រដ្ឋសភាកម្ពុជាចាត់ទុកលិខិតរបស់លោកសម រង្ស៊ី ថាប៉ះពាល់យ៉ាងធ្ងន់ធ្ងរ ចំពោះព្រះរាជបល្ល័ង្កនិងរដ្ឋសភា
រដ្ឋសភាកម្ពុជា បានចាត់ទុកលិខិតរបស់លោកសម រង្ស៊ី ថាបានប៉ះពាល់យ៉ាងធ្ងន់ធ្ងរ ចំពោះព្រះរាជបល្ល័ង្ក និងរដ្ឋសភា ហើយមិនអាចអត់ឱនឲ្យបានឡើយ។ សេចក្តីថ្លែងការណ៍របស់រដ្ឋសភានេះ កាលពីថ្ងៃទី៤ ខែមេសា បានធ្វើឡើងពីរថ្ងៃ ក្រោយពីលោក សម រង្ស៊ី បានសរសេរលិខិតទូលថ្វាយព្រះមហាក្សត្រថា រដ្ឋសភាបច្ចុប្បន្ន មិនមែនជារដ្ឋសភា ដែលតំណាងឲ្យប្រជា ពលរដ្ឋខ្មែរទាំងមូលឡើយ តែជារដ្ឋសភា ដែលតំណាងឲ្យគណបក្សប្រជាជនកម្ពុជាតែមួយប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
រដ្ឋសភាកម្ពុជា នៅក្នុងសេចក្ដីថ្លែងការណ៍ចុះថ្ងៃទី៤មេសា បានចាត់ទុកលិខិតរបស់លោកសម រង្ស៊ី ថាបានប៉ះពាល់យ៉ាងធ្ងន់ធ្ងរ ចំពោះស្ថាប័នព្រះមហាក្សត្រ និងរដ្ឋសភា ហើយមិនអាចអន់ឱនឲ្យបានឡើយ។ ឆ្លើយតបនឹងការលើកឡើងរបស់លោកសម រង្ស៊ី ដែលថារដ្ឋសភាបច្ចុប្បន្ន មិនតំណាងឲ្យប្រជាពលរដ្ឋខ្មែរទាំងមូលនោះ រដ្ឋសភាកម្ពុជា បានអះអាងថា រដ្ឋសភានីតិកាលទី៥ បានកើតចេញពីឆន្ទៈរបស់ប្រជាពលរដ្ឋ តាមរយៈការបោះឆ្នោតជាសកល ដោយសេរី ដោយស្មើភាព ដោយចំពោះ និងជាសម្ងាត់ ហើយមានភាពរលូន គ្មានអំពើហិង្សា។
ស្ថាប័ននីតិបញ្ញត្តិនេះ បានបញ្ជាក់ថែមទៀតថា ខ្លួនបានដំណើរការស្របតាមរដ្ឋធម្មនុញ្ញ និងបទបញ្ជាផ្ទៃក្នុងនៃរដ្ឋសភា ហើយមាននីត្យានុកូលភាពពេញលេញ ក្នុងការអនុវត្តន៍ការងារ។ រដ្ឋសភាដែលមានតែសមាជិកគណបក្សប្រជាជនកម្ពុជា បានចោទគណបក្សសង្គ្រោះជាតិថា បានបោះបង់តួនាទី និងភារកិច្ច ដែលប្រជាពលរដ្ឋម្ចាស់ឆ្នោតបានប្រគល់ឲ្យ។
សូមជម្រាបជូនថា សេចក្តីថ្លែងការណ៍របស់រដ្ឋសភានេះ បានធ្វើឡើង ពីរថ្ងៃ ក្រោយពីលោក សម រង្ស៊ី បានសរសេរលិខិតទូលថ្វាយព្រះមហាក្សត្រថា រដ្ឋសភាបច្ចុប្បន្ន ដែលត្រូវបានបង្កើតឡើងកាលពីថ្ងៃទី២៣កញ្ញា ឆ្នាំ២០១៣ មិនមែនតំណាងឲ្យប្រជាពលរដ្ឋខ្មែរទាំងមូលនោះទេ។ មិនតំណាងដោយសារ ពុំមានតំណាងរាស្ត្រគ្រប់ចំនួន១២០រូប ចូលរួមក្នុងសម័យប្រជុំដំបូងនៃរដ្ឋសភា ដូចដែលតម្រូវដោយមាត្រា៧៦ នៃរដ្ឋធម្មនុញ្ញ។ ប្រធានបក្សប្រឆាំងរូបនេះ លើកឡើងថា រដ្ឋសភាកម្ពុជាបច្ចុប្បន្ន គឺជាសភាឯកបក្ស ដែលតំណាងឲ្យគណបក្សប្រជាជនកម្ពុជាតែមួយប៉ុណ្ណោះ។
ពាក់ព័ន្ធនឹងខ្លឹមសារនៃមាត្រា៧៦ នៃរដ្ឋធម្មនុញ្ញកម្ពុជា ដែលចែងថា រដ្ឋសភាមានសមាជិកតំណាងរាស្ត្រយ៉ាងតិច១២០រូបនោះ លោកសុខ សំអឿន ប្រធានអង្គការក្រុមអ្នកច្បាប់ការពារសិទ្ធិមនុស្សកម្ពុជា ឲ្យដឹងថា មាត្រានេះ មិនគួរត្រូវបានបកស្រាយតាមការយល់ឃើញរបស់បុគ្គលម្នាក់ៗនោះទេ។ លោកបន្តថា មានតែក្រុមប្រឹក្សាធម្មនុញ្ញតែមួយគត់ ដែលអាចបកស្រាយពីខ្លឹមសារពិតប្រាកដ នៃរដ្ឋធម្មនុញ្ញបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ