ក្រសួងការបរទេសកម្ពុជាបដិសេធព័ត៌មាន ដែលថា ពលរដ្ឋខ្មែរ១៥នាក់ ត្រូវថៃបាញ់សម្លាប់
ក្រោយការផ្ទុះព័ត៌មានស្តីពីការបាញ់សម្លាប់ពលរដ្ឋខែ្មរចំនួន១៥នាក់ ដែលឆ្លងចូលទៅព្រំដែនថៃខុសច្បាប់កាលពីដើមខែមីនានេះ ក្រសួងការបរទេសកម្ពុជានៅថ្ងៃអង្គារនេះ បានឱ្យថា គ្មានការបញ្ជាក់ណាមួយច្បាស់លាស់នោះទេស្តីពីការបាញ់សម្លាប់ពលរដ្ឋខ្មែរដែលចូលទៅកាប់ឈើខុសច្បាប់នេះ។ ប៉ុន្តែសង្គមស៊ីវិលវិញ បានអំពាវនាវឱ្យប្រទេសថៃបញ្ឈប់ការបាញ់សម្លាប់ពលរដ្ឋដោយខុសច្បាប់ និងជំរុញឱ្យរដ្ឋាភិបាលថៃបើកការស៊ើបអង្កេតពីករណីបាញ់សម្លាប់ឃោរឃៅនេះ។
ចុះផ្សាយនៅថ្ងៃ៖
ស្តាប់ - ០២:១៩
ក្រសួងការបរទេសកម្ពុជា បានបដិសេធថាមិនមានការបាញ់សម្លាប់ពលរដ្ឋខ្មែរចំនួន១៥នាក់កាលពីដើម ខែមីនា ពីសំណាក់ទាហានព្រំដែនថៃដូចការចុះផ្សាយព័ត៌មាននោះទេ។ នេះបើតាមការបញ្ជាក់របស់លោក កុយ គួងអ្នកនាំពាក្យក្រសួងការបរទេសកម្ពុជា។ ថ្លែងប្រាប់វិទ្យុបារាំងអន្តរជាតិនៅព្រឹកថ្ងៃអង្គារនេះ លោក កុយ គួងបានបញ្ជាក់ដូច្នេះ៖
អ្នកនាំពាក្យក្រសួងការបរទេសលោក កុយ គួង ដដែល បានឱ្យដឹងថា កាលពីដើមខែមីនាកន្លងទៅ ពិតជាមានពលរដ្ឋខ្មែរចំនួន១៥នាក់ បានលួចចូលទៅក្នុងទឹកដីថៃខុសច្បាប់មែន ប៉ុន្តែពលរដ្ឋខ្មែរចំនួន១១នាក់ ក្នុងចំណោម១៥បានគេចខ្លួនចូលក្នុងដីខ្មែរវិញ ហើយ ៤នាក់ផ្សេងទៀតត្រូវបានទាហានថៃចាប់បាន និងបានដោះលែងរួចអស់ហើយ។ ទាក់ទងនឹងការឆ្លើយបំភ្លឺពីការបាញ់សម្លាប់ពលរដ្ឋខ្មែរនេះដែរ ស្ថានទូតថៃប្រចាំនៅកម្ពុជា ក៏បានឆ្លើយបដិសេធចំពោះព័ត៌មានស្តីពីការបាញ់សម្លាប់នេះ។ នេះបើតាមលោក កុយគួងដដែល។ លោក កុយ គួង បានសង្កត់ធ្ងន់ថា “ប្រសិនបើគ្រាន់តែខ្មែរចូលក្នុងទឺកដីថៃខុសច្បាប ឬកាប់ឈើខុសច្បាប់ត្រូវបានទាហានថៃបាញ់សម្លាប់នោះ គឺពលរដ្ឋខ្មែរស្លាប់មិនតិចនោះទេ។
ការថ្លែងបដិសេធរបស់ក្រសួងការបរទេសកម្ពុជាបែបនេះ គឺបន្ទាប់ពីមានសារព័ត៌មាន ក្នុងស្រុក និងអន្តរជាតិកាលពីពេលថ្មីៗនេះ បានចុះផ្សាយពីការបាញ់សម្លាប់ពលរដ្ឋខ្មែរចំនួន១៥នាក់ កាលពីដើមខែមីនាកន្លងទៅនេះ។ ជាការចុះផ្សាយព័ត៌មានដោយផ្អែកលើសាក្សីដែលជាយោធានៅតំបន់ព្រំដែនខ្មែរ-ថៃ ក្នុងខែត្រព្រះវិហារ។ សូមបញ្ជាក់ថា ទាក់ទងនឹងការបាញ់សម្លាប់ពលរដ្ឋខែ្មរនេះ មជ្ឈមណ្ឌលសិទ្ធមនុស្សកម្ពុជា កាលពីថ្ងៃទី១៧ មីនា បានសរសេលិខិតចំហរមួយផ្ញើរទៅកាន់នាយករដ្ឋមន្ត្រីថៃ លោក ស្រីយ៉ីងឡាក់ ដើម្បីអំពាវនាវឱ្យមានការស៊ើបអង្កេត និងបញ្ឈប់ការបាញ់សម្លាប់ពលរដ្ឋខ្មែរដែលចូលទៅកាប់ឈើខុសច្បាប់នៅក្នុងទឹកដីថៃ។
យ៉ាងណាក៏ដោយ ព័ត៌មានស្តីពីការបាញ់ប្រហាររបស់ទាហានថៃមកលើពលរដ្ឋខ្មែរដែលឆ្លងចូលកាប់ឈើក្នុងទឹកដីថៃខុសច្បាប់ គឺនៅតែបន្តកើតមានជារឿយៗ។ លោក កុយ គួង ក៏បានទទួលស្គាល់ថា នៅត្រឹមឆ្នាំ២០១៣ មានពលរដ្ឋខ្មែរចំនួន១៣នាក់ត្រូវបានទាហានថៃបាញ់ស្លាប់ដោយសារការចូលកាប់ឈើខុសច្បាប់។ តួរលេខរបស់រដ្ឋាភិបាលនៃការបាញ់សម្លាប់ពលរដ្ឋខ្មែរគឺជាតួរលេខមួយ ប៉ុន្តែសង្គមស៊ីវិលវិញ មានតួរលេខផ្សេងពីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ