កម្ពុជាជាប់លេខរៀងទី១២៧ ក្នុងចំណោម ១៨៩ ប្រទេសលើកំណែទម្រង់បរិយាកាសធុរកិច្ច
របាយការណ៍ថ្មីមួយរបស់ក្រុមធនាគារពិភពលោក បានរកឃើញថា ប្រទេសកម្ពុជា បានបន្តធ្វើឲ្យមានភាពកាន់តែល្អប្រសើរឡើងដល់បរិយាកាសផ្នែកធុរកិច្ចរបស់ខ្លួនក្នុងរយៈពេលកន្លងមក។ ក្នុងចំណោមប្រទេសចំនួន ១៨៩កម្ពុជាបច្ចុប្បន្ន ត្រូវបានគេចាត់ចំណាត់ថ្នាក់លេខរៀងទី១២៧។ កម្ពុជាស្ថិតនៅក្នុងចំណោមប្រទេសពីរដែលនៅលើពិភពលោក ដែលបានធ្វើកំណែទម្រង់មួយចំនួនទាក់ទងទៅនឹងទំនុកចិត្តនៃការផ្គត់ផ្គង់អគ្គិសនី និងភាពងាយស្រួលក្នុងការចាប់ផ្តើមធុរកិច្ច។
ចុះផ្សាយនៅថ្ងៃ៖
ស្តាប់ - ០២:០៣
យោងតាមសេចក្តីប្រកាសព័ត៌មានរបស់ធនាគារពិភពលោកនៅថ្ងៃពុធទី២៨តុលានេះ របាយការណ៍ដែលមានចំណងជើងថា «ការធ្វើធុរកិច្ចឆ្នាំ២០១៦៖ការវាស់វែងអំពីគុណភាពនិងប្រសិទ្ធភាព» បានរកឃើញដោយប្រើប្រាស់វិធីសាស្រ្តគណនាប្រៀបធៀបថា កម្ពុជា គឺជាប្រទេសមួយក្នុងចំណោមប្រទេសតែពីរប៉ុណ្ណោះនៅលើពិភពលោកដែលបានធ្វើកំណែទម្រង់ចំនួនមួយដោយបានកែលម្អផ្នែកទំនុកចិត្តនៃការផ្គត់ផ្គង់អគ្គិសនី។ ពោលគឺប្រទេសកម្ពុជាមានចំណាត់ថ្នាក់ទី១២៧ ក្នុងចំណោម១៨៩ប្រទេសក្នុងឆ្នាំ២០១៥ ពីចំណាត់ថ្នាក់ទី១៣៣ក្នុងឆ្នាំ២០១៤។
របាយការណ៍ធនាគារពិភពលោកបន្តថា កម្ពុជាក៏បានកែលម្អផងដែរលើរយៈពេលដែលត្រូវចំណាយដើម្បីចាប់ផ្តើមធុរកិច្ចមួយ និងបានកាត់បន្ថយចំនួននៃនីតិវិធីដែលចាំបាច់។ នាពេលអនាគត កម្ពុជានឹងមានឱកាសធ្វើឲ្យប្រសើរលើបរិយាកាសធុរកិច្ចបន្ថែមទៀត ជាពិសេសការលុបចោលលក្ខខណ្ឌតម្រូវឲ្យមានដើមទុនអប្បបរមាដើម្បីចាប់ផ្តើមដំណើរការធុរកិច្ចថ្មីមួយ។
លោក អាឡាសាន សូ ប្រធានគ្រប់គ្រងធនាគារពិភពលោកប្រចាំកម្ពុជា បានមានប្រសាសន៍ថា “កម្ពុជាមានការរីកចម្រើនច្រើនក្នុងការជំរុញធ្វើឲ្យបរិយាកាសផ្នែកធុរកិច្ចមានលក្ខណៈកាន់តែល្អប្រសើរជាងមុន។ ភាពរីកចម្រើនទាំងនេះ នឹងជួយកម្ពុជាសម្រេចបាននូវគោលដៅរបស់ខ្លួនក្នុងការលើកកម្ពស់ការវិនិយោគលើផ្នែកធុរកិច្ចនិងការបង្កើតការងារធ្វើ។”
សម្រាប់រយៈពេល ១០ឆ្នាំជាប់ៗគ្នា ប្រទេសសិង្ហបូរី ស្ថិតនៅលេខរៀងលំដាប់ទី១ នៅលើពិភពលោក នៅក្នុងរបាយការណ៍ប្រចាំឆ្នាំរបស់ក្រុមធនាគារពិភពលោកស្តីពីភាពងាយស្រួលនៃការធ្វើធុរកិច្ច។ ក្នុងចំណោមប្រទេសចំនួន២០ដែលស្ថិតនៅលំដាប់ថ្នាក់លើគេនោះមាន ប្រទេសនូវែលហ្សេឡង់ (ស្ថិតនៅលំដាប់លេខរៀងទី២) សាធារណៈរដ្ឋកូរ៉េ (លេខរៀងទី៤) ហុងកុង (លេខរៀងទី៥) តៃវ៉ាន់ (លេខរៀងទី១១) អូស្ត្រាលី (លេខរៀងទី១៣) និងម៉ាឡេស៊ី (លេខរៀងទី១៨)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ