លីកាដូ៖ ភាពចង្អៀតណែនក្នុងគុក ធ្វើឲ្យស្ថានភាពស្ត្រីជាប់ឃុំទទួលរងហិង្សាផ្លូវអារម្មណ៍
អង្គការលីកាដូនៅថ្ងៃទី២៦វិច្ឆិកានេះ បានចេញផ្សាយវិដេអូខ្លីក្រោមចំណងជើងថា«ជីវិតជាម្ដាយក្នុងពន្ធនាគារ» ដែលការចេញផ្សាយនេះ ជាផ្នែកមួយនៃយុទ្ធនាការ១៦ថ្ងៃជាសាកលក្នុងការទប់ស្កាត់អំពើហិង្សាលើស្រ្តី។ បើតាមលីកាដូ ស្ថានភាពស្ត្រីកំពុងជាប់ឃុំ បានរងហិង្សាផ្លូវចិត្តនិងអារម្មណ៍ ខណៈហិង្សាលើរូបរាងកាយមិនសូវជាកើតមានឡើយ។
ចុះផ្សាយនៅថ្ងៃ៖
ស្តាប់ - ០២:០៣
ហិង្សាផ្លូវចិត្តនិងអារម្មណ៍ដែលកើតមានចំពោះស្ត្រីកំពុងជាប់ឃុំក្នុងពន្ធនាគារ ដែលភាគច្រើនជាស្រ្តីមានផ្ទៃពោះ ស្ត្រីមានជាប់កូនតូចរស់នៅជាមួយ និងអនីតិជន គឺដោយសារតែភាពចង្អៀតណែននៅក្នុងពន្ធនាគារ ក្នុងរយៈពេលប៉ុន្មានឆ្នាំចុងក្រោយនេះ។ ក្នុងន័យនេះលោក អំ សំអាត មន្ត្រីទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO)ពន្យល់ថា នៅពេលដែលពន្ធនាគារមានភាពចង្អៀតណែននោះ ការផ្ដល់សេវាថែទាំរបស់ពន្ធនគារនឹងមានភាពរអាក់រអួល។ ប្រសិនបើអ្នកជាប់ឃុំទាំងស្រ្តី និងបុរសគ្មានប្រាក់បង់ទេ ពួកគេនឹងមិនទទួលបានសារៈសំខាន់ជាមូលដ្ឋានឡើយដូចជាៈ កង្វះខាតអាហារហូបចុក ទឹកស្អាត ពេលវេលានៅក្រៅបន្ទប់ឃុំឃាំង និងការការពារផ្លូវច្បាប់។
ជាក់ស្ដែងស្ត្រីម្នាក់ដែលសម្ព័ន្ធខ្មែរជំរឿន និងការពារសិទ្ធិមនុស្សលីកាដូ ចង់ក្រងជាវិដេអូក្រោមចំណងជើងថា«ជីវិតជាម្ដាយក្នុងពន្ធនាគារ» បានរៀបរាប់ថា ការរស់នៅរបស់គាត់ ក្នុងពន្ធនាគារប្រឈមនឹងការហូបមិនគ្រប់គ្រាន់ ការចេញចូលមានការរឹតត្បិត ហើយការពពោះមិនសូវមានការថែទាំដិតដល់។ ប្រឈមបញ្ហានេះលោកអំ សំអាត ជំរុញឲ្យក្រសួងយុត្តិធម៌ ពនអនុវត្តបទបញ្ជាដែលដាក់ចេញដោយលោកនាយករដ្ឋមន្ត្រី ហ៊ុន សែន កាលពីចុងឆ្នាំ២០១៨ លើកលែងទោសចំពោះស្ត្រីជាប់ឃុំកំពុងពពោះ និងមានកូនតូចរស់នៅជាមួយ តាមរយៈការចូលរួមដោះស្រាយរបស់មេធាវីស្ម័គ្រចិត្ត។
ពីខាងក្រសួងមហាផ្ទៃ បច្ចុប្បន្ននេះចំនួនអ្នកជាប់ឃុំក្នុងពន្ធនាគារនៅទូទាំងប្រទេសមានចំនួន៣៦ ៦០០នាក់ ហើយស្រ្តីមានចំនួនជាង៣០០០នាក់។ ចំណែកលីកាដូវិញមានអ្នកជាប់ឃុំជាង ២៩០០០នាក់ នៅក្នុងពន្ធនាគារចំនួន១៨ ដែលអង្គការលីកាដូធ្វើការឃ្លាំមើល។ ចំនួនច្រើនលើសលប់នៃអ្នកជាប់ឃុំនៅក្នុងបន្ទប់ឃុំឃាំងគឺខ្ពស់ខ្លាំង មិនធ្លាប់មានពីមុនមកទេ នៅទូទាំងប្រទេសកម្ពុជា ដែលភាគច្រើនបណ្ដាលមកពីការប្រើប្រាស់នីតិវិធីឃុំខ្លួនបណ្ដោះអាសន្នរង់ចាំសវនាការច្រើនហួសហេតុពេក។
ប៉ុន្តែយ៉ាងណាក៏ដោយក្នុងពេលថ្មីៗនេះរដ្ឋមន្ត្រីក្រសួងមហាផ្ទៃលោក ស ខេងបានលើកឡើងពីយន្តការថ្មី ដោយជំរុញឲ្យក្រសួងមហាផ្ទៃ ក្រសួងយុត្តិធម៌ និងសាលារាជធានីភ្នំពេញត្រូវជួបពិភាក្សាគ្នាដោយធ្វើកំណែទម្រង់នៃការញែកដាក់ពិរុទ្ធជន ទណ្ឌិតអ្នកទោសគ្រឿងញៀនឲ្យដាច់ដោយឡែកពីគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ