តើព្រហ្មចារីនៅតែមានតម្លៃសំខាន់ក្នុងសង្គមខ្មែរដែរឬទេ?
ចុះផ្សាយនៅថ្ងៃ៖
ស្តាប់ - ០៤:០៧
ក្នុងវចនានុក្រមខ្មែរ«ព្រហ្មចារី» សម្រាប់ហៅបុរស ឯស្ត្រីត្រូវហៅ«ព្រហ្មចារិនី»។ ក៏ប៉ុន្តែ ជាទូទៅគេប្រើពាក្យ«ព្រហ្មចារី» យ៉ាងដូច្នេះ គឺសម្រាប់សម្គាល់មនុស្សដែលនៅលីវនិងមានភាពបរិសុទ្ធនៃអង្គកាយ។ តាំងពីដើមមក សង្គមខ្មែរឲ្យតម្លៃព្រហ្មចារីខ្លាំងណាស់។ផ្ទុយពីនេះ ផ្នត់គំនិតប្រកាន់យកព្រហ្មចារីជ្រុលហួសហេតុពេក បានបង្កឲ្យមានវិសមភាពរវាងបុរសស្ត្រី ហើយបណ្តាលឲ្យមានគំនាបសង្គមដល់នារីភេទថែមទៀតផង។ តើហេតុអ្វីបានជាដូច្នេះ?
តាំងតែពីដើមរៀងមកសង្គមខ្មែរច្រើនគិតដល់នារីជាសំខាន់។ភាពជាស្រ្តី ត្រូវសង្គមយកចិត្តទុកដាក់និងឱ្យតម្លៃខ្លាំងណាស់ហើយជាពិសេស គឺមានភាពបរិសុទ្ធក្រមុំព្រហ្មចារីនេះតែម្តង។ ដូចជាពេលគេដើររកដណ្តឹងប្រពន្ធគឺគេត្រូវការចង់បាននារីក្រមុំព្រហ្មចារី។ រហូតមកដល់សព្វថ្ងៃនេះ មន្ទីរពេទ្យ ឬកន្លែងខ្លះ មានសេវាកម្មដេរភ្ជាប់សន្ទុះព្រហ្មចារី ដែលមានតម្លៃ ដល់ទៅរាប់សិបរយដុល្លារឯណោះ។
ប៉ុន្តែចំពោះបុរសវិញមនុស្សក្នុងសង្គមខ្មែរជាទូទៅហាក់ដូចជាភ្លេច ឬមិនបានខ្វល់ខ្វាយថាបុរសនោះបានរក្សាភាពបរិសុទ្ធសម្រាប់អនាគតភរិយា ទេឬយ៉ាងណា? ហេតុដូច្នេះហើយទើបបុរសៗមួយចំនួនពុំខ្វល់នឹងរក្សាខ្លួនឱ្យនៅបរិសុទ្ធហើយគិតតែពីសប្បាយនឹងរឿងកាមគុណ។មិនតែប៉ុណ្ណោះពេលចង់រៀបការ ពួកគេថែមទាំងចង់បានប្រពន្ធ ជានារីក្រមុំព្រហ្មចារី ទៀតផង។
ត្រង់ចំណុចនេះគឺបង្ហាញពីវិសមភាពរវាងបុរសនិងនារីខ្មែរ យ៉ាងពិតប្រាកដ។ក្នុងន័យនេះតម្លៃស្ត្រីនិងការរក្សាព្រហ្មចារីរបស់នារីខ្មែរត្រូវគេមើលឃើញ ត្រឹមតែជាទំនិញសម្រាប់អតិថិជនបុរសជ្រើសរើសទិញតាមចិត្តតែប៉ុណ្ណោះ។
បន្ថែមពីនេះ ពាក្យទំនឹមទំនៀមចាស់បុរាណ ពោលថា បុរសជាមាសទឹកដប់ទោះធ្លាក់ចូលភក់ហើយលើកមកវិញក៏នៅតែជាមាសទឹកដប់ដដែរ។ ប៉ុន្តែនារីវិញប្រៀបបាននឹងសំពត់សបើធ្លាក់ចូលភក់ជ្រាំហើយទោះខំប្រឹងបោកគក់លាងសម្អាតយ៉ាងណាក៏មិនដូចដើមវិញ
ដែរ។
ការវាយតម្លៃចំពោះនារីបែបនេះគឺអាចជាគំនាបសង្គមនិងគំនាបផ្លូវចិត្តចំពោះស្រ្តី ក៏អាចថាបាន។ ព្រោះថា បុរសអាចស្វែងរកទំនាក់ទំនងផ្លូវភេទបានស្រេចចិត្តនិងមានលក្ខណៈទូលំទូលាយទៀតផង។ ប៉ុន្តែនារីវិញទោះមានតម្រូវការផ្លូវភេទយ៉ាងក៏ដោយក៏នាងមិនអាចឬលំបាកនឹងប្រព្រឹត្តបានដែរ។ ម្យ៉ាងបើនារីហ៊ានតែបញ្ចេញសកម្មភាពឬឥរិយាបថណា មួយ ដែលអាចឲ្យគេកត់សម្គាល់ថានាងជានារីមិនមានភាពបរិសុទ្ធច្បាស់ជាសង្គមមាក់ងាយនិងវាយតម្លៃមិនល្អ ជាក់ជាមិនខាន។លើសពីនេះបើមាននារីណាម្នាក់ នៅក្នុងភូមិដែលត្រូវគេចាប់រំលោភនារីរងគ្រោះ និងគ្រួសារនោះត្រូវគេសើចចំអកហើយហាមឃាត់កូនប្រុសខ្លួនមិនឲ្យយកនាងជាភរិយាទៀតផង។
បើនិន្នាការនៃការឱ្យតម្លៃនារីដោយគិតតែទៅលើភាពបរិសុទ្ធខ្លួនប្រាណដូច្នេះនៅតែបន្តខ្លាំងឡើងៗចុះចំណែកស្ត្រីមេម៉ាយ យុវតីដែលបាត់បង់ភាពបរិសុទ្ធក្នុងថ្ងៃ១៤កុម្ភៈ និងស្ត្រីរងគ្រោះ ដែលត្រូវគេបង្ខំឬលួងលោមរំលោភសេពសន្ថវៈ និងនារីបម្រើសេវាកម្សាន្តច្បាស់ជាត្រូវសង្គមស្អប់ខ្ពើមនិងមើលងាយមើលថោក យ៉ាងច្រើនជាពុំខាន។ហើយទោះបីជាពួកនាងចង់កែខ្លួនលុបបំបាត់បំណែកអាក្រក់នៃអតីតកាលក៏ប្រហែលជាលំបាកនឹងលាងសម្អាតខ្លួនណាស់។
ទោះបីជាយ៉ាងក៏ដោយ«ព្រហ្មចារី» នៅតែជាតម្លៃសំខាន់សម្រាប់មនុស្សគ្រប់រូបដោយពុំមែនសម្រាប់តែភាគីនារីនោះទេបុរសក៏ត្រូវតែរក្សាខ្លឹមកាយរបស់ខ្លួនផងដែរ។ប្រការដែលសង្គមខ្មែរកន្លងមកគិតថា«ព្រហ្មចារី» មានសារៈសំខាន់នោះក៏ព្រោះទំនងជាដោយហេតុថាគេពុំចង់ឲ្យមនុស្សពិសេសយុវជនកុំឆាប់ប្រលូកក្នុងរឿងស្នេហាផ្លូវភេទពេកដែលអាចធ្វើឲ្យខូចសុខភាពខាតបង់ការសិក្សាខូចអនាគតហើយរៀនឬធ្វើកិច្ចការ មិនបានល្អ។ មិនតែប៉ុណ្ណោះការប្រព្រឹត្តកាមកិច្ចនេះទៀតសោតអាចនឹងឆ្លងមេរោគផ្សេងៗថែមទាំងអាចនឹងមានគភ៌ ដោយមិនបានគ្រោងទុកទៀតផងបើមិនបានប្រើប្រាស់ស្រោមអនាម័យបានត្រឹមត្រូវ។
ហេតុនេះយុវជនទាំងអស់ត្រូវតែរក្សាខ្លួនប្រាណឱ្យបានល្អ។ឯនារីដែលធ្លាប់លង់ខ្លួនជ្រុលជ្រោះនិងនារីរងគ្រោះបាត់បង់ព្រហ្មចារីទាំងឡាយមិនត្រូវអស់សង្ឃឹមឡើយនិងត្រូវងើបឈរតស៊ូរស់នៅឡើងវិញ។ ដោយឡែក សង្គមខ្មែរគួរតែយកចិត្តទុកដាក់ខ្ពស់និងផ្តល់តម្លៃវិជ្ជមានចំពោះនារីទាំងនោះឱ្យបានច្រើនបំផុត។
បន្ថែមពីនេះ ការគិតពីព្រហ្មចារីគឺជារឿងម្យ៉ាង ប៉ុន្តែតម្លៃខាងក្នុងរបស់មនុស្ស សមត្ថភាព ចំណេះដឹង និងចរិយាមារយាទ ក៏ជារឿងសំខាន់ចាំបាច់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ