លោក ជា សុផារ៉ា ៖ ជាង ៩០% នៃពលរដ្ឋ ៤៩៣ គ្រួសារ រស់នៅលើអគារប៊ូឌិញស ចង់បានលុយ ហើយដើរចេញ
បន្ទាប់ពីចុះស្រង់ស្ថិតិពលរដ្ឋកំពុងរស់នៅលើអគារសហកម្មសិទ្ធិប៊ូឌិញ ស រកឃើញតួលេខផ្លូវការសរុប ៤៩៣គ្រួសារ ក្រសួងរៀបចំដែនដី ក៏រកឃើញដែរថា ជាង ៩០% នៃពលរដ្ឋទាំងនោះ ចង់បានសាច់ប្រាក់ ច្រើនជាង ទទួលយកជម្រើសអភិវឌ្ឍនៅនឹងកន្លែង។ យ៉ាងណាក៏ដោយ ក្រសួងរៀបចំដែនដី នឹងកោះប្រជុំជាមួយពលរដ្ឋដើម្បីពន្យល់លម្អិតរឿងគម្រោងអភិវឌ្ឍបន្ថែមទៀត បន្ទាប់ពីពលរដ្ឋឯកភាពលើទំហំកាន់កាប់ជាក់ស្តែង ដែលបានវាស់វែងរួចហើយ កាលពីដើមខែធ្នូ ឆ្នាំ២០១៦។
ចុះផ្សាយនៅថ្ងៃ៖
ស្តាប់ - ០២:៤៣
លោក ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ប្រាប់វិទ្យុបារាំងអន្តរជាតិ នៅថ្ងៃព្រហស្បតិ៍ (ថ្ងៃទី២២ ខែធ្នូ ឆ្នាំ២០១៦) នេះថា ជាង ៩០% នៃពលរដ្ឋ សរុប ៤៩៣ គ្រួសារ កំពុងរស់នៅលើអគារសហកម្មសិទ្ធិ ប៊ូឌីង ស ចង់បានសាច់ប្រាក់ ហើយសុខចិត្តដើរចេញ ខណៈពលរដ្ឋប្រមាណ ៧% ទៀត ព្រមទទួលយកការអភិវឌ្ឍនៅនឹងកន្លែង។
លោក ជា សុផារ៉ា បន្ថែមថា ក្នុងសប្តាហ៍នេះ ក្រសួងរៀបចំដែនដី នឹងផ្តើម បិតផ្សាយស្ថិតិផ្លូវការ របស់ពលរដ្ឋកំពុងរស់នៅលើអគារប៊ូឌិញ សរុបជិត ៥០០គ្រួសារ ដោយទុកពេលជូន ១៥ថ្ងៃ ដើម្បីឲ្យពួកគាត់ តវ៉ាលើទំហំផ្ទះ ដែលកាន់កាប់ជាក់ស្តែង បន្ទាប់ពីក្រសួងចុះស្រង់ស្ថិតិ កាលពីថ្ងៃ ៣ខែធ្នូ ឆ្នាំ២០១៦ ក្នុងគោលបំណងផ្តល់វិញ្ញាបនបត្រសម្គាល់កម្មសិទ្ធិឯកជននៃអគារសហកម្មសិទ្ធិនេះ។ ហើយក្រសួង នឹងកោះប្រជុំជាមួយពលរដ្ឋលម្អិតរឿងការអភិវឌ្ឍគម្រោងម្តងទៀត ក្រោយរយៈពេលបិតផ្សាយបានបញ្ចប់។
រដ្ឋមន្រ្តីក្រសួងរៀបចំដែនដី បញ្ជាក់ថា ដើម្បីអភិវឌ្ឍគម្រោងនេះ ក្រសួង ត្រូវការការឯកភាពគ្នា មួយរយភាគរយ លើជម្រើសណាមួយ ពីពលរដ្ឋ ប្រសិនបើមានការជំទាស់តែ ពីរគ្រួសារ ក៏ត្រូវគាំងចោលគម្រោងទាំងអស់ដែរ ព្រោះ អាគារប៊ូឌិញត្រូវការ វាយកំទេចចោលទាំងមូល។ លោក ជា សុផារ៉ា អះអាងថា លោកអាចនឹងបញ្ចុះបញ្ចូល ពលរដ្ឋភាគតិចឲ្យឯកភាពតាមគេភាគច្រើន ៩០% ព្រោះការឯកភាពដុំៗចឹង មិនអាចអនុវត្តគម្រោងបានទេ ហើយវាជាហានិភ័យខ្ពស់ដែរ បើទោះបីជា រដ្ឋាភិបាលមានបំណងឲ្យពលរដ្ឋអភិវឌ្ឍនៅនឹងកន្លែង។ ហើយចំពោះការកំណត់ថ្លៃអគារសម្រាប់គ្រួសារនិមួយៗ ដែលចង់យកទឹកប្រាក់ ក្រសួងនឹង រកក្រុមហ៊ុនអចលនទ្រព្យឯករាជ្យមកវាយតម្លៃ ដោយផ្អែកលើស្ថានភាពបច្ចុប្បន្ន ចំពោះ អគារប៊ូឌីញ ស្ថិតក្នុងបរិវេណសង្កាត់ទន្លេបាសាក់ ខណ្ឌចំការមន និងបានកសាងឡើងតាំងពីឆ្នាំ១៩៦៣ ។
តំណាងសហគមន៍ពលរដ្ឋអគារប៊ូឌិញ លោកស្រី ឌី សុផាន់ណារ៉ាមានី បានបញ្ជាក់ថា គ្រួសារភាគច្រើន ដែលជ្រើសយកសាច់ប្រាក់ ដោយសារមានតម្រូវការផ្ទាល់ខ្លួន ខណៈគ្រួសារមួយចំនួនយល់ឃើញថា ការអភិវឌ្ឍនៅកន្លែងកណ្តាលទីក្រុង-ទីប្រជុំជន នឹងក្លាយជាលំនៅដ្ឋានដ៏ប្រសើរមួយនៅថ្ងៃអនាគត។
គួរជម្រាបថា ក្រសួងរៀបចំដែនដី និងក្រុមហ៊ុនជប៉ុន Arakawa គ្រោងនឹងអភិវឌ្ឍនៅទីតាំងអគារប៊ូឌិញស ក្នុងទឹកប្រាក់ជិត ៨០លានដុល្លារសហរដ្ឋ។ ការសាងសង់អាចនឹងចាប់ផ្តើមនៅដើមឆ្នាំ២០១៧ ហើយស៊ីពេលជិត ៤ឆ្នាំ រាប់បញ្ចូល ការសាងសង់ទីតាំងស្នាក់នៅបណ្តោះអាសន្ន ក្នុងសង្កាត់ទឹកថ្លា រាជធានីភ្នំពេញ និងគម្រោងសាងសង់អគារប៊ូឌីងថ្មីមានកម្ពស់ ២១ជាន់ មានទីតាំងចំណត ៣ជាន់ កន្លែងលក់ដូរ ១ជាន់ និងកន្លែងស្នាក់នៅ ៥ជាន់ ដែលបន្ទប់ស្នាក់នៅនីមួយៗ មានទំហំធំជាងមុន ១០%។ ចំណែកចាប់ពី ជាន់ទី៩ ឡើងទៅ នឹងផ្តល់ជាកម្មសិទ្ធិវិនិយោគរបស់ក្រុមហ៊ុនជប៉ុន Arakawa៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ