លោកគង់ គាំបរាជ័យក្នុងការសុំជួបលោកជា ស៊ីម
លោកគង់ គាំ ប្រធានស្តីទីគណបក្សសម រង្ស៊ី បានស្នើសុំជួបលោកជា ស៊ីមប្រធានព្រឹទ្ធសភា និងជាប្រធានគណបក្សប្រជាជនកម្ពុជាផង ក្នុងគោលបំណងសួរសុខទុក្ខអំពីសុខភាពរបស់លោក។ ប៉ុន្តែសំណើនេះត្រូវបានបដិសេធ កាលពីថ្ងៃចន្ទម្សិលមិញ ដោយខុទ្ទកាល័យរបស់លោកជា ស៊ីម។
ចុះផ្សាយនៅថ្ងៃ៖
ស្តាប់ - ០១:៤១
កាលពីថ្ងៃទីចន្ទទី២០សីហាម្សិលមិញ នាយខុទ្ទកាល័យប្រធានព្រឹទ្ធសភា គឺលោក ម៉ម សារិនបានធ្វើលិខិតឆ្លើយតបជាអវិជ្ជមានចំពោះសំណើរបស់លោកគង់ គាំ ប្រធានស្តីទីគណបក្សសម រង្ស៊ី ដែលស្នើសុំដឹកនាំប្រតិភូគណបក្ស៥នាក់ ដើម្បីជួបលោក ជា ស៊ីម ប្រធានព្រឹទ្ធសភា។
សំណើរបស់លោកគង់ គាំ ដែលត្រូវបានសរសេរនៅលើលិខិតមួយនោះ បញ្ជាក់អំពីគោលបំណងនៃការសុំជួបនេះថា ដើម្បីសួរសុខទុក្ខអំពីស្ថានភាពសុខភាពរបស់លោកជា ស៊ីម។ ប៉ុន្តែលិខិតឆ្លើយតបពីនាយខុទ្ទកាល័យប្រធានព្រឹទ្ធសភានោះបានសរសេរថា លោក ជា ស៊ីម មិនអាចទទួលជួបលោក គង់ គាំ និងប្រតិភូគណបក្សសម រង្ស៊ីបានឡើយ ដោយសារតែលោកប្រធានព្រឹទ្ធសភាជាប់រវល់នឹងការងារច្រើន។
ថ្លែងប្រាប់វិទ្យុបារាំងអន្តរជាតិតាមទូរស័ព្ទនៅរសៀលថ្ងៃអង្គារនេះ លោកគង់ គាំមានប្រសាសន៍ថា លោកបានអស់ចិត្តហើយ បើទោះជាសំណើរបស់លោកត្រូវបានបដិសេធយ៉ាងនេះក៏ដោយ។ លោកគង់ គាំបញ្ជាក់ថា ការឆ្លើយតបពីខុទ្ទកាល័យរបស់លោកជា ស៊ីមយ៉ាងនេះក៏បានបង្ហាញអំពីសុខភាពរបស់ប្រធានព្រឹទ្ធសភា ដែលលោកចង់ដឹងនោះដែរ។
លោកគង់ គាំ បានច្រានចោលនូវមតិសង្ស័យខ្លះ ដែលថា សំណើរបស់ប្រតិភូជាន់ខ្ពស់របស់គណបក្សសម រង្ស៊ី សុំជួបលោក ជា ស៊ីម អាចមានពាក់ព័ន្ធនឹងបញ្ហានយោបាយ ពិសេស បញ្ហាពិរុទ្ធភាពរបស់លោកសម រង្ស៊ី។ ចំពោះលោកគង់ គាំ បំណងជួបជាមួយប្រធានគណបក្សប្រជាជនកម្ពុជា គឺមានតែការសួរសុខទុក្ខអំពីសុខភាពរបស់លោកតែប៉ុណ្ណោះ។
គួររម្លឹកថា កាលពីដើមឆ្នាំ២០១២នេះ នៅក្រោយការបោះឆ្នោតព្រឹទ្ធសភា លោកគង់ គាំធា្លប់បានសរសេរលិខិតសុំជួបលោក ជា ស៊ីម ដើម្បីចរចាអំពីការបែងចែកការទទួលខុសត្រូវនៅក្នុងព្រឹទ្ធសភា ប៉ុន្តែសំណើនោះក៏ត្រូវបានច្រានចោលដូចគ្នាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ