ហេតុអ្វី អ.ស.ប រកផែនទីបោន ដែលកម្ពុជាតម្កល់ទុកមិនឃើញ?
ចុះផ្សាយនៅថ្ងៃ៖
ស្តាប់ - ០៥:១៦
អង្គការសហប្រជាជាតិ ឲ្យកម្ពុជាខ្ចីផែនទីចំនួន១៨ផ្ទាំង។ ប៉ុន្តែជាការកត់សម្គាល់ ផែនទីទាំង១៨ផ្ទាំងនេះ មិនមែនជាផែនទីខ្នាតមួយលើមួយរយពាន់ដែលកម្ពុជាសុំខ្ចីនោះទេ។ ផែនទីដែលកម្ពុជាសុំខ្ចី ត្រូវបានអង្គការសហប្រជាជាតិគូសបញ្ជាក់ថា មិនអាចរកឃើញទេ។ តើវាអាចទៅរួចដែរឬទេដែលថា ផែនទីជាប្រវត្តិសាស្ត្រដែលកម្ពុជាយកទៅតម្កល់នៅអង្គការសហប្រជាជាតិបាត់ ទើបរកមិនឃើញ? ឬថា មែនទែនទៅ កម្ពុជាមិនធ្លាប់បានតម្កល់ទុកផែនទីបោនខ្នាតមួយលើមួយរយពាន់នោះ នៅអង្គការសហប្រជាជាតិទេ? ហើយប្រសិនបើកម្ពុជាមិនបានតម្កល់ផែនទីនៅអង្គការសហប្រជាជាតិទេ សួរថាតើគេគួរធ្វើយ៉ាងណាចំពោះមាត្រា២នៃរដ្ឋធម្មនុញ្ញ?
កាលពីថ្ងៃទី០៦ខែកក្កដា លោកនាយករដ្ឋមន្ដ្រីហ៊ុន សែន បានស្នើទៅកាន់អគ្គលេខាធិការនៃអង្គការសហប្រជាជាតិ អនុញ្ញាតឲ្យកម្ពុជាខ្ចីផែនទីបោន ខ្នាត ១លើ១០០ពាន់ បោះពុម្ពដោយក្រុមភូមិសាស្ត្រឥណ្ឌូចិន។ ជាផែនទីដែលមានចែងក្នុងរដ្ឋធម្មនុញ្ញ និងជាផែនទីដែលជនជាតិខ្មែរទាំងអស់ជឿជាក់ថា រដ្ឋាភិបាលសម័យសង្គមរាស្រ្តនិយម យកទៅតំកល់នៅអង្គការសហប្រជាជាតិ នៅឆ្នាំ១៩៦៤។
ប៉ុន្តែជាការកត់សម្គាល់ អង្គការសហប្រជាជាតិមិនអាចរកឃើញផែនទីបោន ខ្នាត១លើ១០០ពាន់ដែលកម្ពុជាសុំខ្ចីនោះទេ។ បើតាមលិខិតរបស់លោក បាន គីមូន ចុះថ្ងៃទី០៥សីហា អង្គការសហប្រជាជាតិរកឃើញតែផែនទីមួយចំនួនប៉ុណ្ណោះ ពីកន្លែងផ្ទុកឯកសាររបស់បណ្ណាល័យ ដាក ហាម៉ាស្កូហ្សូល ដែលអាចមានប្រយោជន៍ចំពោះរដ្ឋាភិបាលកម្ពុជា។ ផែនទីដែលរកឃើញនោះមានចំនួន១៨ផ្ទាំង។ ប៉ុន្តែវាមិនមែនជាផែនទីបោន ខ្នាត១លើ១រយពាន់ ស្ដីពីព្រំដែនកម្ពុជាជាមួយប្រទេសជិតខាង ដែលកម្ពុជាស្នើសុំខ្ចីនោះទេ។ វាគឺជាផែនទីស្ដីពីការទម្លាក់គ្រាប់បែករបស់អាមេរិកនិងវៀតណាមខាងត្បូង ចូលក្នុងទឹកដីកម្ពុជា នៅសម័យសង្គមរាស្ត្រនិយម។
វាជារឿងគួរឲ្យភ្ញាក់ផ្អើល នៅពេលអង្គការសហប្រជាជាតិរកមិនឃើញផែនទីបោនខ្នាតមួយលើមួយរយពាន់ ដែលកម្ពុជាអះអាងថា យកទៅតម្កល់ទុក នៅឆ្នាំ១៩៦៤។ បើដូច្នេះ តើវាអាចទៅរួចដែរឬទេដែលថា ផែនទីនោះបាត់ ទើបគេរកមិនឃើញ?
តាមពិត នៅក្នុងខែឧសភា ឆ្នាំ១៩៦៤ រដ្ឋាភិបាលកម្ពុជាពិតជាបានផ្ដល់សំណុំឯកសារមួយឈុត ក្នុងនោះមានទាំងផែនទីផង ជូនទៅបេសកជនរបស់អង្គការសហប្រជាជាតិពិតមែន។ កាលណោះ ក្រុមប្រឹក្សាសន្តិសុខអង្គការសហប្រជាជាតិ បានបញ្ជូនបេសកជនមកកម្ពុជាដើម្បីពិនិត្យទីកន្លែងដែលកម្ពុជាប្ដឹងថា រងគ្រោះដោយការទម្លាក់គ្រាប់បែកឥតឈប់ឈរ ពីសំណាក់សហរដ្ឋអាមេរិក។ ប៉ុន្តែការផ្ដល់ឯកសារទៅអង្គការសហប្រជាជាតិ ដើម្បីជាជំនួយផ្លូវច្បាប់សម្រាប់បណ្ដឹងតទល់ជាមួយអាមេរិក គឺមិនអាចចាត់ទុកថា ជាការតម្កល់ទុកដោយមានការទទួលស្គាល់ជាអន្ដរជាតិនោះទេ។
ចុះបើដូច្នេះ សួរថាតើផែនទីបោន ខ្នាតមួយលើមួយរយពាន់ដែលកម្ពុជាអះអាងថា ព្រះបាទនរោត្តមសីហនុ តម្កល់ទុកនៅអង្គការសហប្រជាជាតិនោះ នៅឯណា? ហេតុអ្វីទើបគេរកមិនឃើញ? ឬថា មែនទែនទៅ កម្ពុជាមិនធ្លាប់បានតម្កល់ទុកផែនទីបោនខ្នាតមួយលើមួយរយពាន់នោះ នៅអង្គការសហប្រជាជាតិទេ? ហើយប្រសិនបើកម្ពុជាមិនបានតម្កល់ផែនទីនៅអង្គការសហប្រជាជាតិទេ សួរថាតើគេគួរធ្វើយ៉ាងណាចំពោះមាត្រា២នៃរដ្ឋធម្មនុញ្ញ?
បូរណភាពទឹកដីរបស់កម្ពុជា មិនអាចរំលោភបានដាច់ខាតក្នុងព្រំដែនរបស់ខ្លួនដែលមានកំណត់ក្នុងផែនទីខ្នាត១លើ១រយពាន់ ធ្វើនៅចន្លោះឆ្នាំ១៩៣៣ ដល់ឆ្នាំ១៩៥៣ ហើយដែលត្រូវបានទទួលស្គាល់ជាអន្ដរជាតិ នៅចន្លោះឆ្នាំ១៩៦៣ ដល់ឆ្នាំ១៩៦៩។ នេះជាខ្លឹមសារមាត្រា២នៃរដ្ឋធម្មនុញ្ញ ដែលជនកម្ពុជាចងចាំ និងជឿជាក់យ៉ាងមុតមាំ ជាច្រើនជំនាន់មកហើយ។
ប្រសិនបើផែនទីខ្នាត១លើ១រយពាន់ ដែលមានចែងក្នុងរដ្ឋធម្មនុញ្ញនោះ គ្មានការទទួលស្គាល់ជាអន្ដរជាតិទេ វាគ្មានអត្ថន័យផ្នែកច្បាប់អ្វី ដើម្បីចាប់បង្ខំប្រទេសដទៃ ជាពិសេសប្រទេសជិតខាង ឲ្យអនុវត្តតាមនោះដែរ។ ជាក់ស្ដែង នៅក្នុងការងារកំណត់និងបោះបង្គោលព្រំដែនជាមួយប្រទេសវៀតណាមសព្វថ្ងៃ កម្ពុជាបានចុះកិច្ចព្រមព្រៀងនិងសន្ធិសញ្ញានានា មិនតិចជាង៥ទេ។
មែនទែនទៅ បើមិននិយាយពីសច្ចភាព មាត្រា២នៃរដ្ឋធម្មនុញ្ញនៅមានចំណុចខ្វះខាតច្រើន។ ខ្វះខាតព្រោះមាត្រានេះ បានចងកម្ពុជាឲ្យប្រើប្រាស់ផែនទីខ្នាត១លើ១រយពាន់ ដែលធ្វើនៅចន្លោះឆ្នាំ១៩៣៣ ដល់ឆ្នាំ១៩៥៣។ មាត្រានេះអនុញ្ញាតឲ្យកម្ពុជាកំណត់ព្រំដែនជាមួយប្រទេសពីរប៉ុណ្ណោះ គឺប្រទេសវៀតណាម និងប្រទេសឡាវ។ ប៉ុន្តែមាត្រាដដែលនេះ កម្ពុជាមិនអាចប្រើប្រាស់ជាមួយប្រទេសថៃបានទេ។ ការកំណត់ព្រំដែនជាមួយប្រទេសថៃ ត្រូវប្រើប្រាស់ផែនទីខ្នាត១លើ២រយពាន់ តាមរយៈអនុស្សរណៈយោគយល់ដែលកម្ពុជាបានធ្វើជាមួយប្រទេសថៃ។
ផ្អែកតាមបញ្ហាចម្រូងចម្រាស់ដូចបានលើកឡើងនេះ រដ្ឋាភិបាលកម្ពុជានិងភាគីពាក់ព័ន្ធទាំងអស់ គួរតែពិចារណាលទ្ធភាពនៃការធ្វើវិសោធនកម្មមាត្រា២នៃរដ្ឋធម្មនុញ្ញនេះឡើងវិញ។ ជាការពិតហើយថា វាមិនមែនជារឿងចាំបាច់បន្ទាន់ដែលទាមទារដាច់ណាត់ឲ្យធ្វើនោះទេ។ ប៉ុន្តែវាជារឿងដែលគួរធ្វើ ដើម្បីឲ្យការអនុវត្តជាក់ស្ដែង អនុលោមយ៉ាងពិតប្រាកដទៅតាមច្បាប់កំពូលនៃប្រទេស និងដើម្បីបញ្ចៀសទំនាស់ព្រំដែននាពេលខាងមុខជាមួយប្រទេសជិតខាង និងជាពិសេសជាមួយខ្មែរគ្នាឯង។ ការធ្វើវិសោធនកម្មរដ្ឋធម្មនុញ្ញ មិនមែនជារឿងគួរឲ្យខ្លាចរអារទេ ប្រសិនបើរួមគ្នាធ្វើប្រកបដោយគតិបណ្ឌិត ដោយតម្កល់ផលប្រយោជន៍ជាតិជាធំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ