ការប្រគុំតន្ត្រីអភិរក្សសត្វព្រៃដំបូងគេនៅកម្ពុជាធ្វើឡើងនៅរាត្រីនេះ!
អង្គការសម្ព័ន្ធភាពសត្វព្រៃ WA និងក្រុមប្រឹក្សាយុវជនឯកអគ្គរដ្ឋទូតសហរដ្ឋអាមេរិក AYC បានរៀបចំការប្រគុំតន្ត្រីព្រៃនៃជីវិតឡើង នៅរាត្រីថ្ងៃទី ៣១មករានេះ នៅឯផ្សាររាត្រី ក្នុងទីក្រុងភ្នំពេញ ចាប់ពីម៉ោង ៥ល្ងាចរហូតដល់ម៉ោង៩យប់។ ការប្រគុំតន្ត្រី គឺក្នុងគោលបំណងលើកកំពស់ការយល់ដឹងពីការជួញដូរសត្វព្រៃ និងដើម្បីឲ្យសាធារណជន ជាពិសេសយុវជនចូលរួមការពារបេតិកភណ្ឌធម្មជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
អង្គការសម្ព័ន្ធភាពសត្វព្រៃ WA និងក្រុមប្រឹក្សាយុវជនឯកអគ្គរដ្ឋទូតសហរដ្ឋអាមេរិក AYC បានចំណាយពេលប្រមាណជា ៣ ទៅ ៤ខែ ដើម្បីរៀបចំការប្រគុំតន្ត្រីអភិរក្សសត្វព្រៃ នៅរាត្រីនេះ ឡើង ក្រោមការជួយឧបត្ថម្ភពីស្ថានទូតអាមេរិកប្រចាំនៅកម្ពុជា។
លោកយីង ហន អ្នកសម្របសម្រួលក្នុងគម្រោងអប់រំបរិស្ថានចល័តរបស់អង្គការសម្ព័ន្ធភាពសត្វព្រៃ បានថ្លែងប្រាប់វិទ្យុបារាំងថា ការប្រគុំតន្ត្រីនេះ គឺជាការប្រគុំតន្ត្រីមួយដ៏ធំជាងគេនៅកម្ពុជា ដើម្បីផ្សព្វផ្សាយនិងអភិរក្សសត្វព្រៃនៅកម្ពុជា។ លោកបន្តថា បច្ចុប្បន្ននេះ សត្វព្រៃមួយចំនួន ដូចជាគោព្រៃ និងទន្សោងជាដើមនោះស្ទើរតែផុតពូជទៅហើយនៅកម្ពុជា ហើយសត្វខ្លា និងដំរី ក៏មានចំនួនកាន់តែតិចផងដែរ។ តាមរបាយការណ៍របស់អង្គការសម្ព័ន្ធភាពសត្វព្រៃឲ្យដឹងថា មានសត្វព្រៃចំនួន ៦០.០០០ក្បាល ត្រូវបានរំដោះពីការជួញដូរ។
នៅក្នុងយុទ្ធនាការផ្សព្វផ្សាយពីការប្រគុំតន្ត្រីនេះ ក៏មានការផលិតជាវីដេអូខ្លី រយៈពេល៣នាទីកន្លះ បង្ហោះក្នុង Youtube ផងដែរ ដោយមានចំណងជើងថា ការប្រគុំតន្ត្រីព្រៃនៃជីវិត ឬជាភាសាអង់គ្លេស Wild for Life Concert។
ការប្រគុំតន្ត្រីនេះ មានការចូលរួមពីតារាចម្រៀងកូនខ្មែរនៅអាមេរិក គឺកញ្ញាឡូរ៉ា ម៉ម, ម្ចាស់បទ Baby I’m Sorry ក្នុងរឿងភាគរបស់កម្មវិធីឡូយ៩ លោកឌួង សុខគា និងមានតារាចម្រៀងជាច្រើនផ្សេងទៀត ដែលសុទ្ធសឹងតែជាយុវជន និងការចូលរួមសម្តែងល្ខោនស្បែកពីសមាគមសិល្បៈសុវណ្ណភូមិផងដែរ។
ប៉ុន្តែការប្រគុំតន្ត្រីអភិរក្សសត្វព្រៃនៅពេលនេះ ត្រូវបានធ្វើឡើងនៅក្នុងទីក្រុងភ្នំពេញ ខណៈដែលប្រជាជននៅតាមតំបន់ព្រៃភ្នំ និងខេត្តមួយចំនួន នៅតែបន្តបរបាញ់សត្វព្រៃ យកមកធ្វើជាចំណីអាហារ និងលក់ជាប្រចាំថ្ងៃ ដោយគ្មានអន្តរាគមន៍ពីអាជ្ញាធរមូលដ្ឋាននៅតាមតំបន់អស់ទាំងនោះ។ ជាក់ស្តែងដូចជាសត្វស្វា និងសត្វជ្រូកព្រៃ ត្រូវបានគេបរបាញ់ជាប្រចាំថ្ងៃ និងដាក់លក់ដោយចំហរ នៅក្នុងតំបន់មួយចំនួនក្នុងខេត្តស្ទឹងត្រែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ