យុវជនមួយក្រុមត្រូវបានហាមឃាត់ មិនឲ្យដាក់ញត្តិទៅរដ្ឋសភា រឿងបូមខ្សាច់នៅកោះកុង
អាជ្ញាធរក្រុងភ្នំពេញ នៅព្រឹកថ្ងៃព្រហស្បត្តិ៍ទី២៥មិថុនានេះ បានឃាត់ខ្លួន យុវជន៤នាក់ ក្រោយពីពួកគេបានយកញត្តិទៅដាក់ជូនរដ្ឋសភា ដើម្បីសុំអន្តរាគមន៍បញ្ឈប់សកម្មភាពបូមខ្សាច់របស់ក្រុមហ៊ុនមួយស្ថិតនៅក្នុងខេត្តកោះកុង។ ប៉ុន្តែក្រុមយុវជនមកពីអង្គការមាតាធម្មជាតិ ដែលមានគ្នា១៥នាក់ មិនទាន់ទាំងបានជួបជុំគ្នាផង ក៍ត្រូវបានក្រុមសន្តិសុខមួកខ្មៅបានវាយបំបែក ដោយបានរឹបអូសសម្ភារៈ និងញត្តិរបស់ពួកគេយកទៅជាមួយផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៤
មិនទាន់ទាំងបានជួបជុំគ្នាស្រួលបួលផង យុវជនចំនួន១៥នាក់ មកពីអង្គការចលនាមាតាធម្មជាតិ ក៍ត្រូវបានកងកម្លាំងសន្តិសុខសណ្តាប់ធ្នាប់ខណ្ឌចំការមន វាយបំបែកតាំងពីព្រឹកព្រលឹមអុល ថ្ងៃព្រហស្បត្តិ៍ទី២៥មិថុនានេះ។ អាជ្ញាធរបានទះកំភ្លៀងទៅលើយុវជនម្នាក់ និងបានរឹបអូសយកសម្ភារៈមួយចំនួនទៅជាមួយផង។ មួយសន្ទុះក្រោយមក ក្រុមយុវជនទាំងនោះ បានទៅប្រមូលផ្តុំគ្នាជាថ្មី នៅមុខច្រកចេញចូលមជ្ឈមណ្ឌលភ្នំពេញ ដើម្បីផ្តល់បទសម្ភាសន៍ដល់អ្នកកាសែត ប៉ុន្តែមិនយូប៉ុន្មាន ពួកគេ ក៍ត្រូវបានកងកម្លាំងសន្តិសុខខណ្ឌពាក់មួកឃ្លុបខ្មៅ វាយបំបែកជាថ្មី នៅប្រមាណជាម៉ោង៨និង៣០នាទី។ ពេលនេះហើយ ដែលកងកម្លាំងសន្តិសុខបានឃាត់ខ្លួនយុវជន៤នាក់ ២នាក់មកពីអង្គការមាតាធម្មជាតិ ម្នាក់មកពីអង្គការការពារព្រៃឈើ និងម្នាក់ទៀតឈ្មោះ ឌិត សុទ្ធី ជាមន្ត្រីព័ត៌មានរបស់អង្គការអាដហុក។ ពួកគេត្រូវបានដោះលែងមកវិញ ក្រោយពីការសាកសួរព័ត៌មាននិងបានធ្វើកិច្ចសន្យារួច។
យុវជន ឌឹម គុណឌី សមាជិកម្នាក់នៃអង្គការនេះ បានថ្លែងនៅមុនពេលឃាត់ខ្លួនថា តាមគម្រោង ក្រុមចលនាមាតាធម្មជាតិ គ្រោងនឹងជួបជុំគ្នានៅមុខរដ្ឋសភា នៅព្រឹកថ្ងៃនេះ ដើម្បីដាក់ញត្តិទៅគណៈកម្មការទី៣នៃរដ្ឋសភា ដើម្បីស្នើសុំឲ្យជួយអន្តរាគមន៍បញ្ឈប់ការបូមខ្សាច់របស់ក្រុមហ៊ុន International Renbow Co.Ltd ហើយបន្ទាប់មកនឹងបន្តយកញត្តិទៅដាក់នៅស្ថានទូតប្រទេសសិង្ហបុរីជាបន្តទៀត។ ដាក់ញត្តិនៅស្ថានទូតសិង្ហបុរី ក៍ព្រោះថា ប្រទេសសិង្ហបុរី ធ្លាប់បានទិញខ្សាច់ពីប្រទេសកម្ពុជាក្នុងឆ្នាំ២០១០-២០១១កន្លងទៅ។ ប៉ុន្តែមិនទាំងបានដាក់ផង ពួកគេក៍ត្រូវបានវាយបំបែកបាត់អស់ទៅហើយ។
ក្រុមចលនាមាតាធម្មជាតិអះអាងថា ក្រុមហ៊ុន International Renbow Co.Ltd បានឃុបជិតជាមួយមន្ទីររ៉ែនិងថាមពលខេត្ត ដើម្បីធ្វើអាជីវកម្មបូមខ្សាច់ នៅក្នុងស្រុកគីរីសាគរ ខេត្តកោះកុង ដែលបង្កឲ្យបាត់បង់ព្រៃកោងកាង ជីវៈចម្រុះនៅក្នុងសមុទ្រ បាក់ឆ្នេរ និងកោះតូចៗ ហើយជាពិសេសនោះ គឺបាត់បង់មុខរបររបស់ប្រជានេសាទជាង៣០០គ្រួសារ ស្ថិតនៅភូមិកោះស្រឡៅ ឃុំកោះកាពិ ខេត្តកោះកុង។ ប៉ុន្តែ អ្នកនាំពាក្យក្រសួងរ៉ែនិងថាមពល លោក ឌិត ទីណា ធ្លាប់បានអះអាងថា ការធ្វើអាជីកម្មបូមខ្សាច់របស់ក្រុមហ៊ុនខាងលើ មានការអនុញ្ញាតពីក្រសួងពាក់ព័ន្ធត្រឹមត្រូវ។
គួរកត់សម្គាល់ថា អាជ្ញាធរក្រុងភ្នំពេញរាប់រយនាក់ ត្រូវបានពង្រាយនៅតាមចំណុចជាច្រើននៅតាមផ្លូវទៅរដ្ឋសភា ខណៈដែលចរាចរណ៍នៅមុខរដ្ឋសភាបានបិទទាំងស្រុង តាំងពីព្រឹកព្រលឹមអុលមកម្លេះ ដើម្បីរារាំងក្រុមយុវជនដែលមានគ្នាមិនដល់២០នាក់ផងនេះ ដាក់ញត្តិទៅរដ្ឋសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ