើនរណាទទួលខុសត្រូវ?
ចុះផ្សាយនៅថ្ងៃ៖
ស្តាប់ - ០៤:១០
ព័ត៌មានស្ដីពីរថយន្តដឹកអង្ករលើសទម្ងន់ ធ្វើឲ្យខូចខាតកៅស៊ូក្រាលស្ពានអ្នកលឿង ឬស្ពានត្សឹបាសា កាលពីថ្ងៃទី២៣កុម្ភៈ នៅតែជាប្រធានបទនៃការជជែកគ្នានៅលើបណ្ដាញសង្គម។ កាលពីថ្ងៃពុធ លោក ស ខេង រដ្ឋមន្ដ្រីក្រសួងមហាផ្ទៃ បានបញ្ជាឲ្យតាមចាប់ម្ចាស់រថយន្តបង្កហេតុ។ ជាការពិតហើយថា ម្ចាស់រថយន្តគឺជាអ្នកទទួលខុសត្រូវម្នាក់ នៅក្នុងសំណុំរឿងនេះ។ ប៉ុន្តែក្រៅពីម្ចាស់រថយន្តបង្កហេតុ តើនរណាខ្លះទៀត ដែលត្រូវទទួលខុសត្រូវ?
ស្ពានអ្នកលឿង ឬស្ពានត្សឹបាសា ដែលជាជំនួយឥតសំណងរបស់រដ្ឋាភិបាលជប៉ុន ទើបតែត្រូវបានដាក់ឲ្យប្រើប្រាស់កាលពីខែមេសា ឆ្នាំ២០១៥កន្លងទៅតែប៉ុណ្ណោះ។ បើគិតត្រឹមខែកុម្ភៈឆ្នាំ២០១៦នេះ ប្រជាពលរដ្ឋកម្ពុជា ទើបតែបានធ្វើដំណើរឆ្លងកាត់ស្ពានត្សឹបាសា បានត្រឹមប្រមាណ១០ខែប៉ុណ្ណោះឯង។ ១០ខែក៏ពិតមែន ប៉ុន្តែចុងក្រោយនេះ ស្ពានត្សឹបាសាតម្លៃជាងមួយរយលានដុល្លារ ត្រូវបានបំផ្លាញឲ្យខូចខាតហើយ! ខូចខាតដោយសារម្ចាស់រថយន្តមួយគ្រឿង ដែលអាត្មានិយម បង្ខំផ្ទុកអង្ករលើសទម្ងន់កំណត់។
លោក ស ខេង រដ្ឋមន្ដ្រីក្រសួងមហាផ្ទៃ បានបញ្ជាឲ្យតាមចាប់ម្ចាស់រថយន្តបង្កហេតុ។ ប៉ុន្តែបើតាមសេចក្ដីរាយការណ៍ ម្ចាស់រថយន្តដែលបានធ្វើឲ្យខូចកៅស៊ូក្រាលលើស្ពាននេះ បានបង់ប្រាក់ពិន័យចំនួន១៥០ដុល្លារទៅឲ្យអង្គការ JICA ដែលជាអ្នកគ្រប់គ្រងស្ពាននេះរួចហើយ។ ហើយខាងក្រុមហ៊ុនជប៉ុន នឹងជួសជុលការខូចខាតនេះឡើងវិញ។ នេះ គឺជាការទទួលខុសត្រូវរបស់ម្ចាស់រថយន្តបង្កហេតុ នៅក្នុងសំណុំរឿងនេះ។ ប៉ុន្តែក្រៅពីម្ចាស់រថយន្ត បង្កហេតុ តើនរណាខ្លះទៀត ដែលត្រូវទទួលខុសត្រូវ?
មុននឹងឆ្លើយសំណួរនេះ គេត្រូវទទួលស្គាល់ការពិតមួយថា បញ្ហារថយន្តផ្ទុកទំនិញលើសទម្ងន់កំណត់ គឺមិនមែនទើបតែកើតមានឡើងនៅកម្ពុជានោះទេ។ ការផ្ទុកទំនិញលើសទម្ងន់កំណត់ កើតមានតាំងពីយូរមកហើយ នៅតាមបណ្ដាខេត្តរាជធានី ទូទាំងប្រទេសកម្ពុជា។ កន្លងមក មានស្ពាននិងផ្លូវជាច្រើនកន្លងដែលបាក់បែកនិងខូចខាត ដោយសារតែការដឹកទំនិញលើសទម្ងន់កំណត់នេះឯង។
នៅក្នុងសំណុំរឿងនេះ គេពិបាកបន្ទោសទៅលើឈ្មួញម្ចាស់រថយន្តតែម្ខាងណាស់ ព្រោះការផ្ទុកទំនិញច្រើនតាមដែលអាចធ្វើទៅបាន គឺជាផលចំណេញ។ ហើយនៅក្នុងជំនួញ សួរថាតើនរណាមិនចង់ចំណេញ?
នៅពេលដែលឈ្មួញ ឬម្ចាស់រថយន្តនៅតែបន្តផ្ទុកទំនិញលើសទម្ងន់ ការងារទប់ស្កាត់ត្រូវធ្លាក់ទៅលើអាជ្ញាធរមានសមត្ថកិច្ច។ ប៉ុន្តែជាការកត់សម្គាល់ អាជ្ញាធរជាប់ពាក់ព័ន្ធគ្រប់លំដាប់ថ្នាក់ ហាក់ខកខាន មិនបានយកចិត្តទុកដាក់ទប់ស្កាត់ ឬរារាំងរថយន្តដឹកទំនិញធ្ងន់លើសកំណត់ដែលធ្វើដំណើរយ៉ាងអាណាធិបតេយ្យនៅទូទាំងប្រទេសឡើយ។
ករណីរថយន្តដឹកអង្ករដែលមានទម្ងន់សរុបជាង៧០តោន និងដែលបានធ្វើឲ្យខូចខាតកៅស៊ូក្រាលស្ពានអ្នកលឿង គឺជាភស្តុតាងយ៉ាងច្បាស់បញ្ជាក់ពីការធ្វេសប្រហែសរបស់អាជ្ញាធរពាក់ព័ន្ធ នៅក្នុងការគ្រប់គ្រងការដឹកជញ្ជូនរបស់រថយន្តដឹកទំនិញនៅតាមដងផ្លូវ។ វាជាសំណាងល្អ ដែលឧបទ្ទវហេតុលើកនេះគ្រាន់តែធ្វើឲ្យកៅស៊ូក្រាលស្ពានត្សឹបាសាខូចខាត មិនបង្កគ្រោះថ្នាក់ដល់អ្នករួមដំណើរផ្សេងទៀត។
បើទោះបីជាឧបទ្ទវហេតុលើកនេះមិនបង្កគ្រោះថ្នាក់ដល់ប្រជាពលរដ្ឋក៏ពិតមែន ក៏វាមិនមែនមានន័យថា អាជ្ញាធរពាក់ព័ន្ធគ្រប់លំដាប់ថ្នាក់ គួរតែបណ្ដែតបណ្ដោយ មិនចាត់វិធានការដោះស្រាយបញ្ហានេះឡើយ។
ការគ្រប់គ្រងរថយន្តដឹកទំនិញលើសទម្ងន់កំណត់ គួរតែត្រូវបានរឹតបន្តឹងឲ្យបានម៉ឺងម៉ាត់ជានេះ ។ ផ្លូវជាតិដែលនៅមិនទាន់មានជញ្ជីងថ្លឹងរថយន្តគ្រប់គ្រាន់ ក៏គួរពិចារណាដាក់បន្ថែមផងដែរ។ ដោយចំពោះផ្លូវជាតិលេខ១ ដ៏មានសារៈសំខាន់សម្រាប់ការដឹកជញ្ជូនទំនិញរវាងកម្ពុជាវៀតណាម ក៏ដូចជារវាងប្រទេសក្នុងមហាអនុតំបន់មេគង្គ ការប្រើប្រាស់សាឡាងដើម្បីដឹកជញ្ជូនទំនិញធន់ធ្ងន់ ក៏អាចជាដំណោះស្រាយមួយដែរ ដើម្បីថែរក្សាស្ពានត្សឹបាសាឲ្យនៅរឹងមាំ គង់វង្សយូរអង្វែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ