ក្រុមហ៊ុនហ្សាម៉ាន់៖ ការចោទប្រកាន់របស់ឯកអគ្គរដ្ឋទូតតួកគីគ្មានមូលដ្ឋានច្បាស់លាស់
ក្នុងសន្និសីទសារព័ត៌មាន កាលពីល្ងាចថ្ងៃចន្ទ ឯកអគ្គរដ្ឋទូត តួកគីបានចោទប្រកាន់ សាលាហ្សាម៉ាន់ នៅកម្ពុជា ថាមានពាក់ព័ន្ធនឹង អង្គការភេវរកម្ម ចលនាលោក ហ្គូឡេន តាំងពីឆ្នាំ១៩៩៣មក។ ឯកអគ្គរដ្ឋទូត បានស្នើឲ្យរដ្ឋាភិបាលកម្ពុជា បញ្ឈប់ការគាំទ្រគ្រប់រូបភាព និងចង់ឃើញ សាលាហ្សាម៉ាន់ បញ្ចប់សកម្មភាពគ្រប់យ៉ាងនៅកម្ពុជា។ ប្រតិកម្មតបនឹងការលើកឡើងនេះ ប្រធានក្រុមហ៊ុន ហ្សាម៉ាន់ ចាត់ទុកថា នេះជាការចោទប្រកាន់ ដែលគ្មានមូលដ្ឋានច្បាស់លាស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ប្រធានក្រុមហ៊ុន ហ្សាម៉ាន់ លោក អេចដឺ គីលីក (Ejder Kilic) នៅថ្ងៃអង្គារនេះ បានចេញសេចក្តីថ្លែងការណ៍មួយ សោកស្តាយចំពោះការចោទប្រកាន់ សាលាហ្សាម៉ាន់ ថាជាប់ពាក់ព័ន្ធនឹងការប៉ុនប៉ងធ្វើរដ្ឋប្រហារនៅ ប្រទេសទួរគី កាលពីថ្ងៃទី១៦ កក្កដា។ សេចក្តីថ្លែងការណ៍ ចាត់ទុកថា នេះជាការចោទប្រកាន់របស់ឯកអគ្គរដ្ឋទូតតួកគី នៅកម្ពុជា គឺគ្មានមូលដ្ឋានច្បាស់លាស់ ហើយមានបំណងបង្ខូចកេរ្តិ៍ឈ្មោះក្រុមហ៊ុន។ ក្រុមហ៊ុនហ្សាម៉ាន់ បានទាមទារឲ្យ ឯកអគ្គរដ្ឋទូត បង្ហាញភស្តុតាង ឬសេចក្តីសម្រេចណាមួយរបស់តុលាការ ដើម្បីបញ្ជាក់ការចោទប្រកាន់។
ប្រតិកម្មនេះ កើតឡើងបន្ទាប់ពីឯកអគ្គរដ្ឋទូតតួកគី ប្រចាំកម្ពុជា លោក អីលហាន កេម៉ាល់ ទុក (Ilhan Kenmal Tug)កាលពីថ្ងៃចន្ទ ក្នុងសន្និសីទសារព័ត៌មាន ដើម្បីពន្យល់បន្ថែមពី ស្ថានភាពប្រទេសទួរគី ក្រោយរដ្ឋប្រហារ បានចោទប្រកាន់ សាលាហ្សាម៉ាន់ នៅកម្ពុជា ថាមានទំនាក់ទំនងជាមួយនឹង សមាជិកចលនាសង្គមអ៊ីស្លាមសេរី របស់លោក ហ្វេធូឡា ហ្គូឡិន (Fethullah Gulen)។ រដ្ឋាភិបាលតួកគី បានចោទ លោក Gulen ជាអ្នកប៉ុនប៉ងធ្វើរដ្ឋប្រហារយោធា ហើយចាត់ទុក ចលនារបស់គាត់ថា ជាអង្គការភេវរកម្មផងដែរ។ ឯកអគ្គរដ្ឋទូត បានបន្ថែមថា ទួរគី បានស្នើឲ្យរដ្ឋាភិបាលកម្ពុជា បញ្ឈប់ការគាំទ្រគ្រប់រូបភាព និងចង់ឃើញ សាលាហ្សាម៉ាន់ បញ្ចប់សកម្មភាពគ្រប់យ៉ាងនៅកម្ពុជា។
លោក អេចដឺ គីលីក (Ejder Kilic) ប្រធានក្រុមហ៊ុន ហ្សាម៉ាន់ បានពន្យល់ថា ថ្វីត្បិតតែ សាលាហ្សាម៉ាន់បង្កើតឡើងដោយយោងតាមទស្សនៈរបស់លោក ហ្វេធូឡា ហ្គូឡិន តែលោក ហ្គូឡិន មិនធ្លាប់ផ្តល់ការសម្រេចចិត្ត ឬចូលរួមក្នុងដំណើរការសាលានេះទេ ឬអាចនិយាយបានថា ទំនាក់ទំនងរវាងលោក ហ្គូឡិន និងសាលា គឺមានត្រឹមតែទស្សនៈប៉ុណ្ណោះ។
នៅព្រឹកថ្ងៃអង្គារនេះដែរ អ្នកនាំពាក្យក្រសួងអប់រំ លោក រស់ សាលីន បដិសេធមិនធ្វើអត្ថាធិប្បាយលើចំណោទបញ្ហានេះទេ។ សូមរំលឹកថា សាលាហ្សាម៉ាន់ នៅកម្ពុជា បង្កើតឡើងដោយ Atilla Yusef Guleker ដែលជា អតីតអ្នកកាសែត នៅប្រទេសតួកគី និងត្រូវបានគេស្គាល់ថាជា សមាជិកនៃចលនាលោក ហ្វេទុឡា ហ្គូឡេន Fethullah Gulen។ នៅកម្ពុជា សាលាហ្សាម៉ាន់ មាន ៤ ទីតាំង ក្នុងរាជធានីភ្នំពេញ ដែលមានសិស្សចុះឈ្មោះ ចូលរៀនសរុបជាង ២០០០នាក់។ សាលាហ្សាម៉ាន់ បង្កើតដំបូង សម្រាប់ថ្នាក់មតេយ្យ រហូតដល់ថ្នាក់ទី១២ ក្នុងឆ្នាំ១៩៩៧ និងបានបង្កើត សាកលវិទ្យាល័យហ្សាម៉ាន់ នៅឆ្នាំ២០១០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ