យុវជនទាមទារឲ្យមេបក្សប្រឆាំងបញ្ជាក់ពីការអះអាងរបស់លោកហ៊ុន សែនរឿងទំនប់វារីអគ្គិសនីស្ទឹងអារ៉ែង
យុវជនមួយក្រុម ដែលមានឈ្មោះថា “យុវជនខ្មែរមហានគរ” បានប្រកាសក្នុងសន្និសីទកាសែត នៅព្រឹកថ្ងៃទី៣១ ខែធ្នូនេះ ទាមទារឲ្យលោកសមរង្ស៊ី មេដឹកនាំគណបក្សប្រឆាំង បញ្ជាក់ឲ្យច្បាស់ពីការអះអាងរបស់លោកនាយករដ្ឋមន្ត្រី ហ៊ុន សែន ពាក់ព័ន្ធនឹងគម្រោងសាងសង់ទំនប់វារីអគ្គិសនី ស្ទឹងអារ៉ែង ក្នុងខេត្តកោះកុង។ ក្រុមយុវជននោះ បានប្រកាស ទុកពេលឲ្យលោកសមរង្ស៊ី ១ សប្តាហ៍ ដើម្បីធ្វើការបកស្រាយ បញ្ជាក់។ នោះគឺកាលពីខែតុលា នៅក្រៅកិច្ចប្រជុំរដ្ឋសភា លោកសមរង្ស៊ី បានប្រាប់អ្នកកាសែតថា លោកនាយករដ្ឋមន្ត្រី ហ៊ុន សែន បានប្រាប់លោកថា គម្រោងសាងសង់ទំនប់វារីអគ្គិសនីស្ទឹងអារ៉ែងស្ថិតក្នុងការសិក្សានៅឡើយ ហើយប្រហែលជា នឹងមិនអាចកើតឡើងទេ ក្នុងអាណត្តិនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៦
ក្រុមយុវជន ដែលជាបណ្តាញអង្គការសង្គមស៊ីវិល ខាងអភិរក្សតំបន់អារ៉ែង ក្នុងខេត្តកោះកុង បានប្រកាសក្នុងសន្និសីទកាសែត នៅព្រឹកថ្ងៃពុធនេះ ទាមទារឲ្យលោកសមរង្ស៊ី ប្រធានគណបក្សសង្គ្រោះជាតិ ត្រូវបញ្ជាក់បំភ្លឺឲ្យច្បាស់ឡើងវិញ អំពីការលើកឡើងរបស់លោកនាយករដ្ឋមន្ត្រី ហ៊ុនសែន ពាក់ព័ន្ធនឹងគម្រោងសាងសង់ទំនប់វារីអគ្គិសនី ស្ទឹងអារ៉ែង។
តាមក្រុមយុវជន នៅក្រៅកិច្ចប្រជុំរដ្ឋសភា កាលពីខែតុលា លោកសមរង្ស៊ី បានធ្វើជាអ្នកនាំពាក្យឲ្យលោកនាយករដ្ឋមន្ត្រី ហ៊ុន សែន ហើយប្រកាសបន្តទៅក្រុមអ្នកកាសែតថា លោកនាយករដ្ឋមន្ត្រី ហ៊ុន សែន បានប្រាប់លោក នៅក្នុងជំនួប នៅក្រៅកិច្ចប្រជុំរដ្ឋសភា ថា គម្រោងសាងសង់ទំនប់វារីអគ្គិសនីស្ទឹងអារ៉ែង ស្ថិតក្នុងការសិក្សានៅឡើយ ហើយប្រហែលជា នឹងមិនអាចកើតឡើងទេ ក្នុងអាណត្តិនេះ ទុកឲ្យអ្នកដឹកនាំជំនាន់ក្រោយជាអ្នកសម្រេច។
ប៉ុន្តែនៅពេលសព្វថ្ងៃនេះ យុវជន ជុំ ហួត តំណាងយុវជនខ្មែរមហានគរ បានអះអាងថា មានមន្ត្រីរដ្ឋាភិបាល ព្រមទាំងតំណាងក្រុមហ៊ុនចិន ស៊ិនណូ ហាយដ្រូ ដោយមានទាហានប្រមាណ ១០ នាក់ បានចុះទៅកាន់តំបន់អារ៉ែង ហើយបានគំរាមប្រជាពលរដ្ឋ សហគមន៍ មិនឲ្យតវ៉ាជំទាស់នឹងគម្រោងសាងសង់ទំនប់វារីអគ្គិសនីស្ទឹងអារ៉ែងនោះទេ។
តាមតំណាងយុវជន ពួកគេទុកពេល ១ អាទិត្យ គិតពីថ្ងៃនេះ ដើម្បីឲ្យលោកសមរង្ស៊ី ឆ្លើយបំភ្លឺអំពីពាក្យសម្តីរបស់លោកនាយករដ្ឋមន្ត្រីហ៊ុនសែន។ បើសិនជាគ្មានការបញ្ជាក់ច្បាស់លាស់ទេ នោះពួកគេនឹងធ្វើបាតុកម្ម។
មិនមានការបញ្ជាក់ពីមន្ត្រីក្រសួងរ៉ែ និងថាមពល ជុំវិញបច្ចុប្បន្នភាពនៃគម្រោងវារីអគ្គិសនី ស្ទឹងអារ៉ែង ក្នុងខេត្តកោះកុងនោះទេ។ ប៉ុន្តែកាលពីថ្ងៃទី៣០ ខែកញ្ញា ឆ្នាំ២០១៤ លោក អ៊ិត ប្រាំង រដ្ឋលេខាធិការក្រសួងរ៉ែ និងថាមពល បានបញ្ជាក់ក្នុងសន្និសីទកាសែតថា គម្រោងវារីអគ្គិសនីស្ទឹងជាយអារ៉ែង ក្នុងខេត្តកោះកុង ដែលត្រូវចំណាយថវិកា ៤០០ លានដុល្លារ នឹងអាចបញ្ចប់នៅឆ្នាំ២០២០។ គម្រោងវារីអគ្គិសនី ស្ទឹងជាយអារ៉ែង ត្រូវបានសិក្សាបច្ចេកទេស និងបរិស្ថានធម្មជាតិ និងសង្គម ចាប់តាំងពីឆ្នាំ២០០៦។
តាមរបាយការណ៍របស់ក្រសួងរ៉ែ និងថាមពល កាលពីថ្ងៃទី២៧កញ្ញា គម្រោងវារីអគ្គិសនី ស្ទឹងជាយអារ៉ែង មានផ្ទៃដីប្រមាណជាង ១០ ម៉ឺនហិកតា មានផលប៉ះពាល់សត្វបក្សីប្រមាណ ១១៣ ប្រភេទ ថនិកសត្វ ៥៣ ប្រភេទ ល្មូន ៣១ ប្រភេទ និងមច្ឆាជាតិ ៤៣ ប្រភេទ។ គម្រោងនេះ មានការប៉ះពាល់ដល់ប្រជាពលរដ្ឋ ចំនួន ១.៣១៨ នាក់ ត្រូវជា ៣៤៩ គ្រួសារ នៅក្នុង ៣ ឃុំ។ ទន្ទឹមនឹងនោះ ក៏មានប៉ះពាល់សាលារៀន ចំនួន ៦ វត្តអារាម ចំនួន ៣ ស្រះទឹកសហគមន៍ ៦ សាលាឃុំ ២ និងសំណង់ផ្សេងៗទៀត ដូចជា របង ផ្នូរខ្មោច អណ្តូងទឹក។ល។
យ៉ាងណាក៏ដោយ ក្រុមអ្នកអភិរក្សបរិស្ថាន និងអ្នកតំណាងរាស្ត្រមកពីគណបក្សសង្គ្រោះជាតិ ស្នើដល់រដ្ឋាភិបាល ឲ្យលុបចោលគម្រោងអភិវឌ្ឍន៍វារីអគ្គិសនី ស្ទឹងអារ៉ែង ហើយប្រែក្លាយតំបន់នោះ ជាតំបន់អេកូទេសចរណ៍ជំនួសវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ