គណបក្សប្រឆាំងផ្ញើរលិខិតទៅក្រសួងមហាផ្ទៃដើម្បីសុំឲ្យក្រសួងមហាផ្ទៃទទួលស្គាល់លក្ខន្តិកៈថ្មី មុននឹងមានការកែសម្រួល
គណបក្សសង្គ្រោះជាតិបានបញ្ជូន លក្ខន្តិកៈនៃសមាជវិសាមញ្ញបានធ្វើវិសោនកម្ម លើប្រកា៤៥និង៤៧ ទៅកាន់ក្រសួងមហាផ្ទៃនៅថ្ងៃព្រហស្បតិ៍ទី៣០មីនានេះ។ ការសម្រេចបញ្ចូនលក្ខន្តិកៈ ថ្មីរបស់គណបក្សលើប្រកាទាំងពីរនាពេលនេះ បានធ្វើឡើងបន្ទាប់ពី ជំនួបជជែកគ្នារវាងវាងតំណាងក្រសួងមហាផ្ទៃនិងតំណាងគណបក្សសង្គ្រោះជាតិកាលពីថ្ងៃពុធមិនទទួលបានការត្រូវរ៉ូវគ្នានូវចំណុចមួយចំនួន។
ចុះផ្សាយនៅថ្ងៃ៖
ស្តាប់ - ០២:០៥
អនុប្រធានគណបក្សសង្គ្រោះជាតិ លោកអេង ឆៃអ៊ាង ថ្លែងប្រាប់វិទ្យុបារាំង RFI នារសៀលនេះថា លិខិតដែលគណបក្សសង្គ្រោះជាតិបញ្ជូនទៅឲ្យក្រសួងមហាផ្ទៃ មិនបាននិយាយពីរឿងក្បាលម៉ាស៊ីនដឹកនាំបក្សប្រឆាំងទេ គឺនិយាយតែពីវិសោធនកម្មតែប៉ុណ្ណោះ។ ដោយឡែកទាក់ទងទៅនឹងនីតិវិធី ឬក៏បែបបទនោះ គឺត្រូវរង់ចាំមើលក្រសួងមហាផ្ទៃពិនិត្យទៅលើវិសោធកម្មលក្ខន្តិកៈថ្មី។ បន្ទាប់ពីនេះ គណបក្សសង្គ្រោះជាតិនឹងរៀបរយឲ្យស្របទៅនឹងលក្ខន្តិកៈថ្មីនេះ។ នេះបើតាមការបញ្ជាក់របស់លោក អេង ឆៃអ៊ាង។
ទោះយ៉ាងណាគណបក្សសង្គ្រោះជាតិបានអះអាងថា នឹងមិនចាំធ្វើសមាជជ្រើសតាំងឡើងវិញទេ ដោយលក្ខន្តិកៈថ្មី បានយោងពីលក្ខន្តិកៈចាស់ ក្នុងការបើកផ្លូវឲ្យប្រធានស្តីទី ក្លាយទៅជាប្រធានគណបក្ស១រូបផ្លូវការតែប៉ុណ្ណោះ។ រីឯអនុប្រធានគណបក្ស គឺត្រូវសម្រេចដោយការ អនុម័តសម្លេង៥០ភាគរយបូក១ពីក្នុងចំណោមគណៈកម្មការនាយក។
នៅក្នុងជំនួបកាលពីម្សិលជាមួយគណសង្គ្រោះជាតិ និងការពន្យល់ជាថ្មីតាមរយៈសន្និសីទកាសែតនៅរសៀលថ្ងៃព្រហស្បតិ៍នេះ ក្រសួងមហាផ្ទៃបានបញ្ជាក់ថាការធ្វើសមាជវិសាមញ្ញរបស់គណបក្សសង្គ្រោះជាតិ កាលពីថ្ងៃទី០២មីនាឆ្នាំ២០១៧ ជ្រើសតាំងប្រធានថ្មី និងអនុប្រធានថ្មីតាំង៣រូប របស់គណបក្សនេះ គឺខុសនឹងប្រការ ៤៧ ទាំងប្រកា៤៧ចាស់ និងប្រកា៤៧ថ្មី នៃលក្ខន្តិកៈរបស់គណបក្សសង្គ្រោះជាតិ ដែលជាច្បាប់កំពូលរបស់គណបក្សនេះ។
ឆ្លើយតបទៅនឹងសំណួរអ្នកសារព័ត៌មាននៅថ្ងៃនេះដែរ លោកប៊ុន ហ៊ុន អនុរដ្ឋលេខាធិការក្រសួងមហាផ្ទៃបានបញ្ជាក់ថាក្រសួងមហាផ្ទៃមិនបានណែនាំទៅគណបក្សឲ្យធ្វើយ៉ាងណាទេ គឺក្រសួងប្រាប់ឲ្យធ្វើទៅតាមលក្ខន្តិកៈប៉ុណ្ណោះ ទើបមានការទទួលស្គាល់។
ដោយឡែកទាក់ទងទៅនឹងពាក្យស្លោក «ដូរមេឃុំបំរើបក្ស ដាក់មេឃុំបំរើរាស្ត្រ» ដែលពាក្យស្លោកនេះ ត្រូវបានចោទប្រកាន់ពីគណបក្សប្រជាជនថាមានចរិកប្រមាថមើលងាយមេឃុំនោះ លោក អេង ឆៃអ៊ាង បញ្ជាក់ថាគណបក្សនឹងប្រកាសពីជំហរបន្ទាប់ពីការមិនយកទៅប្រើប្រាស់ឬយ៉ាងណានោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ