កម្មករ-កម្មការិនី នៅរោងចក្រ ហី យ៉ុងជីន ព្រមានដុតកងឡានបើគ្មានដំណោះស្រាយ
កម្មករ-កម្មការិនីជាង១០០នាក់ធ្វើការនៅរោងចក្រ ហី យ៉ុងជីន ផ្ទុះកូដកម្មទាមទារលក្ខខណ្ឌការងារ៧ចំណុចពីថៅកែរោងចក្រនៅព្រឹកថ្ងៃ អង្គារ ១៨ សីហានេះ។ បើគ្មានដំណោះស្រាយឫក៏បន្តពន្យាពេលទៀតនោះ ក្រុមកម្មករ នឹងដុតកងឡាន ឈរតវ៉ា និង យកលក្ខខណ្ឌ៧ចំណុចនេះទៅដាក់នៅក្រសួងការងារ។
ចុះផ្សាយនៅថ្ងៃ៖
ស្តាប់ - ០១:៣៣
លក្ខខណ្ឌ៧ចំណុចនោះរួមមាន៖១-ស្នើទៅក្រុមហ៊ុនកុំបញ្ឈប់កម្មករដោយអត់មានមូលហេតុ២-សុំបើកលុយ៥ភាគរយនៅពេលដល់កិច្ចសន្យាការងារ ៣-បើកប្រាក់ខែឲ្យបានទៀងទាត់នៅមុនម៉ោង៤ ៤-សុំឲ្យស្ត្រីមានផ្ទៃពោះចេញមុនម៉ោង១៥នាទី ៥-នៅពេលកម្មករឈឺមានសំបុត្រពេទ្យសុំឲ្យក្រុមហ៊ុនទទួលយក ៦-នៅពេលកម្មករឈប់សម្រាក់សុំឲ្យក្រុមហ៊ុនកាត់លុយជាសមាមាត្រ ៧-ស្នើឲ្យមានពេទ្យប្រចាំការ និងថ្នាំពេទ្យគ្រប់គ្រាន់សម្រាប់កម្មករ។
លោក សយ ចាន់ធូ បុគ្គលិកដោះស្រាយវិវាទរបស់សហជីពសេរីកម្មករបានបញ្ជាក់ប្រាប់វិទ្យុបារាំងអន្តរជាតិថា កម្មករបានដាក់ញត្តិទាមទារលក្ខខណ្ឌ៧ចំណុចនេះទៅកាន់រដ្ឋបាលរបស់រោងចក្រហើយ ប៉ុន្តែនៅមិនទាន់មានការឆ្លើយតបមកវិញទេ។ លោក សយ ចាន់ធូ ឲ្យដឹងទៀតថា បើរោងចក្រមិនឆ្លើយតប និង គ្មានដំណោះស្រាយសមរម្យសម្រាប់ពួកគេទេ ក្រុមកម្មករនឹងបន្តតវ៉ានៅមុខរោងចក្ររហូតលទ្ធផល និង ដុតកងឡាន។
លោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជា ហៅកាត់GMAC ឲ្យដឹងថារោងចក្រ ហី យ៉ុងជីន ស្ថិតនៅភូមិ កំបូល ខណ្ឌពោធិ៍សែនជ័យ មិនស្ថិតនៅក្រោមការគ្រប់គ្រងរបស់ GMAC ទេ។ ប៉ុន្តែបើមើលជាទូទៅនៅក្នុងទិដ្ឋភាព ច្បាប់លក្ខខណ្ឌ៧ចំណុចនេះអាចដោះស្រាយបាន។
លោក កាំង ម៉ូនីកាបន្តថា ប្រសិនបើការទាមទារលក្ខខណ្ឌការងារមិនមានចែងនៅក្នុងច្បាប់ទេនោះ វាអាចនឹងប្រឈមសម្រាប់ភាគីរោងចក្រដោយសារតែសង្វាក់ផលិតកម្មមិនដំណើរការ ហើយម្យ៉ាងទៀតអាចបាត់បង់ទំនុកចិត្តពីអ្នកបញ្ជាទិញចំពោះការប្រគល់ទំនិញ ។ តាម លោក កាំង ម៉ូនីកា រូបភាពនៃការតវ៉ាមាននិន្នាកាកើនឡើងបើធៀបនឹងឆ្នាំទៅមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ