កម្ពុជាពង្រឹងសន្តិសុខសម្រាប់បុណ្យអុំទូក
ពិធីបុណ្យអុំទូក នឹងចាប់ផ្តើមពីថ្ងៃទី១៣ ដល់ថ្ងៃទី១៥ វិច្ឆិកា។ ជាពិធីដែលបានអាក់ខានអស់រយៈពេល ៤ឆ្នាំកន្លងមកហើយ។ សម្រាប់ពិធី ដែលមានមនុស្សរាប់លាននាក់មកចូលរួមនេះ អាជ្ញាធរកម្ពុជាត្រូវបានគេមើលឃើញថាបានពង្រឹងសន្តិសុខយ៉ាងតឹងរឹង ដើម្បីបញ្ជៀសឧបទ្វហេតុកើតឡើងយ៉ាងអណោចអធមដូចកាលពីឆ្នាំ ២០១០ទៀត។ អ្នកអង្កេតការណ៍អបអរសាទរចំពោះវិធានការណ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
កម្លាំងសន្តិសុខប្រមាណ ១ម៉ឺននាក់ នឹងត្រូវពង្រាយ ដើម្បីធានាក្នុងព្រះរាជពិធីបុណ្យអុំទូកដែលនឹងមានមនុស្សរាប់លានធ្វើដំណើរមកកាន់ទីក្រុងភ្នំពេញ។ កម្លាំង ១ម៉ឺននាក់នោះនឹងត្រូវដាក់នៅតាមគោលដៅសំខាន់ៗដូចជាកន្លែងគណៈអធិបតី ច្រកចេញចូលក្នុងរាជធានីភ្នំពេញ និងទីតាំងដែលមានមនុស្សកកកុញជាពិសេសនៅពេលយប់។ ក្រៅពីនេះ កម្លាំងសមត្ថកិច្ចក៏បង្កើតជាកម្លាំងសម្រាប់អន្តរាគមន៍ពិសេសថែមទៀតផង។ បន្ថែមពីនេះ ខេត្តកណ្តាល ដែលនៅជុំវិញរាជធានីភ្នំពេញក៏ត្រូវពង្រឹងសន្តិសុខផងដែរ។
ក្នុងពិធីបុណ្យអុំទូកឆ្នាំនេះ មនុស្សប្រមាណជាង ២លាននាក់នឹងធ្វើដំណើរមកកាន់រាជធានីភ្នំពេញ។ លោក មាន ចាន់យ៉ាដា អ្នកនាំពាក្យសាលាក្រុងភ្នំពេញ បានអះអាងថាកម្លាំងសន្តិសុខតាមត្រៀមអនុវត្តឱ្យបាន ១០០% ដើម្បីការពារសុវត្ថិភាពជូនប្រជាពលរដ្ឋ។
គួរបញ្ជាក់ថា កម្ពុជាបានផ្អាកពិធីបុណ្យអុំទូករយៈពេល ៤ឆ្នាំកន្លងមកហើយតាំងពីឆ្នាំ ២០១១មក ក្រោយសោកនាដកម្មមនុស្សរាប់រយនាក់រត់ជាន់គ្នានៅកោះពេជ្រកាលពីឆ្នាំ ២០១០មក។ លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសបានអះអាងថា ដោយសារតែកម្ពុជាធ្លាប់មានបទពិសោធរួចហើយ កម្លាំងសមត្ថកិច្ចនឹងពង្រឹងការរឹតបន្តឹងសន្តិសុខ រួមទាំងការបញ្ជៀសមនុស្សមិនឱ្យកកកុញខ្លាំង ដើម្បីថែរក្សាសុវត្ថិភាពទាំងស្រុងជូនពលរដ្ឋក្នុងពិធីបុណ្យ។ ដើម្បីពង្រឹងសុវត្ថិភាពបន្ថែម អាជ្ញាធរ ក៏បានប្រកាសដាក់លេខទំនាក់ទំនងចំនួន ១៦ខ្សែ ដើម្បីអាចឱ្យពលរដ្ឋអាចទាក់ទងនឹងប្តឹងអាជ្ញាធរភ្លាមៗប្រសិនបើមានករណីចោរកម្មជាដើម។
លោកបណ្ឌិត មាស នី អ្នកតាមដាន និងអ្នកវិភាគសង្គម បានអបអរសាទរចំពោះវិធានការណ៍ពង្រឹងសន្តិសុខរបស់កម្លាំងអាជ្ញាធរនេះ ព្រោះថាជាគំនិតត្រៀមបង្ការដ៏ល្អមួយ ដើម្បីការពារកុំឱ្យមានសោកនាធកម្មដូចកាលពីឆ្នាំ ២០១០កន្លងទៅ។ បន្ថែមពីនេះ លោកមាស នី រំពឹងថាកម្លាំងសន្តិសុខទាំងជាង ១ម៉ឺននាក់នេះ គឺមិនមែនជាក្រុមផ្សេង ដែលត្រូវពង្រាយសម្រាប់ការភ័យខ្លាចនេះបាតុកម្មនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ