ព្រះមហាក្សត្រ និងសម្តេចម៉ែយាងទៅពិនិត្យព្រះរាជសុខភាពនៅប៉េកាំង
ព្រះមហាក្សត្រព្រះបាទ ព្រះនរោត្តម សីហមុនី និងសម្តេចម៉ែ មុនីនាថ សីហនុ បានយាងចាកចេញពីប្រទេសកម្ពុជាហើយ កាលពីព្រឹកថ្ងៃព្រហស្បតិ៍នេះ ដើម្បីទទួលការពិនិត្យព្រះរាជសុខភាព នៅក្នុងទីក្រុងប៉េកាំង ប្រទេសចិន។ ព្រះអង្គទាំងទាំងពីរអាចគង់នៅទីក្រុងប៉េកាំងរយៈពេល២សប្តាហ៍។
ចុះផ្សាយនៅថ្ងៃ៖
ស្តាប់ - ០២:១៦
ក្រោយពីបានបញ្ចប់ព្រះរាជពិធីបុណ្យព្រះបរមសពព្រះបរមរតនកោដ្ឋ ព្រះមហាក្សត្រ ព្រះបាទព្រះបរមនាថ នរោត្តម សីហមុនី និងសម្តេចម៉ែ នរោត្តម មុនីនាថ សីហនុ បានយាងចាកចេញពីប្រទេសកម្ពុជា នៅព្រឹកថ្ងៃព្រហស្បតិ៍នេះ ដើម្បីទទួលការត្រួតពិនិត្យព្រះរាជសុខភាព នៅក្នុងទីក្រុងប៉េកាំង ប្រទេសចិន។
លោកគង់ សំអុល រដ្ឋមន្ត្រីក្រសួងព្រះបរមរាជវាំង ព្រះអង្គម្ចាស់ក្សត្រិយ នរោត្តម អារុណរស្មី និងព្រះអង្គម្ចាស់ស៊ីសុវត្ថិ ធម្មិកោ គឺជាអ្នកដង្ហែព្រះអង្គទាំងពីរ ទៅដល់ទីក្រុងប៉េកាំង ដែលនៅទីនោះ បើតាមបន្ទូលរបស់ព្រះអង្គម្ចាស់ធម្មិកោ ព្រះមហាក្សត្រ និងសម្តេចម៉ែអាចគង់នៅរយៈពេល២សប្តាហ៍ ដើម្បីការពិនិត្យព្រះរាជសុខភាពនោះ។
នៅព្រឹកមិញនេះ ការយាងចាកចេញរបស់ព្រះមហាក្សត្រ និងសម្តេចម៉ែត្រូវបានជូនដំណើរដោយថ្នាក់ដឹកនាំជាន់ខ្ពស់ រួមមាន លោកនាយករដ្ឋមន្ត្រីហ៊ុន សែន លោកហេង សំរិន ប្រធានរដ្ឋសភា ព្រះអង្គម្ចាស់នរោត្តម រណឬទ្ធិ ប្រធានឧត្តមទីប្រឹក្សាព្រះមហាក្សត្រ មន្ត្រីជាន់ខ្ពស់រដ្ឋាភិបាល និងសមាជិករាជវង្សជាច្រើនទៀត។
ព្រះអង្គម្ចាស់ ស៊ីសុវត្ថិ ធម្មិកោ អតីតលេខាធិការផ្ទាល់សម្តេចឪបានមានបន្ទូលនៅព្រលានយន្តហោះអន្តរជាតិភ្នំពេញថា នេះជាការយាងទៅពិនិត្យព្រះរាជសុខភាពជាលក្ខណៈឯកជន ដែលជាធម្មតាត្រូវធ្វើឡើងរៀងរាល់៦ខែម្តង ពោលគឺ ពីរដងក្នុងមួយឆ្នាំ។ ព្រះអង្គម្ចាស់បានបន្ថែមថា ប្រទេសចិនមានបច្ចេកវិទ្យា និងបច្ចេកទេសខ្ពស់ក្នុងការត្រួតពិនិត្យសុខភាព ហើយថា មន្ត្រីរាជរដ្ឋាភិបាលមួយចំនួន រួមទាំងលោក ជា ស៊ីម ប្រធានព្រឹទ្ធសភា ក៏ទៅទទួលការពិនិត្យសុខភាពនៅប្រទេសចិនដែរ។
គួរបញ្ជាក់ថា ការយាងចាកចេញទៅទទួលការពិនិត្យព្រះរាជសុខភាពរបស់ព្រះមហាក្សត្រ និងសម្តេចម៉ែត្រូវបានធ្វើឡើងមួយថ្ងៃ ក្រោយពីរដ្ឋាភិបាលបានរៀបចំពិធីក្រុងពាលីចាប់ផ្តើមសាងសង់ស្តូប និងព្រះបរមរូបសម្តេចឪ នរោត្តម សីហនុ កាលពីល្ងាចថ្ងៃពុធទី២០កុម្ភៈ។ ពិធីដែលត្រូវបានរៀបចំធ្វើក្រោមវត្តមានរបស់លោកនាយករដ្ឋមន្ត្រីហ៊ុន សែន។
សំណង់ព្រះបរមរូបធ្វើអំពីស្ពាន់បែរព្រះភក្រ្តទៅទិសខាងកើតត្រូវបានសម្រេចសង់នៅលើសួនឧទ្យានសាធារណៈខាងកើតវិមានឯករាជ្យ។ សំណង់នេះនៅមិនឆ្ងាយពីរាជដំណាក់ទក្សិណភារុណ ដែលជាកន្លែងដែលព្រះអង្គប្រសូត្រ កាលពីថ្ងៃទី៣១ខែតុលាឆ្នាំ១៩២២។ ដំណាក់ទក្សិណភារុណសព្វថ្ងៃ គឺជាស្ថានទូតកូរ៉េខាងជើង ស្ថិតនៅក្បែរភូមិគ្រឹះលោកនាយករដ្ឋមន្ត្រីហ៊ុន សែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ