របៀបចាយវាយប្រាក់បញ្ជាក់ពី«សន្តិភាពនិយម»និងហានីភ័យសង្គម
ចុះផ្សាយនៅថ្ងៃ៖
ស្តាប់ - ០៥:០០
អាជីវកម្មនានាកំពុងរីកដុះដាលដូចផ្សិតក្នុងរាជធានីភ្នំពេញ ក្នុងនោះវិស័យភោជនីយដ្ឋាននិងហាងទំនិញទំនើបៗបានកើនឡើងគួរឲ្យកត់សម្គាល់។ នេះបង្ហាញឲ្យឃើញថា អ្នកមានជីវភាពធូរធានៅក្នុងទីក្រុងភ្នំពេញកំពុងកើនឡើងហើយពួកគេចាយប្រាក់ទូលាយជាងមុន។ ប្រព័ន្ធសេដ្ឋកិច្ចថ្មីដែលបើកឲ្យមានការបង់រម្លោះក៏ជាមធ្យោបាយជំរុញឲ្យមនុស្សជាច្រើនចាយវាយហួសមាឌផងដែរ។ នេះបង្ហាញពីគំនិត«សន្តិភាពនិយម»របស់ពលរដ្ឋខ្មែរ តែវាក៏មាននីភ័យខ្ពស់ដែរសម្រាប់សង្គមជាពិសេសសម្រាប់អ្នកក្រ។
ភោជនីយដ្ឋាននិងហាងទំនិញទំនើបៗកំពុងរីកដុះដាលយ៉ាងខ្លាំងពាសពេញរាជធានីក្នុងនោះភោជនីយដ្ឋានដែលមានស្លាកយីយោមកពីបរទេសបានបង្ហាញវត្តមានកាន់តែច្រើនឡើងៗស្ទើរតែគ្រប់ទិសទី។ ភោជនីយដ្ឋានទាំងនោះពោរពេញដោយអតិថិជនយ៉ាងកុះករដែលពេលខ្លះរកកន្លែងចតយានយន្តឬកន្លែងអង្គុយមិនបានផង។
គ្មានតួលេខបង្ហាញពីចំនួនពិតប្រាកដនៃភោជនីយដ្ឋានក្នុងទីក្រុងភ្នំពេញទេ ប៉ុន្តែ យោងតាមរបាយការណ៍ស្ទង់មតិមួយរបស់ភោជនីយដ្ឋាន Park Café ដែលចេញផ្សាយកាលពីខែសីហាកន្លងទៅនេះ នៅភ្នំពេញមានភោជនីយដ្ឋានចំនួនជាង ១៧០០ ដែលបានចុះក្នុងទំព័រ Yellow Page Cambodia។ របាយការណ៍ស្ទង់មតិដដែលឲ្យដឹងថា វិស័យចំណីអាហារនិងភេសជ្ជៈជាចលករសេដ្ឋកិច្ចដ៏សំខាន់មួយដែលបានផ្តល់ការងារដល់មនុស្សជាង ១៥ ០០០ នាក់។ ក្រៅពីភោជនីយដ្ឋាន ហាងទំនិញទំនើបៗក៏កើនឡើងគួរឲ្យកត់សម្គាល់ដែរ។
មានមូលហេតុច្រើនយ៉ាងដែលគេអាចពន្យល់បញ្ហានេះបាន៖
មូលហេតុទី១៖ មកពីការកើនឡើងនៃអ្នកមានជីវភាពមធ្យមនិងខ្ពស់នៅក្នុងទីក្រុងភ្នំពេញ។ មូលហេតុទី២៖ មកពីការផ្លាស់ប្តូរទម្លាប់នៃការបរិភោគរបស់ពលរដ្ឋខ្មែរជាពិសេសយុវជនសម័យថ្មីដែលចូលចិត្តបរិភោគអាហារក្រៅផ្ទះ។ ម្យ៉ាងទៀត មនុស្សសម័យនេះកាន់តែរវល់ជាមួយនឹងការងារច្រើនជាងមុន។ មូលហេតុទី៣៖មកពីការផ្លាស់ប្តូររបៀបចាយវាយទូលាយជាងមុនពោលគឺពលរដ្ឋខ្មែរហាក់ដូចជាមិនសូវចូលចិត្តសន្សំប្រាក់បេះមិនចេញដូចពីមុនទៀតទេ។
ជាការពិតណាស់ កាលពីមុន ពលរដ្ឋខ្មែរចូលចិត្តបរិភោគអាហារជួបជុំគ្នាក្នុនៅឯផ្ទះដើម្បីបានជួបជុំគ្រួសារផង រីឯការចំណាយក៏តិចដែរ។ ប៉ុន្តែ បច្ចុប្បន្ន មនុស្សជាច្រើនដែលមមាញឹកនឹងការងារគ្មានពេលវេលាទៅបរិភោគអាហារជួបជុំគ្រួសារដូចពីមុនទេ។ លើសពីនេះ គ្រួសារអ្នកទីក្រុងក៏ផ្តើមចូលចិត្តនាំក្រុមគ្រួសារទៅហូបអាហារក្រៅផ្ទះញឹកញាប់ជាងមុនដែរនៅ។
ម្យ៉ាងទៀត គ្រួសារអ្នកទីក្រុងជាច្រើនក៏បានផ្លាស់ប្តូរឥរិយាបថក្នុងការរស់នៅគួរឲ្យកត់សម្គាល់ពោលគឺជាឥរិយាបថរបៀបអ្នកមានសម័យថ្មីដែលចូលចិត្តចាយលុយធំជាងមាឌ។ ប្រពន្ធ័បង់រម្លោះក៏បានជួយសម្រួលឲ្យគ្រួសារខ្មែរជាច្រើនដែលមានប្រាក់ចំណូលចាប់ពីកម្រិតមធ្យមឡើងទៅមានផ្ទះសម្បែង និងសម្ភារៈទំនើបៗប្រើដោយមិនចាំចាប់មានប្រាក់គ្រប់ចំនួនឡើយ។ នេះសបញ្ជាក់ថា ប្រជាពលរដ្ឋខ្មែរហាក់មានជំនឿទៅលើសន្តិភាពនិងស្ថិរភាពសង្គមដោយមិនសូវខ្វល់ខ្វាយពីសង្គ្រាមនិងការរត់លូនដូចពីមុនទៀតទេ។
សម្រាប់យុវវ័យសម័យក្រោយសង្គ្រាមវិញ ពួកគេរឹតតែមិនដែលគិតដល់ទាល់តែសោះថា អាចមានភ្លើងសង្គ្រាមគួរឲ្យព្រឺខ្លាចដូចជំនាន់ឪពុកម្តាយរបស់ពួកគេ។ ការបរិភោគអាហារតាមបែបបស្ចឹមប្រទេសក្នុងភោជនីយដ្ឋានទំនើបៗ ក្នុងម៉ាស៊ីនត្រជាក់ មានអាំងទែណែត Wifi បានក្លាយជារបៀបរស់នៅថ្មីយ៉ាងពេញនិយមរបស់ក្រុមយុវវ័យដែលចេញពីគ្រួសារមានជីវភាពធូរធារ។ ក្រៅពីនោះ មនុស្សសម័យនេះហាក់ដូចជាគិតពីរឿងសម្ភារៈនិយមដើម្បីបង្អួតគ្នាច្រើនជាងគិតពីការសន្សំប្រាក់។ តាមទ្រឹស្តីសេដ្ឋកិច្ច នេះជាសញ្ញាល្អមួយដែលធ្វើឲ្យសេដ្ឋកិច្ចដើរ។
ប៉ុន្តែ កំណើននៃអ្នកមានជីវភាពធូរធាក្នុងទីក្រុងនិងទីប្រជុំជនមានតិចតួចប៉ុណ្ណោះបើធៀបនឹងចំនួនអ្នកក្រីក្រនៅឯទីជនបទ។ ទីជនបទដែលពលរដ្ឋជាច្រើនរស់ក្នុងស្ថានភាពរខេករខាកខ្វះមុខខ្វះក្រោយយ៉ាងខ្លាំងនៅឡើយ។ សម័យសម្ភារៈនិយមក៏ជាកញ្ចក់ឆ្លុះបញ្ចាំងគម្លាតរវាងអ្នកមាននិងអ្នកក្រ រវាងទីក្រុងជនបទ កាន់តែច្បាស់ក្រឡែត។ យ៉ាងណាក៏ដោយ វត្តមាននៃប្រព័ន្ធបង់រម្លោះ និងស្ថាប័នមីក្រូហិរញ្ញវត្ថុយ៉ាងព្រោងព្រាតក៏បានជួយសម្រួលដល់គ្រួសារអ្នកក្រីក្រមួយចំនួនដែរ។ ប៉ុន្តែ ទន្ទឹមនឹងនោះ ការប្រាក់ខ្ពស់ក៏បានជំរុញឲ្យអ្នកក្រមួយចំនួនជំពាក់បំណុលគេកាន់តែច្រើនឡើង។
ចំនួនអ្នកជំពាក់បំណុលគេកាន់តែកើនខណៈដែលលទ្ធភាពសងវិញមានតិចតួច រីឯសន្តិភាពនិងស្ថិរភាពសង្គមក៏នៅផុយស្រួយនៅឡើយនោះ គឺជាហានីភ័យធំធេងមួយជាពិសេសសម្រាប់គ្រួសារអ្នកក្រីក្រ។ ដូច្នេះ ការពង្រឹងសន្តិភាព ស្ថិរភាពសង្គម ការបង្កើតគោលនយោបាយគាំពារជនក្រីក្រ និងការបែងចែកកំណើនសេដ្ឋកិច្ចប្រកបដោយសមធម៌ គឺជាដំណោះស្រាយដើម្បីបញ្ចៀសហានីភ័យដែលអ្នកនយោបាយមិនអាចមើលរំលងបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ