ផ្សារភាគហ៊ុនកម្ពុជាចេញដំណើរហើយ
មន្ត្រីតំណាងរដ្ឋាភិបាលកម្ពុជា និងតំណាងភាគីកូរ៉េ បានជួបជុំគ្នានៅជាន់ទី២៧នៃអគារពាណិជ្ជកម្មកាណាឌីយ៉ានៅព្រឹកថ្ងៃពុធទី១៨មេសាដើម្បីសម្ពោធការជួញដូរមូលបត្រជាផ្លូវការ។ លោកនាយករដ្ឋមន្ត្រី ហ៊ុន សែនបានថ្លែងសារនិងគោះជួងតាមវីដេអូដើម្បីសម្ពោធបើកផ្សារមូលបត្រនេះដែលមានក្រុមហ៊ុនលក់មូលបត្រដំបូងគឺរដ្ឋាករទឹកស្វយ័តរាជធានីភ្នំពេញដែលប្រកាសលក់ហ៊ុន១៥ភាគរយនៃមូលធនសរុបរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
ផ្សារភាគហ៊ុនកម្ពុជាបានចេញដំណើរហើយនៅព្រឹកថ្ងៃពុធទី១៨មេសានេះ។ ចេញដំណើរជាមួយក្រុមហ៊ុនលក់មូលបត្រតែមួយគឺ រដ្ឋាករទឹកស្វយ័តរាជធានីភ្នំពេញ។ រដ្ឋាករទឹកស្វយ័តរាជធានីភ្នំពេញបានប្រកាសលក់ភាគហ៊ុនចំនួន១៥ភាគរយនៃមូលធនសរុបរបស់ខ្លួន ដែលត្រូវជា១៣លានហ៊ុន ឬមូលបត្រ។ តម្លៃមកដល់ទីផ្សារដំបូងរបស់រដ្ឋាករទឹកគឺ៦៣០០រៀលក្នុងមួយហ៊ុន។ជាង១ម៉ោងក្រោយមក ហ៊ុននេះបានឡើងដល់៩៤០០រៀលក្នុងមួយហ៊ុន។
មន្ត្រីរដ្ឋាភិបាលនិងមន្ត្រីទីផ្សារមូលបត្រភាគីកូរ៉េសុទ្ធតែថ្លែងកត់សម្គាល់ថា ថ្ងៃនេះគឺថ្ងៃប្រវត្តិសាស្ត្រនៃប្រព័ន្ធហិរញ្ញវត្ថុរបស់កម្ពុជា។ លោកនាយករដ្ឋមន្ត្រីហ៊ុន សែនបានថ្លែងសារនិងគោះជួងបើកផ្សារភាគហ៊ុននេះជាផ្លូវការ ដោយមានប្រសាសន៍ថា ផ្សារមូលបត្រនេះនឹងជាកាលានុវត្តភាពថ្មីក្នុងការកៀរគរទុន និងធនធានហិរញ្ញវត្ថុទាំងពីរគឺទីផ្សារក្នុងប្រទេស និងក្រៅប្រទេសយកមកជំរុញការអភិវឌ្ឍន៍សហគ្រាសនៅក្នុងប្រទេសកម្ពុជា។
នៅក្នុងពិធីសម្ពោធផ្សារមូលបត្រកម្ពុជានៅថ្ងៃនេះ លោកYoo, Jae Hoon ស្នងការអចិន្ត្រៃយ៍នៃគណៈកម្មការសេវាកម្មហិរញ្ញវត្ថុនៃសាធារណៈរដ្ឋកូរ៉េបានអត្ថាធិប្បាយថា ផ្សារភាគហ៊ុនគឺជាបេះដូងរបស់ប្រទេសមួយសម្រាប់ការអភិវឌ្ឍ។ ប្រទេសមួយដែលមានការផ្សារមូលបត្រជឿនលឿន វានឹងជួយជំរុញសេដ្ឋកិច្ចប្រទេសនោះអោយជឿនលឿនដែរ។
ទន្ទឹមនឹងការអបអរវត្តមានផ្សារភាគហ៊ុនរបស់កម្ពុជា លោកឧបនាយករដ្ឋមន្ត្រីគាត ឈន់រដ្ឋមន្ត្រីក្រសួងសេដ្ឋកិច្ចដែលបានចាត់ទុកថ្ងៃ១៨មេសាជាថ្ងៃបោះជំហានទៅមុខដ៏ធំនៃវិស័យហិរញ្ញវត្ថុកម្ពុជា បានអំពាវនាវដល់សហគ្រាសសាធារណៈ២ទៀត គឺទូរគមនាគមន៍កម្ពូជា និងកំពង់ផែស្វយ័តក្រុងព្រះសីហនុអោយស្ថាប័នទាំងនេះរៀបចំនិងបោះផ្សាយជួញដូរមូលបត្រអោយបានឆាប់ក្នុងពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ