មេបញ្ជាការកងទ័ពមួកខៀវ៖«យ៉ាងហោច ២សប្តាហ៍ទៀតសពទាហានមួកខៀវទាំង ៤ នឹងដឹកដល់កម្ពុជា»
ទីបំផុតកងទ័ពមួកខៀវកម្ពុជាចំនួន ៣រូប ដែលបាត់ខ្លួនក្រោយព្រឹត្តិការណ៍បាញ់ប្រហារ ដោយក្រុមឧទ្ទាមនៅសាធារណរដ្ឋអាហ្វ្រិកកណ្តាល កាលពីយប់ថ្ងៃទី ៨ឧសភា កន្លងទៅនេះ បានស្លាប់ហើយ បន្ទាប់ពីសាកសពអ្នកទាំង ៣ ត្រូវបានរកឃើញកាលនៅព្រឹកថ្ងៃទីខែឧសភា ស្ថិតនៅចម្ងាយ ២គីឡូម៉ែត្រពីកន្លែងកើតហេតុ។ សាកសពយុទ្ធជនមួកខៀវទាំង ៣ ត្រូវបានរៀបចំដឹកជញ្ជូនតាមឧត្ថម្ភាគចក្រអង្គការសហប្រជាជាតិពីតំបន់ Bangassou ទៅកាន់ទីក្រុង Bangui រដ្ឋធានីធំនៃសាធារណៈរដ្ឋអាហ្វ្រិកកណ្តាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
អ្នកនាំពាក្យក្រសួងការពារជាតិកម្ពុជា នៅថ្ងៃពុធទី ១០ឧសភានេះ បានបញ្ជាក់ជាសាធារណៈថា កងកម្លាំងមួកខៀវកម្ពុជា ដែលកំពុងបំពេញបេសកកម្មមនុស្សធម៌អន្តរជាតិក្រោមឆ័ត្រអង្គការសហប្រជាជាតិ នៅសាធារណៈរដ្ឋអាហ្វ្រិកកណ្តាលសរុបចំនួន ៤នាក់ត្រូវបានស្លាប់។
ជាមួយគ្នានេះ នាយឧត្តមសេនីយ៍ សែម សុវណ្ណី អគ្គនាយកនៃមជ្ឈមណ្ឌលជាតិកងកម្លាំងរក្សាសន្តិភាព និងបោសសម្អាតកាកសំណល់សង្គ្រាម បានថ្លែងប្រាប់វិទ្យុបារាំង RFI ថា យ៉ាងហោចណាស់ក៏ត្រូវប្រើពេល ២សប្តាហ៍ដែរ ក្នុងការដឹកជញ្ជូនសពយុទ្ធជនមួកខៀវទាំង ៤មកដល់ប្រទេសកម្ពុជា។ ក្នុងនោះមានការសម្អាតរបស់ពេទ្យ ឆ្លងកាត់កោសល្យវិច្ច័យ និងការគោរពវិញ្ញាណក្ខន្ធដែលរៀបចំឡើងដោយអង្គការសហប្រជាជាតិ និងមានការចូលរួមពីកងកម្លាំងមួកខៀវចំរុះ ៤០ជាតិសាសន៍ កំពុងបំពេញបេសកកម្មនៅអាហ្វ្រិកកណ្តាល។
សូមរំលឹកថា កាលពីយប់ថ្ងៃទី ៨ខែឧសភា នៅអាហ្វ្រិកកណ្តាល ត្រូវនឹងម៉ោង ២ទៀបភ្លឺនៅប្រទេសកម្ពុជា មានហេតុការណ៍ពួនស្ទាក់វាយប្រហារដោយក្រុមឧទ្ទាមទៅលើក្បួនយុទ្ធដំណើរកងកម្លាំង MINUSCA របស់អង្គការសហប្រជាជាតិ បណ្តាលឲ្យកម្លាំងមួកខៀវកម្ពុជាស្លាប់ នៅនឹងកន្លែងម្នាក់ របួសម្នាក់ និង ៣នាក់ទៀតបាត់ខ្លួន ប៉ុន្តែអ្នកបាត់ខ្លួនទាំង ៣នោះ ត្រូវបានរកឃើញថាស្លាប់ទាំងអស់។ ក្នុងចំណោមយុទ្ធជនមួកខៀវដែលបានពលីចំនួន ៤នាក់ដែល ២នាក់នៅលីវនៅឡើយនោះ មាន ៣នាក់ជាកងវិស្វកម្ម និងម្នាក់ជាបុគ្គលិកពេទ្យ។ ពួកគេជាប្រជាពលរដ្ឋរស់នៅក្នុងខេត្តសៀមរាប ពោធិសាត់ កំពត និងរាជធានីភ្នំពេញ។
២ថ្ងៃជាប់គ្នា ក្នុងសុន្ទរកថាជាសាធារណៈ លោកនាយករដ្ឋមន្ត្រី ហ៊ុន សែន ក៏បានថ្លែងឲ្យអង្គការសហប្រជាជាតិយកចិត្តទុកដាក់ទទួលខុសត្រូវ និងធានានូវសុវត្ថិភាពដល់កងកម្លាំងមួកខៀវកម្ពុជាផងដែរ។ លោក ហ៊ុន សែន ត្រៀមនឹងបញ្ជូនក្រុមការងារក្រសួងការពារជាតិទៅកាន់ ប្រទេសអាហ្រ្វិកកណ្តាល ដើម្បីពិនិត្យកន្លែងកើតហេតុថាតើមានអ្វីកើតឡើងមុនពេលកើតហេតុ។
ជាបន្តបន្ទាប់ ក្រសួងការពារជាតិ ក្រសួងការបរទេស សុទ្ធតែបានចេញលិខិតរំលែកទុក្ខគ្រួសារនៃសព យុទ្ធជនដែលបានពលីជីវិត និងសម្តែងនូវការសោកស្តាយ រន្ធត់នូវហេតុការណ៍ដែលបានកើតឡើងចំពោះយុទ្ធជនរក្សាសន្តិភាពកម្ពុជានៅប្រទេសអាហ្វ្រិកកណ្តាល។
សូមបញ្ជាក់ថា នៅឆ្នាំ ២០១៦ កម្ពុជា បានបញ្ជូនកងកម្លាំងរក្សាសន្តិភាពរបស់ខ្លួនប្រមាណជិត ៩០០នាក់ ទៅបំពេញបេសកម្មនៅប្រទេសស៊ូដង់ ស៊ូដង់ខាងត្បូង លីបង់ ម៉ាលី និង សាធារណរដ្ឋអាហ្វ្រិកកណ្តាល។ ក្នុងរយៈពេល ១១ឆ្នាំមកនេះ កម្លាំងរក្សាសន្តិភាពរបស់កម្ពុជា បានស្លាប់ ៨នាក់រងរបួស ៧នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ