សត្វអណ្តើកហ្លួងនៅកម្ពុជា កំពុងស្ថិតនៅក្នុងហានិភ័យខ្ពស់ឈានដល់ការផុតពូជ!
សត្វអណ្តើកហ្លួងនៅកម្ពុជា កំពុងប្រឈមនឹងបញ្ហាជាច្រើន ដើម្បីរស់រានមានជីវិត។ អណ្តើកហ្លួង ឬអណ្តើកសសៃ គឺជាប្រភេទអណ្តើក កំពុងរងការគម្រាមកំហែង ដោយការបំផ្លាញជម្រករស់នៅ ជាពិសេសការបូមខ្សាច់ និងការកាប់ឆ្ការព្រៃលិចទឹក។ ជម្រកតែមួយគត់នៅកម្ពុជារបស់អណ្តើកហ្លួង ដែលស្ថិតតាមប្រព័ន្ធព្រែកស្រែអំបិល ខេត្តកោះកុង ត្រូវបានរំខានជាបន្តបន្ទាប់ អាចនឹងធ្វើឱ្យប្រភេទសត្វនេះ ស្ថិតនៅក្នុងហានិភ័យខ្ពស់ឈានដល់ការផុតពូជ។សូមស្តាប់ ប៉ុន សោភ័ណ៖
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
អស់រយៈពេលប៉ុន្មានឆ្នាំកន្លងទៅនេះ ចំនួននៅសេសសល់តិចតួចរបស់ អណ្តើកហ្លូង នៅកម្ពុជា មានប្រហែលតិចជាង១០ក្បាល ដែលទទួលបានការការពារកុំឱ្យផុតពូជដោយរដ្ឋបាលជលផល សហការជាមួយអង្កការសហគមន៍អភិរក្សសត្វព្រៃ និងប្រជាសហគមន៍។ អណ្តើកហ្លួងជាអណ្តើកមួយប្រភេទ ក្នុងចំណោមអណ្តើក២៥ប្រភេទដែលកំពុងរងគ្រោះថ្នាក់ខ្លាំងជាងគេនៅលើសាកលលោក។ ការដាក់ឈ្មោះអណ្តើកហ្លួងយ៉ាងដូច្នេះ ពីព្រោះកាលពីមុនមានតែគ្រួសាររាជវង្សប៉ុណ្ណោះ ដែលអាចសោយពងវាបាន។ រហូតមកដល់ពេលនេះ វាត្រូវបានដាក់បញ្ចូលជាប្រភេទសត្វល្មូនតំណាងឱ្យប្រទេសកម្ពុជា ដោយព្រះរាជក្រិត ចុះថ្ងៃទី ២១ ខែមីនា ឆ្នាំ២០០៥។
អណ្តើកហ្លួង ត្រូវបានគេគិតថា ផុតពូជពីកម្ពុជា ទៅហើយ រហូតដល់ឆ្នាំ ២០០០។ ប៉ុន្តែរដ្ឋបាលជលផល និងអង្កការ សមាគមន៍អភិរក្សសត្វព្រៃ WCS បានសិក្សាស្រាវជ្រាវ និងរកឃើញចំនួនសេសសល់តិចតួច រស់នៅប្រព័ន្ធព្រែកអំបិល។
លោក អ៊ិន ហ៊ុល មន្ត្រីរដ្ឋបាលជលផល និងជាអ្នកសម្របសម្រួលគម្រោង បាននិយាយថា ឆ្នាំនេះលោកសង្កេតឃើញថា មានការធ្លាក់ចុះនៃចំនួនសំបុកពងរបស់ហ្លួង។ ដោយសារតែឆ្នាំនេះក្រុមអភិរក្សរបស់លោករកឃើញសំបុកពងអណ្តើកហ្លួង នៅក្នុងធម្មជាតិចំនួនតែមួយសំបុកតែប៉ុណ្ណោះ ខណៈឆ្នាំមុនរកឃើញ៤សំបុក។ លោក អ៊ិន ហ៊ុល ជឿជាក់ថា បញ្ហានេះបង្កឡើងដោយកំណើននៃការបូមខ្សាច់ធ្វើអាជីវកម្ម និងការកាប់ទន្រ្ទានដីព្រៃយកធ្វើកម្មសិទ្ធ ដែលសកម្មភាពទាំងនេះអាចធ្វើឱ្យបាត់បង់ទីជម្រក និងកន្លែងពងកូនរបស់អណ្តើកហ្លួង។
គួររំលឹកជូនថា នៅក្នុងឆ្នាំ២០០១ អង្កការ WCS សហការជាមួយរដ្ឋបាលជលផល ចាប់ផ្តើមកម្មវិធី ការពារសំបុកដោយមានការចូលរួមពីប្រជាសហគមន៍ស្រុកស្រែអំបិល ដោយជ្រើសរើសអតីតអ្នកប្រមូលពង និងកូនសត្វអណ្តើកហ្លួង មកធ្វើជាបុគ្គលិកគម្រោង ដើម្បីស្វែងរក និងការពារសំបុក ជំនួសឱ្យការប្រមូលយកពងលក់។ ចាប់ពីនោះមក សំបុកពងចំនួន៣៩ ដែលមានពងចំនួន ៥៦៤ពង ត្រូវបានការពារ ហើយជាលទ្ធផល ទទួលបានកូនញាស់ចំនួន ៣៨២ កូន។ ចំណែកកូនដែលបានញាស់ពីសំបុក ត្រូវបានយកទៅកាន់មជ្ឈមណ្ឌលដើម្បីធ្វើការចិញ្ចឹម និងថែរក្សារហូតដល់វាអាចរស់នៅដោយខ្លួនឯងបាន។
អង្កការ WCS សហការជាមួយរដ្ឋបាលជលផល ត្រូវការគាំទ្រពីគ្រប់ស្ថាប័នពាក់ព័ន្ធទាំងអស់ដើម្បីធានាថា ការរំខានទំាងនេះនឹងមិនបន្តកើតមាននៅតាមដងព្រែកស្រែអំបិល ដែលជាជម្រកតែមួយគត់របស់អណ្តើកហ្លួងនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ