ឯកអគ្គរដ្ឋទូតថ្មីរបស់អាមេរិកសន្យាពង្រឹងចំណងមិត្តភាពកម្ពុជា-អាមេរិកឲ្យកាន់តែរឹងមាំ
លោក William Heidt ឯកអគ្គរដ្ឋទូតតែងតាំងថ្មីរបស់សហរដ្ឋអាមេរិក បានបង្ហាញមុខជាសាធារណៈលើកដំបូងនៅកម្ពុជា មុនពេលចាប់ផ្តើមការងារការទូតជាផ្លូវការរបស់លោកប្រចាំនៅប្រទេសកម្ពុជា។ លោក Heidt បានថ្លែងសុន្ទរកថាលើកដំបូងនៅក្នុងពិធីសច្ចាប្រណិធានរបស់ក្រុមអ្នកស្ម័គ្រចិត្ត Peace Corps នៅក្នុងស្ថានទូតអាមេរិកនាថ្ងៃទី២៥កញ្ញានេះ ដោយមិនទាន់បង្ហាញការចាប់អារម្មណ៍ណាមួយនៅឡើយទេ ក៏ប៉ុន្តែតាមរយៈសារក្នុងវីដេអូខ្លីបកន្លងមក លោក William Heidt បានសន្យាថា នឹងពង្រឹងចំណងមិត្តភាពកម្ពុជា-អាមេរិកឲ្យកាន់តែស៊ីជម្រៅនិងរឹងមាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
លោក William Heidt ឯកអគ្គរដ្ឋទូតតែងតាំងថ្មីរបស់សហរដ្ឋអាមេរិក បានធ្វើដំណើរមកដល់ប្រទេសកម្ពុជាកាលពីថ្ងៃសៅរិ៍ទី១៩ខែកញ្ញាសប្តាហ៍មុន ដើម្បីចូលបំពេញការងារការទូតជាផ្លូវការតំណាងឲ្យប្រទេសមហាអំណាចលើពិភពលោក នៅក្នុងប្រទេសកម្ពុជា។
មកដល់តាំងពីថ្ងៃទី១៩កញ្ញា តែលោក Heidt ទើបតែបានបង្ហាញមុខជាសាធារណៈលើកដំបូង នៅថ្ងៃទី២៥កញ្ញានេះ នៅក្នុងពិធីសច្ចាប្រណិធានរបស់ក្រុមអ្នកស្ម័គ្រចិត្តរបស់ទីភ្នាក់ងារ Peace Corps ចំនួន៦៤រូប ដែលបានរៀបចំធ្វើឡើងនៅក្នុងបរិវេណស្ថានទូតអាមេរិកប្រចាំនៅកម្ពុជា។ លោក William Heidt នៅមិនទាន់ថ្វាយសាតាំងទៅកាន់ព្រះមហាក្សត្រនៅឡើយទេ។
នៅក្នុងសុន្ទរកថាលើកដំបូងរបស់លោក កាលពីព្រឹកថ្ងៃទី២៥កញ្ញា លោក Heidt មិនទាន់លើកឡើងពីយុទ្ធសាស្រ្តការងារការទូតរបស់លោកនៅក្នុងប្រទេសកម្ពុជានៅឡើយទេ។ តែយ៉ាងណាក៏ដោយ នៅមុនពេលមកដល់ប្រទេសកម្ពុជានេះ លោក William Heidt ដែលមានភរិយាជាជនជាតិខ្មែរ ហើយចេះនិយាយភាសាខ្មែរផងនេះ បានផ្ញើសារតាមរយៈវីដេអូខ្លីបមួយ ដែលមានរយៈពេលជិត២នាទីថា លោកមានកិត្តិយសដែលប្រធានាធិបតីអាមេរិក បារ៉ាក់ អូបាម៉ា បានតែងតាំងលោកជាឯកអគ្គរដ្ឋទូតថ្មីរបស់សហរដ្ឋអាមេរិកប្រចាំនៅព្រះរាជាណាចក្រកម្ពុជា។ មុនពេលមកធ្វើជាឯកអគ្គរដ្ឋទូតអាមេរិកថ្មីនៅកម្ពុជានេះ លោកក៏ធ្លាប់បានមកបំពេញការងារនៅក្នុងប្រទេសកម្ពុជាម្តងកាលពីចុងឆ្នាំ១៩៩០ ដោយនៅពេលនោះ លោកបានជួយបង្កើនទំនាក់ទំនងពាណិជ្ជកម្មរវាងប្រទេសកម្ពុជា និងសហរដ្ឋអាមេរិក ជួយលើកកម្ពស់សន្តិសុខស្បៀងអាហារ និងជួយការពារបរិស្ថានផងដែរ។ នៅក្នុងវីដេអូខ្លីបនោះ លោកសន្យាថា លោកនឹងធ្វើការងារដើម្បីឲ្យទំនាក់ទំនងរវាងសហរដ្ឋអាមេរិក និងប្រជាពលរដ្ឋកម្ពុជាកាន់តែស៊ីជម្រៅ នឹងពង្រឹងចំណងមិត្តភាពរវាងប្រទេសទាំងពីរឲ្យកាន់តែរឹងមាំឡើង។
លោក ផៃ ស៊ីផាន រដ្ឋលេខាធិការនិងជាអ្នកនាំពាក្យទីស្តីការគណៈរដ្ឋមន្រ្តីបានស្វាគមន៍ឯកអគ្គរដ្ឋទូតថ្មីនៅកម្ពុជា ហើយលោកនឹងរំពឹងថា លោក Heidt នឹងជួយបង្កើនទំនាក់ទំនងការទូតរវាងកម្ពុជា-អាមេរិក ឲ្យកាន់តែប្រសើរឡើង។ ចំណែកឯលោក យឹម សុវណ្ណ អ្នកនាំពាក្យគណបក្សសង្រ្គោះជាតិ ក៏រំពឹងដែរថា ឯកអគ្គរដ្ឋទូតថ្មីរបស់អាមេរិកនេះ នឹងបន្តជួយលើកកម្ពស់ការគោរពសិទ្ធិមនុស្សនិងលទ្ធិប្រជាធិបតេយ្យនៅកម្ពុជា ពិសេសគឺការបន្តជួយកំណែទម្រង់ប្រព័ន្ធយុត្តិធម៌នៅកម្ពុជា។
សូមបញ្ជាក់ថា លោក William Heidt បានស្បថនៅមុខក្រសួងការបរទេសអាមេរិកកាលពីថ្ងៃទី១៤កញ្ញា ក្នុងនាមជាឯកអគ្គរដ្ឋទូតតែងតាំងថ្មីរបស់សហរដ្ឋអាមេរិកប្រចាំនៅកម្ពុជា បន្ទាប់ពីលោក William E. Todd ដែលបានបញ្ចប់អាណត្តិរយៈពេល៣ឆ្នាំនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ