អាជ្ញាធរខេត្តរតនគីរីអះអាងពីការចាប់បញ្ជូនខ្លួនជនជាតិច្រាយ២នាក់ តែមន្ត្រីសិទ្ធិមនុស្សថា គឺជា ជនជាតិម៉ុងតាញ៉ា
យោងតាមការចុះផ្សាយរបស់គេហទំព័រស្នងការនគរបាលជាតិបានអោយដឹងថា អាជ្ញាធរខេត្ត រតនគីរី បានចាប់បញ្ជូនខ្លួនជនជាតិច្រាយ-វៀតណាម ២នាក់ ទៅកាន់ប្រទេសវៀតណាមវិញ កាលពីថ្ងៃទី២មករា ដោយសារតែពួកគេបានឆ្លងដែនខុសច្បាប់។ ប៉ុន្តែមន្ត្រីសិទ្ធិមនុស្សអះអាងថា ជនជាតិច្រាយទាំងពីរនាក់នោះ គឺជាជនជាតិម៉ុងតាញ៉ា ដែលកំពុងរត់គេចខ្លួនចេញពីប្រទេសវៀតណាម ដើម្បីស្វែងរកសិទ្ធិជ្រកកោននៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
គេហទំព័ររបស់អគ្គស្នងការនគរបាលជាតិ បានចុះផ្សាយកាលពីថ្ងៃទី០២ ខែមករាថា សមត្ថកិច្ចនគរបាលកម្ពុជា បានចាប់បញ្ជូនខ្លួនជនជាតិច្រាយ-វៀតណាម ចំនួន ០២នាក់ ភេទប្រុស ដែលបានលួចឆ្លងដែនខុសច្បាប់ តាមច្រកទ្វាអន្តជាតិអូរយ៉ាដាវ។ បើតាមការបញ្ជាក់បន្ថែមពី លោក ងន គឿន ស្នងការនគរបាលខេត្តរតនគីរី គឺជនជាតិច្រាយ-វៀតណាមទាំងពីរនាក់ ត្រូវបានចាប់ខ្លួន នៅពេលដែលឆ្លងដែនចូលមកធ្វើការដោយខុសច្បាប់នៅក្នុងទឹកដីខ្មែរ ដោយមានធុងបាញ់ថ្នាំជាប់នឹងខ្លួនផង។ លោកស្នងការបានបញ្ជាក់ថា ក្រោយពីការឃាត់ខ្លួន អាជ្ញាធរបាន បញ្ជួនពួកគេទាំងពីរនាក់ ទៅអោយអាជ្ញាធរវៀតណាមនៅថ្ងៃទី២មករាដដែលនោះ។ លោកស្នងការបានបញ្ជាក់ថា ជនជាតិច្រាយទាំងពីរនាក់នោះ មិនមែនជាជនជាតិម៉ុងតាញ៉ានោះទេ។
ប៉ុន្តែបើតាម លោក ឆាយ ធី មន្ត្រីស៊ើបអង្កេតរបស់អង្គការសិទ្ធិមនុស្សអាដហុក ប្រចាំនៅខេត្តរតនគីរី បានអះអាងថា ពួកគេទាំងពីរ គឺជាជនជាតិម៉ុងតាញ៉ា ដែលកំពុងរត់គេចខ្លួនចេញពីការធ្វើទុក្ខបុកម្និញរបស់អាជ្ញាធរវៀតណាម។ លោកបានបញ្ជាក់ថា អាជ្ញាធរមិនគួរប្រញ៉ាប់ប្រញ៉ាល់បញ្ជូនខ្លួនពួកគេត្រលប់ទៅវិញភ្លាមៗ ដោយមិនបានបង្ហាញព័ត៌មានលំអិតបែបនេះទេ។
មន្ត្រីសិទ្ធិរូបនេះ មានការបារម្ភយ៉ាងខ្លាំង ចំពោះសុវត្ថិភាពរបស់ពួកគេទាំងពីរនាក់ ក្រោយពីការបញ្ជូនខ្លួនទៅកាន់ប្រទេសវៀតណាមវិញ។
គួររំលឹកជូនថា កាលពីថ្ងៃទី២០ខែធ្នូ ឆ្នាំ២០១៤កន្លងទៅ ជនជាតិម៉ុងតាញ៉ាចំនួន១៣នាក់ ក្នុងនោះមានស្ត្រីម្នាក់ ត្រូវបានជួយសង្គ្រោះដោយមន្ត្រីអង្គការសហប្រជាជាតិទទួលបន្ទុកខាងជនភៀសខ្លួន (UNHCR) ពីក្នុងព្រៃពីរផ្សេងៗគ្នា ស្ថិតនៅភូមិណងហៃ ឃុំសេដា ស្រុកលំផាត់ និងភូមិខ្វែង ឃុំយ៉ាទុង ស្រុកអូរយ៉ាដាវ ខេត្តរតនគិរី។ ការជួយសង្គ្រោះបានធ្វើឡើង បន្ទាប់ពីពួកគេបានលាក់ខ្លួនក្នុងព្រៃអស់រយៈពេលជាច្រើនថ្ងៃ ដើម្បីគេចចេញពីការតាមចាប់ខ្លួនរបស់អាជ្ញាធរវៀតណាមនិងកម្ពុជា។ ពួកគេត្រូវបានបញ្ជូនមកកាន់ទីក្រុងភ្នំពេញ ដើម្បីទទួលបានសិទ្ធិជាជនភៀសខ្លួន។
បើតាមព័ត៌មានចុងក្រោយ មានក្រុមជនជាតិម៉ុងតាញ៉ាជាច្រើនទៀត កំពុងរត់គេចចេញពី ប្រទេសវៀតណាម ហើយលាក់ខ្លួនក្នុងព្រៃកម្ពុជា។ ចាប់តាំងពីថ្ងៃទី៣និងទី៤ខែមករានេះ អាជ្ញាធរខេត្តរតនគីរី បានត្រៀមរថយន្តល្បាតដល់ទៅ៧គ្រឿង ដើម្បីតាមស្វែងរកជនជាតិម៉ុងតាញ៉ា ទាំងនោះ។ នេះបើតាមការបញ្ជាក់ពីលោក ឆាយ ធី ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ