អាមេរិក និងអូស្ត្រាលី សម្តែងការសោកស្តាយ ចំពោះការបោះឆ្នោតនៅកម្ពុជា
សហរដ្ឋអាមេរិក និងអូស្រ្តាលី បានបង្ហាញការសោកស្តាយ និងខកចិត្តចំពោះការបោះឆ្នោតជ្រើសតាំងតំណាងរាស្ត្រ កាលពីថ្ងៃម្សិលមិញ ដែលមិនមានវត្តមានអតីតគណបក្សសង្រ្គោះជាតិចូលរូមប្រកួត។ អាមេរិក បានហៅការបោះឆ្នោតនេះថា គ្មានភាពសេរី និងយុត្តិធម៌ ហើយមិនបានតំណាងអោយឆន្ទៈរបស់ប្រជាជនកម្ពុជាទេ។
ចុះផ្សាយនៅថ្ងៃ៖
ស្តាប់ - ០២:២០
មិនបានប៉ុន្មានម៉ោងក្រោយការបោះឆ្នោតថ្ងៃទី២៩ ខែកក្កដា សហរដ្ឋអាមេរិក និងប្រទេសអូស្ត្រាលី គឺជាប្រទេសដំបូងគេ ដែលបានចេញសេចក្តីថ្លែងការណ៍បង្ហាញការមិនពេញចិត្តរបស់ខ្លួនជុំវិញការបោះឆ្នោត ដែលគ្មានវត្តមានអតីតគណបក្សប្រឆាំងក្នុងប្រទេសកម្ពុជា។
សហរដ្ឋអាមេរិក តាមរយៈសេចក្តីថ្លែងការណ៍ ដែលធ្វើឡើងដោយការិយាល័យរដ្ឋមន្ត្រីទទួលបន្ទុកព័ត៌មាននៃសេតវិមាន បានលើកឡើងថា ការបោះឆ្នោតថ្ងៃទី២៩ ខែកក្កដានៅកម្ពុជា គ្មានភាពសេរី និងយុត្តិធម៌ ហើយមិនតំណាងឲ្យឆន្ទៈរបស់ប្រជាជនកម្ពុជានោះទេ។ អាមេរិកបន្តថា ការបោះឆ្នោត ដែលគ្មានអតីតគណបក្សប្រឆាំងសំខាន់ជាងគេនៅកម្ពុជា គឺជាបរាជ័យមួយយ៉ាងធំបំផុតចំពោះប្រព័ន្ធប្រជាធិបតេយ្យ ដែលមានចែងក្នុងរដ្ឋធម្មនុញ្ញរបស់កម្ពុជា។
តាមរយៈសេចក្តីថ្លែងការណ៍ដដែល អាមេរិកនឹងពិចារណាលើជំហានបន្ថែមទៀត នៅក្នុងការឆ្លើយតបទៅនឹងការបោះឆ្នោតរបស់កម្ពុជា, បញ្ហាសិទ្ធិមនុស្ស, និងលទ្ធិប្រជាធិបតេយ្យ ដោយរឹតបន្តឹងបន្ថែមទៀតលើការផ្តល់ទិដ្ឋាការ។ ក្រៅពីនេះអាមេរិក ក៏ជំរុញឲ្យមានការផ្សះផ្សាជាតិ ហើយដោះលែង លោក កឹម សុខា និងអ្នកទោសនយោបាយផ្សេងទៀតជាបន្ទាន់។
ចំណែកអូស្ត្រាលីតាមរយៈក្រសួងការបរទេសរបស់ខ្លួនបានបង្ហាញពីការព្រួយបារម្ភយ៉ាងខ្លាំងចំពោះការបោះឆ្នោតដែលធ្វើឡើង កាលពីថ្ងៃទី២៩ ខែកក្កដា។ ជាការបោះឆ្នោត ដែលគ្មានវត្តមានគណបក្សប្រឆាំង ហើយមេគណបក្សនេះ កំពុងជាប់ឃុំក្នុងពន្ធនាគារ និងការរារាំងមិនឲ្យមន្ត្រីអតីតគណបក្សនេះ ចូលរួមក្នុងនយោបាយ។
អូស្ត្រាលីបង្ហាញការខកចិត្តចំពោះពលរដ្ឋកម្ពុជា ដែលមិនអាចជ្រើសរើសតំណាងរបស់ខ្លួនបានដោយសេរី ហើយរដ្ឋាភិបាលអូស្រ្តាលីអំពាវនាវឲ្យរដ្ឋាភិបាលកម្ពុជា អនុញ្ញាតឲ្យមានការចូលរួមដោយសេរី និងគ្មានការគំរាមកំហែងក្នុងសកម្មភាពនយោបាយ។
លោក សោម សូរីដា អគ្គលេខាធិការរងគណៈកម្មាធិការជាតិរៀបចំការបោះឆ្នោត បានលើកឡើងថាសេចក្តីថ្លែងការណ៍របស់អាមេរិក គឺមានចរិតនយោបាយ ហើយថាកម្ពុជាមិនត្រូវការទទួលស្គាល់ពីប្រទេសទាំងនោះទេ។
យោងតាមសេចក្តីប្រកាសរបស់គណៈកម្មាធិការជាតិរៀបចំការបោះឆ្នោត គ.ជ.ប កាលពីថ្ងៃទី២៩ ខែកក្កដា មានប្រជាពលរដ្ឋកម្ពុជាប្រមាណ៦លាន៩សែននាក់ ឬជាង៨២ភាគរយ នៃអ្នកមានឈ្មោះក្នុងបញ្ជីបោះឆ្នោត៨លាន៣សែននាក់ បានចូលរួមនៅក្នុងការបោះឆ្នោតជ្រើសតាំងតំណាងរាស្ត្រនីតិកាលទី៦នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ